ՌԷԱԼ ՄԱՏՐԻՏ ԵՒ ՄԱՆՉԵՍԹԸՐ ԵՈՒՆԱՅԹԸՏ ՅԱՂԹԱՆԱԿ ԱՐՁԱՆԱԳՐԵՑԻՆ ԻՐԵՆՑ ՃԱԿԱՏՈՒՄԷՆ ԱՌԱՋ

0
243

 Սպանիոյ ֆութպոլի ախոյեանութեան  26-րդ   հանգրուանի ամենահետաքրքրական    հանդիպումը  տեղի ունեցաւ  մայրաքաղաքի  Սանթիակօ Պեռնպաօ մարզադաշտին մէջ, սպանական  ֆութպոլի երկու հսկաներուն՝  Ռէալ Մատրիտի եւ  Պարչելոնայի միջեւ:  Վերջին հինգ օրերու ընթացքին երկու ոխերիմ  մրցակիցներուն   այս  հանդիպումը   վերջ գտաւ  մայրաքաղաքի կազմին յաղթանակով՝ 2-1:  Քարիմ Պենզամա նշանակեց  Ռէալի եւ մրցումին առաջին կոլը:  Լիոնէլ Մեսի հաւասարեցուց հաշիւը: Այն պահուն երբ կ’ենթադրուէր, թէ  մրցումը պիտի աւարտէր  հաւասարութեամբ,   Սերժիօ  Ռամոս գլխու գեղեցիկ հարուածով հաշիւը վերածեց   2-1-ի:  Պարչելոնայի դէմ  Ռէալի  յաղթանակը,  վերջին հինգ օրերուն ընթացքին երկրորդն էր:

 Պարչելոնայի  եւ աշխարհի լաւագոյն ֆութպոլիտ  Լիոնէլ Մեսի սոյն մրցումին ընթացքին  նշանակեց  իր  39-րդ կոլը: Այս կոլին  շնորհիւ,  Լիոնէլ Մեսի  հաւասարեցաւ  Ալֆրետօ Տի Սթեֆանոյի հաստատած  ցուցանիշին:  Առասպելական  Ալպերթօ Տի Սթեֆանօ՝  Ռէալ – Պարչելոնա  մրցումներուն ընթացքին նշանակած է  18 կոլ:  Մեսի  միաժամանակ, ախոյեանութեան մրցումներու գծով նշանակեց  իր 16-րդ  յաջորդական  կոլը:

26-րդ հանգրուանի մրցումներէն ետք,  Պարչելոնա  13 կէտով  կը գերազանցէ  երրորդ դիրքի վրայ գտնուող Ռէալը:  Պէտք է ըսել, որ մրցումը   ընթացաւ բաւական լարուած մթնոլորտի մէջ:    Ռէալի   համակիրները ռասիստական արտայայտութիւններ ունեցան  գաթալոնացիներու պաշտպան Տանի Ալվեզի հասցէին: Բացի այդ,   Ռէալի մարզիչ Ժոզէ Մուրինիօ  անպատշաճ արտայայտութիւններ ունեցաւ  Ալվէզի հասցէին:   Մրցումը   աւարտելէ ետք, Պարչելոնայի կարգ մը  մարզիկներ   բողոքեցին  իրաւարարին՝ իրենց փենալթի հարուած մը զլացած ըլլալու պատճառով: Վերջինս, մրցումը աւարտած ըլլալով հանդերձ կարմիր  գարթ  բարձրացուց  Պարչելոնայի  բերդապահ  Վալտէզի դէմ:  Ռէալի յաղթանակի  կոլի հեղինակ Սերժիօ Ռամոս մրցումէն ետք, յայտարարեց, թէ  վստահ  չէր, եթէ պատահած էր  փենալթիի դրուագ, սակայն կարեւորը այն էր, որ իրենք յաղթական դուրս եկած էին դաշտէն:  

