ՅՈՎՀԱՆՆԷՍԵԱՆ ՀՐԱՊԱՐԱԿԱՅԻՆ ԱՍՈՒԼԻՍ ՄԸ ՊԻՏԻ ՏԱՅ ԱՅՍՕՐ ԿԷՍՕՐԻՆ

0
139

Ազատութեան հրապարակին վրայ երէկ  տեղի ունեցաւ Ժառանգութիւն կուսակցութեան ղեկավար Ռաֆֆի Յովհաննէսեանի կողմնակիցներուն հաւաքը, որուն ընթացքին իր արտասանած խօսքին մէջ Յովհաննէսեան անգամ մը եւս սպառնաց մարզպետներուն, քաղաքապետներուն ու գիւղապետներուն՝ զանոնք մեղադրելով նախագահական ընտրութիւններու արդիւնքները կեղծելու յանցանքով:
«Այցելելով մարզեր հարաւից հիւսիս, մենք յայտարարում ենք, որ բոլոր կեղծարարները պէտք է ներողութիւն խնդրեն ժողովրդից եւ հրաժարական տան: Հրաժարականների ճանապարհը բաց է գիւղապետից մինչեւ Բաղրամեան-26», հաստատեց Յովհաննէսեան:
Անդրադառնալով գործող նախագահ Սերժ Սարգսեանին՝ Յովհաննէսեան յայտնեց. «Ապրիլի 9-ին նա արդէն չի լինի պետութեան գործող ղեկավարը: Սակայն ես նրա հետ պատրաստ եմ քննարկել եւ առաջարկել ԵՊՀ հոգաբարձուների խորհրդի նախագահի պաշտօնը: Բայց հիմա Սերժ Սարգսեանը պէտք է լքի ԵՊՀն»:
Ապա Ազատութեան հրապարակին վրայ նախագահական նախկին թեկնածու Ռաֆֆի Յովհաննէսեանը փոքրիկ հանրաքուէ մը կազմակերպեց։ Ան հաւաքուածներուն հարցուց, թէ եթէ պայքարը տեւէ մէկ օր, մէկ շաբաթ, մէկ ամիս, պատրա՞ստ են մինչեւ վերջ երթալու՝ հաւաքուածները պատասխանեցին, որ պատրաստ են:

Յաջորդ հարցումը կը վերաբերէր Սահմանադրական դատարան դիմել-չդիմելու հարցին, որուն թեր եղած է հաւաքուածներուն մէկ մասը, իսկ դէմ՝ այլ մաս մը։  Յովհաննէսեան նշեց, որ իր որոշումին մասին պիտի յայտարարէ 2 Մարտին կայանալիք հանրահաւաքին ընթացքին։
Ինչ կը վերաբերի ՀԱԿի պատգամաւոր Նիկոլ Փաշինեանի՝ կառավարութեան կազմի ձեւաւորման վերաբերող առաջարկին, Ռ. Յովհաննէսեան ըսաւ, որ հոն՝ հրապարակին վրայ պիտի սկսի կառավարութեան ձեւաւորումը: Ան խոստացաւ բազմաթիւ այլ հարցումներու պատասխան տալ 2 Մարտին։
Յովհաննէսեան իր խօսքին մէջ յիշեց նաեւ Սումկայիթի ջարդերը՝ յայտնելով, որ 25 տարի առաջ մեր ժողովուրդը զոհեր տուաւ Ատրպէյճանի մէջ։ «Մարդիկ սպաննուել են միայն այն բանի համար, որ հայեր էին», ըսաւ ան՝ մէկ վայրկեան լռութիւն յայտարարելով:
Մարտ 1-ի 5-րդ տարելիցին նուիրուած սգոյ հաւաքին անդրադառնալով՝ ան յայտնեց, որ կէսօրին հրապարակային ասուլիս պիտի տայ, ապա կողմնակիցներուն հետ պիտի ուղղուի Միասնիկեանի յուշարձանին մօտ, ուր ծաղիկներ պիտի զետեղէ:
Յովհաննէսեան բանաւոր կերպով ոստիկանութիւնը իրազեկեց զանգուածային միջացառման մասին, ինչ որ օրէնսդրութեամբ նախատեսուած չէ: Նշենք, որ աւելի վաղ Յովհաննէսեանի ներկայացուցիչները դիմած էին քաղաքապետարան՝ ժամը 17։00-էն 19:45 նախաձեռնութիւն կատարելու գծով: Առաջին անգամ չէ, որ Ռաֆֆի Յովհաննէսեան անսպասելիօրէն կը փոխէ նախաձեռնութիւններուն ժամանակացոյցը։
Նշենք, որ երէկուան հանրահաւաքը վարեց Ժառանգութիւն կուսակցութեան վարչութեան փոխնախագահ Արմէն Մարտիրոսեանը:
Իր ներածական խօսքին մէջ ան յայտարարեց, թէ վերջին օրերուն Րաֆֆի Յովհաննէսեանի մարզային այցելութիւններէն յստակացաւ, որ «մենք ապրում ենք այլ Հայաստանում»:

LEAVE A REPLY

Please enter your comment!
Please enter your name here