ՖՐԱՆՍԱՀԱՅ ՀԱՄԱՅՆՔԸ ՑՆՑՈՒԱԾ -ԱՏԵԱՆԸ ԿԸ ՊԱՇՏՊԱՆԷ ՑԵՂԱՍՊԱՆՈՒԹԻՒՆԸ ՈՒՐԱՑՈՂԸ

0
151

 Այն  օրերուն երբ աշխարհի տարբեր ափերու մէջ    հայ  ժողովուրդը կ’ոգեկոչէ Սումկայիթի  կոտորածներուն   յիշատակը, Փարիզի Արդարադատութեան Գերագոյն Ատեանը   պատժական   վճիռ արձակեց Հայոց Ցեղասպանութեան ճանաչման  ջատագով «Ֆրանս-Արմենի» պարբերաթերթի նախկին խմբագիր, 2002-էն 2009-ի միջեւ   Եւրոպայի Հայ Դատի Գրասենեակի   տնօրէն, «Արդարութեան եւ ժողովրդավարութեան  Եւրո-Հայկական Դաշնութեան» նախկին վարիչ տնօրէն,  մարդային իրաւանց  պաշտպանութեան  ֆրանսահայ  ծանօթ  անձնաւորութիւններէն Լորէն  Լէյլէկեանի դէմ:  Ատեանը Լէյլէկանին  հրահանգեց  վճարելու  4000 եուրօ գումար մը, թուրք՝ Սիրմա Օրանին հասցէին պատճառած վնասներուն եւ  4500 եուրօ ալ՝ իբրեւ ատեանի ծախսեր: Ծագումով  թուրք  Սիրմա  Օրան –  Մարցի գործունէութիւնը հարուստ է  Հայոց Ցեղասպանութիւնը  մերժելու  ապացոյցներով: Ան  Լէյլէկեանը կը  մեղադրէր, որ իր խմբագրականներէն մէկուն մէջ  զինք դարձեալ  Հայոց Ցեղասպանութիւնը ուրացող անուանած էր:

Սիրմա  Օրան- Մարց այն անձնաւոութիւնն է, որ երեք տարի առաջ, երբ Լիոնի շրջակայքի Վիլէորպան  քաղաքի  քաղաքապետ  Ժան Փօլ Պրեթ զինք իր ընտրացանկին մէջ  ընդգրկելու համար  նախապայման դրած էր, որ  ճանչնար Հայոց դէմ  գործուած Ցեղասպանութիւնը: Իր օրին, ան դատ  բացած էր  Պրեթի դէմ եւ կորսնցուցած:

Նշենք, թէ դատավարութեան նիստը տեղի ունեցաւ 24  Յունուար  2013-ին, որուն ներկայ  գտնուեցան   Հիլտա  Չոպոյեան, պատմաբան Իվ Թերնոն եւ  Ֆրանսայի Ազգային  Ժողովի  պատգամաւոր՝  Ֆրանսուա Ռոշըլուանը: Իրենց ելոյթներուն  ընթացքին վերոյիշեալ անձնաւորութիւնները  պաշտպանեցին  Լորան Լէյլէկեանի արտայայտած տեսակէտները:

 Դատավարութիւնը  կատարեալ  խայտառակութիւն մը  եղաւ  Սիրմա Օրանի համար:  Դատավարութեան ընթացքին խօսք առնելով, Լէյլէկեան յայտնեց, թէ  Հայոց դէմ գործուած ցեղասպանութիւնը  ուրացողները կը  փորձեն հակամարտութիւնը  քաղաքական  բեմէն  իրաւական  հարթակի վրայ  փոխադրել:  Իր   հաստատումը աւելի  հիմնաւորելու նպատակով,   Լէյլէկեան դիմեց  Ֆրանսայի  Ազգային  Ժողովի անդամ, պատգամաւոր  Ֆրանսուա  Ռոշըլուանին,    Ցեղասպանութեան ուրացութեան դէմ  պայքարող,   հանրածանօթ անձնաւորութիւն՝ Իվ Թերնոնին եւ «Արդարութեան եւ  Ժողովրդավարութեան   Եւրո-Հայկական Դաշնութեան »  նախկին նախագահ Հիլտա Չոպոյեանին, ինչպէս նաեւ   ծանօթ  քաղաքական դէմքերու   վկայութիւններուն:

  Դատավարութեան ընթացքին Օրան   խուսափեցաւ յստակ պատասխանելու  Հայոց Ցեղասպանութեան  իրողութեան: Ան միաժամանակ չկրցաւ   համոզիչ   պատասխան  տալ Գորշ  Գայլերու    կազմակերպութեամբ , Ֆրանսայի մէջ  2006-ին, Հայոց Ցեղասպանութեան յիշատակին  Լիոնի Յուշարձանին  կառուցման դէմ  բողոքի հաւաքին իր մասնակցութեան պատճառներուն:

 Ատեանը յայտարարեց, թէ 28 Փետրուարին պիտի արձակէ իր վճիռը:

Ատեանին  արձակած  վճիռը ցնցած է  համայն ֆրանսահայ   համայնքը: Լէյլէկեանի դէմ ֆրանսական ատեանին արձակած վճիռը  կ’ապացուցէ, թէ  Ֆրանսական  օրէնսդրութեան  մէջ իրաւական բաց մը գոյութիւն  ունի  Հայոց Ցեղասպանութեան  վերաբերեալ : Ֆրանսա  2001-ին   ճանչցաւ  Հայոց Ցեղասպանութիւնը , սակայն  անոր ուրացումը  քրէականացնող օրինագիծը կը սպասէ իր  արդարութեան  վճիռին :

LEAVE A REPLY

Please enter your comment!
Please enter your name here