Գերմանական Պունտեսլիկայի 24-րդ  հանգրուանի մրցումներուն ընթացքին,  Պայէր  Լեվերքուզեն, իր սեփական դաշտին  մէջ   2-1 արդիւնքով   բախտաւոր   յաղթանակ մը արձանագրեց   Շթութկարթի դէմ:  Հիւրերը, շնորհիւ  Վետատ  Իպիշեւիչի կոլին,  մրցումի մինչեւ   82-րդ  վայրկեանը յաջողեցան  յօգուտ իրենց պահել հաշիւը, սակայն   Սթեֆան   Քիսլինկի եւ  Լարս Պենտէրի  դիպուկ հարուածները  յաղթանակ պարգեւեցին տանտէրներուն:  Պայէր Լեվերքուզեն ներկայիս  45 կէտով  կը գրաւէ  ընդհանուր դասաւորման  3-րդ դիրքը:

 Պորուսիա  Տորթմունտ իր սեփական դաշտին մէջ  3-1 արդիւնքով պարտութեան  մատնեց   Հանովըր 96-ը:  Ռոպեր  Լեվանտովսքի (2)  եւ  Եուլիան  Շիփըր  նշանակեցին դաշտի տէրերուն կոլերը:  Տորթմունտ,   46 կէտով կը գրաւէ ընդհանուր դասաւորման   երկրորդ դիրքը:  Ան  14 կէտով  կը  զիջի առաջատար Պայերն  Միւնիխին: 

Անգլիոյ  Փրըմիյէր  Լիկ-ի  28-րդ  հանգրուանի մրցումներուն,  Մանչեսթըր  Եունայթըտ,  Օլտ Թրեֆորտ մարզադաշտին մէջ,  75450  մարզասէրներու ներկայութեան,  4-0 արդիւնքով պարտութեան մատնեց  Նորուիչ  Սիթին:   Օրուան աստղը անկասկած  Եունայթըտի   ճափոնցի  միջնապահ  Սինճի   Քակաուան էր:  Ան  ոչ միայն  հեթ-թրիք (երեք կոլ)  մը նշանակեց   Եունայթըտի շապիկով, այլեւ դարձաւ Փրըմիյէր  Լիկ-ի մէջ   մէկ մրցումի ընթացքին   երեք կոլ նշանակող  ասիացի առաջին ֆութպոլիստը : «Կարմիր Սատանաներ»ու   չորրորդ կոլը նշանակեց Ուէյն Ռունին:  Վերջինս  նշանակեց  ընթացիկ տարեշրջանի 20-րդ կոլը:  Մրցումէն ետք,  Սըր Ալեքս Ֆերկըսըն  յայտնեց, թէ  իր խումբը  լաւ մարզավիճակի մէջ  պիտի  հիւրընկալէ  Ռէալ Մատրիտը:  Մանչեսթըր Եունայթըտ   71 կէտով կը գլխաւորէ ընդհանուր դասաւորումը:

 Լիվըրփուլի կազմը  չորս անպատասխան գնդակ  զետեղեց   Ուիկանի բերդին մէջ: «Կարմիրներ»ը  մրցումին հաշիւը  բացին երկրորդ վայրկեանին,  Սթիուըրտ Տաունինկի միջոցաւ, որմէ ետք  Ուրուկուէյի հաւաքականի յարձակող Լուիս Սուարէզ նշանակեց երեք  յաջորդական  կոլ, ախոյեանութեան գծով նշանակած  կոլերուն  թիւը  բարձրացնելով  21-ի: Ան նաեւ   սկսաւ գլխաւորել Փրըմիյէր Լիկ-ի  գլխաւոր  ռմբարկուներու աղիւսակը, երկու  կոլով գերազնացելով   Ռոպին Վան Փըրսին: : Սոյն յաղթանակէն ետք, Լիվըրփուլ 42 կէտով կը գրաւէ ընդհանուր դասաւորման 7-րդ դիրքը:  Չելսի՝ սենեկալցի  յարձակող  Տեմպա  Պայի նշանակած կոլին  շնորհիւ, 1-0 արդիւնքով պարտութեան մատնեց Ուեսթ Պրոմուիչ Ալպիոնը:  Լոնտոնեան խումբը  52 կէտով  կը գրաւէ ընդհանուր դասաւորման  երրորդ դիրքը:

