ՅՈՎՀԱՆՆԷՍԵԱՆ ԱՌԱՋՆԱՀԵՐԹ ՉԻ ՆԿԱՏԵՐ ԱԶԳԱՅԻՆ ԺՈՂՈՎԻ ՔՆՆԱՐԿՈՒՄՆԵՐԸ

0
168

«Ժառանգութիւն» կուսակցութեան  ղեկավար Ռաֆֆի Յովհաննէսեան Ազատութեան հրապարակին վրայ տեղի ունեցած բացօթեայ ասուլիսին ընթացքին անդրադառնալով խորհրդարանին մէջ տեղի ունեցող քննարկումներուն՝ յայտնեց, որ խորհրդարանի խօսնակը իր զրուցակիցը չէ, եւ իր միակ զրուցակիցը գործող նախագահն է, եւ «եթէ ինքն ունի ասելիք, ես նրան կը լսեմ»:
«Արմէնիա Նաու»ի թղթակից Գոհար Աբրահամեան կը գրէ, թէ Յովհաննէսեան յայտնած է, որ «Ժառանգութիւն» խորհրդարանական խմբակցութեան պատգամաւորներուն հետ մնայուն հաղորդակցութեան մէջ է եւ տեղեակ է, թէ ի՛նչ տեղի կ՛ունենայ խորհրդարանին մէջ:
«Հայ ժողովրդի պայքարը ներառում է բոլոր հնարաւոր սահմանադրական ճանապարհները եւ ատեանները: Շատ լաւ է, որ տէ ֆակտօ խորհրդարանում կան գործընթացներ, բայց այդ գործընթացները կապ չունեն իմ՝ որպէս ձեր վստահութիւնը վայելող համաքաղաքացու մօտեցման հետ, ես պատրաստ եմ ողջունել համագործակցութիւնը», յայտարարած է Յովհաննէսեան՝ աւելցնելով, որ եթէ գործող նախագահը ու ընտրութիւններուն, ըստ պաշտօնական տուեալներուն, առաջին դիրքը գրաւած Սերժ Սարգսեանը «համազգային այս յաղթանակը ճանաչելու, այս տագնապը յաղթահարելու առաջարկ ունի», պատրաստ է լսելու անոր, իսկ խորհրդարանի բանակցութիւններուն հետ կապ չունի:
Անդրադառնալով Մայիսին տեղի ունենալիք Երեւանի աւագանիի ընտրութիւններուն մասնակցելու հարցին, որուն առնչութեամբ իշխող կուսակցութիւնը արդէն թեկնածուներ առաջադրած է՝ ներկայ քաղաքապետ Տարօն Մարգարեանի գլխաւորութեամբ, Յովհաննէսեան յայտնեց, որ այս գծով որոշում կու տայ՝ «համազգային այս ճգնաժամը յաղթահարելուց յետոյ»:
«Եթէ չեղաւ այն լուծումը, որը պահանջում է ժողովուրդը, մենք մնացած բոլոր ընտրութիւններին մասնակցելու բովանդակութեան եւ մատուցման որոշումը կը կայացնենք դրանից յետոյ, քաղաք առ քաղաք, գիւղ առ գիւղ, ժողովուրդը վերատիրանալու է իշխանութեանը», յայտնեց Յովհաննէսեան՝ աւելցնելով, որ ընտրութիւններուն արդիւնքները չեղեալ նկատելու համար Սահմանադրական դատարան դիմելու հարցը եւս խորհրդակցական կարգով պիտի քննարկէ այսօր՝ Շաբաթ օր նախատեսուած հանրահաւաքին ընթացքին:

LEAVE A REPLY

Please enter your comment!
Please enter your name here