ՌԱՖՖԻ ՅՈՎՀԱՆՆԷՍԵԱՆԻ ԱՅՑԵԼՈՒԹԻՒՆՆԵՐԸ ԿԸ ԴԻՄԱՒՈՐՈՒԻՆ ԽԱՌՆ ԸՆԴՈՒՆԵԼՈՒԹԻՒՆՆԵՐՈՎ

0
131

Ժառանգութիւն կուսակցութեան ղեկավար  Ռաֆֆի Յովհաննէսեանի յետընտրական այցելութիւններու ծիրին մէջ ան հանդիպում ունեցած է Կապանի բնակիչներուն հետ: Հաւաքուած մեծաթիւ մարդոց ուղղելով իր խօսքը՝ ան հաստատած է. «Գարեգին Նժդեհը ոչ մէկի սեփականութիւնը չէ, նա բոլորի սպարապետն է»:
Կապանի մէջ Ռաֆֆի Յովհաննէսեանի հաւաքը շատ բուռն եւ բազմակարծիք եղած է: Հակառակ անոր որ բազմաթիւ անձեր հաւաքուած էին զայն լսելու, սակայն կային նաեւ Յովհաննէսեանին ընդդիմացողներ: Ռաֆֆի Յովհաննէսեան իր խօսքին մէջ անգամ մը եւս պահանջած է մարզպետ Սուրիկ Խաչատրեանի հրաժարականը եւ նկատի ունենալով, որ հանդիպումը մարզպետարանին առջեւ տեղի կ՛ունենար՝ ան մատնացոյց ընելով մարզպետարանին շէնքը ըսած է. «Սուրէ՛ն Խաչատրեան, եկ այստեղ եւ հրաժարական տուր»:
Այդ խօսքը ըսած ատեն բեմ բարձրացած է կին մը, որ ըսած է. «Դուք իրաւունք չունէք պահանջել մի մարդու հրաժարական, ով մեծ ներդրում ունի Արցախեան ազատամարտում եւ, առհասարակ, Կապանի կեանքում»:
Ի պատասխան կնոջ յայտարարութեան՝ Ռաֆֆի Յովհաննէսեան յայտնած է, որ կայ խօսքի ազատութիւն, Կապանի բեմահարթակին վրայ միշտ պէտք է խօսքի ազատութիւն ըլլայ, եւ բոլորը պէտք է լսեն բոլորին կարծիքները:
Մինչ Յովհաննէսեան շնորհակալութիւն կը յայտնէր օրէնքով յաղթանակը իրեն տուողներուն, բեմ բարձրացած է մարդ մը եւ հարցուցած,  թէ Ռաֆֆի Յովհաննէսեան արեւմտամէ՞տ է, թէ՞ ռուսամէտ. Ռ. Յովհաննէսեան պատասխանած է. «Թէ՛ Ռուսաստանը, թէ՛ Միացեալ Նահանգները, թէ՛ Ֆրանսան հեգնել են Ձեզ, երբ ճանաչել են Հայաստանի ընտրութիւնները: Ճիշդ է այդ բոլոր երկրների հետ յարաբերութիւնները կը լինեն ամենաբարձր մակարդակի վրայ, բայց ամենաառաջինը կը լինի Հայաստանի շահը: Մենք յարգում ենք բոլորին, եւ բոլորն էլ պէտք է յարգեն մեզ», յայտնած է Ռաֆֆի Յովհաննէսեան:
Ըստ հաւաքի մասնակիցներուն, հազիւ Ռաֆֆի Յովհաննէսեան եւ անոր խումբը մուտք գործած են Կապան, ելեկտրականութիւնը ընդհատուած է։ Սակայն ասիկա արգելք չէ եղած, որ հաւաքը կայանայ բնական կերպով, որովհետեւ Ռաֆֆի Յովհաննէսեանի ելոյթներուն ընթացքին բարձրախօսները կը միացուին իրենց սպասարկող ինքնաշարժներուն մէջ գտնուող սարքերու։

 Միւս կողմէ, Ռաֆֆի Յովհաննէսեանի շրջանակը տակաւին չէ քննարկած Սահմանադրական դատարան դիմելու հարցը: Այս մասին նշած է Ժառանգութիւն կուսակցութեան փոխնախագահ Արմէն Մարտիրոսեան ։ Ըստ անոր, քննարկումը տեղի չ՛ունենար Ռաֆֆի Յովհաննէսեանի մարզեր տուած այցելութիւններուն պատճառով։
«Ռաֆֆի Յովհաննիսեանի հանրահաւաքները կարեւորւում են նրանով, որ ակտիւութիւն մտցրին ոչ միայն Երեւանի, այլեւ մարզերի բնակչութեան կեանքում», յայտնած է Մարտիրոսեան: Ան համոզուած է, որ Ռաֆֆի Յովհաննէսեանի տարած պայքարը օրէնքի ծիրին մէջ կը գտնուի: Արմէն Մարտիրոսեան նշած է, որ իրենք տակաւին կ՛առաջնորդուին երկխօսութեամբ, սակայն նաեւ ունին պայքարի այլ ձեւեր։

LEAVE A REPLY

Please enter your comment!
Please enter your name here