Ֆրանսայի  ֆութպոլի ախոյեանութեան  27-րդ   հանգրուանի մրցումներուն, Փարի Սէն Ժերմէն 1-0 արդիւնքով   խոնարհեցաւ Ռիմի  համեստ կազմին առջեւ:  Մրցումի 60-րդ վայրկեանին իրաւարաը   դաշտէն հեռացուց  Ռիմի կիսապաշտպան   Քրիսթոֆըր   Գլոմպարը,  սակայն  չորս վայրկեան ետք  Ժեկոժ  Կրիհովիաքի նշանակած կոլը  յաղթանակ   շնորհեց   Ռիմին: Փարի Սէն Ժերմէն ներկայիս  ունի   54  կէտ: Ռիմ,  27  կէտով կը գրաւէ  ընդհանուր դասաւորման  16-րդ դիրքը:

 Իտալիոյ Ֆութպոլի ախոյեանութեան  27-րդ հանգրուանի մրցումներուն,Նափոլի հիւրընկալեց Եուվենթուսը: Հանդիպումը վերջ գտաւ 1-1  հաւասարութեամբ:  Ճիորճիօ Չելինի նշանակեց Եուվէ-ի կոլը: Ա. Կիսախաղի աւարտէն երկու վայրկեան առաջ  Ինլէր հաւասարեցուց  հաշիւը:  Այս հանդիպումէն ետք, Նափոլի  53 կէտով կը գրաւէ ընդհանուր դասաւորման  երկրորդ դիրքը: Եուվենթուս  59  կէտով կը պահպանէ  առաջատարի դիրքը:

ՆՈՎԱՔ ՏԻՈՔՈՎԻՉ  ՇԱՀԵՑԱՒ  ՏՈՒՊԱՅԻ ՄՐՑԱՇԱՐՔԸ

Սերպ Նովաք Տիոքովիչ շահեցաւ  Տուպայի  թենիսի միջազգային մրցաշարքը:   Աւարտական  մրցումին,  25-ամեայ սերպը  7-5, 6-3 արդիւնքով պարտութեան մատնեց  Տոմաշ   Պերդիխը:

ՄԱՐԶԱԿԱՆ ԿԱՐՃ ԼՈՒՐԵՐ

–         Քրիսթիանօ   Ռոնալտոյի   անունը կրող մարզաշապիկներու վաճառքը մրցանիշային ցուցանիշներ հաստատած է  Սանթիակօ Պեռնպաու  մարզադաշտին կից գտնուող Ռէալի պատկանող   հանրախանութիւն մէջ:  Անոր շապիկներուն  վաճառքի ցուցանիշը կարելի է համեմատել միայն  Տէյվիտ Պեքհամի եւ  Զիտանի մարզաշապիկներուն  վաճառքին հետ:

–         ԵՈՒԷՖԱ-ի նախագահ  Միշէլ Փլաթինի յայտարարեց, թէ «Չեմփիընզ Լիկ»-ի մրցաշարքը կը լուսանցքայնացնէ  «Եուրոփա  Լիկ»-ի մրցաշարքը:  Ան խոստացաւ ձեւափոխել եւ բարելաւել «Եուրոփա  Լիկ»-ի մասնակցութեան  պայմանները, որպէսզի աւելի լուրջ    հետաքրքրութիւն ստեղծուի այդ մրցաշարքին շուրջ:

–          Երեքշաբթի օր,  «Չեմփիընզ Լիկ»-ի գծով,  Մանչեսթըր  Եունայթըտ –  Ռէալ Մատրիտ  ճակատումին  տոմսերը սեւ շուկայի վրայ կը խլուին   հազար սթերլին գումարով:  Սովորական տոմսին սակը կ’արժէ   30-էն 52 սթերլին:

LEAVE A REPLY

Please enter your comment!
Please enter your name here