ԱՊԱՀՈՎԱԿԱՆ ԿԱՅՈՒՆՈՒԹԻՒՆԸ ԿԸ ՄՆԱՅ ԻՇԽԱՆՈՒԹԻՒՆՆԵՐՈՒՆ ՀԻՄՆԱԿԱՆ ՄՏԱՀՈԳՈՒԹԻՒՆԸ

0
158

Հանրապետութեան նախագահ Միշէլ Սըլէյման իր այցելուներուն առջեւ վեր առաւ  երկրին անվտանգութիւնը  ամրապնդելու  ուղղութեամբ ապահովական կառոյցներու՝ յատկապէս լիբանանեան  բանակին դերակատարութիւնը:  Նախագահ Սըլէյման Պաապտայի  պալատին մէջ ընդունեց արտաքին գործոց նախարար Ատնան Մանսուրը, նախկին  երեսփոխան  Նատէր Սըքարը, Լիբանանի մօտ Քաթարի դեսպան Սաատ  Մըհենետին: Վերջինս  հանրապետութեան  նախագահին տեղեկութիւններ  փոխանցեց  Տոհայի մէջ 26 Մարտին  տեղի ունենալիք արաբական  գերաստիճանին  նախապատրաստութիուններուն  վերաբերալ:  Սըլէյման նաեւ ընդունեց Լիբանանի մօտ Մեքսիքոյի դեսպան Խորխէ   Ալվարէզ   ֆոնթէսը,  Մուսթաքպալ հոսանքի   ընդհանուր քարտուղար Ահմէտ Հարիրին եւ այլ այցելուներ:

Վարչապետարանին մէջ, վարչապետ Նեժիպ Միքաթի ստացաւ Լիբանանի համար կազմուած միջազգային ատեանին տարեկան տեղեկագիրը: Միքաթի ընդունեց  կրթութեան նախարար   Հասան Տիապը, լիբանանեան համալսարանի  նախագահ   Ատնան   Սէյտ   Հիւսէնի ընկերակցութեամբ:

Խորհրդարանի նախագահ Նեպիհ Պըրրի   Այն  Էլ Թինէյի մէջ ընդունեց Լիբանանի մօտ  Միացեալ Նահանգներու դեսպան Մոյրա Քոնելին:  Հանդիպումէմ ետք, դեսպանը վեր առաւ  երկրին սահմանադրական  կառոյցները պահպանելու լիբանանեան  իշխանութիւններու բանեցուցած   ճիգերը:  Քոնելի դիտել  տուաւ, թէ ընտրական   օրինագիծի ուշացումը  չի նշանակեր    փոփոխութեան ենթարկել ընտրութիւններու թուականը:

Իր կարգին,  Պըրրի բաւական վտանգաւոր եւ  մտահոգիչ նկատեց    երկրին ապահովական  վիճակը:  Ան   զգուշացուց, որ այն  փոշին, զորս ոմանք  գարնանային  կ’անուանեն, կրնայ   փոթորիկի վերածուիլ եթէ լիբանանեան քաղաքական  հոսանքները  չցուցաբերեն գիտակցութիւն:  Պըրրի  մերժեց խօսիլ  ընտրական գործընթացին մասին, դիտել տալով, որ ընտրութիւն կայացնելու համար անհրաժեշտ է պահպանել Լիբանանը:  Պըրրի ըսաւ, թէ խորհրդարանը  ընդհանուր նիստի պիտի հրաւիրէ յառաջիկայ օրերուն:

Ներքին գործոց նախարար  Մարուան Շերպէլ  կնքեց մամլոյ ասուլիս մը եւ   յայտարարեց լիբանանեան տարբեր   գիւղաքաղաքներու մէջ տեղի ունեցած  քաղաքապետական եւ  թաղապետական ընտրութիւններուն  պաշտօնական արդիւքները:  Նախարարը դիտել տուաւ, որ   ապահովական կայունութիւնը  հիմնական խթանն է   խորհրդարանական ընտրութիւններ կայացնելու եւ համաձայնութիւն գոյացնելու  ընտրական  օրինագիծի շուրջ:  Նախարարը  ըսաւ, թէ  շէյխ Ահմէտ Ասիրին  արգիլուած է կազմակերպել  հոծ հաւաքներ:  

Ընկերվար  Յառաջդիմական Կուսակցութեան պետ Ուալիտ Ճոմպլաթ քննադատեց  ապահովական  գետնի վրայ  անիշխանականութիւն ստեղծելու շարժումները: Ճոմպլաթ  մերժեց Դիմադրութիւնը  շահագործելու կամ   անոր դերակատաութիւնը սահմանափակելու  ոմանց փորձերը:  

Մարոնի  եպիսկոպոսներու խորհուրդը  գարտինալ Պշարա  Ռայի գլխաւորութեամբ  գումարեցին նիստ մը եւ  քննարկեց    երկրին ապահովական իրավիճակը:  Նիստէն ետք լոյս  ընծայուած  հաղորդագրութեան մէջ,  մարոնի եպիսկոպոսները  շեշտեցին   որ   1960-ի ընտրական  օրինագիծը  հարուած մը պիտի   ըլլայ  համակեցութեան ճիգերուն:  Անոնք պահանջեցին  ընտրութիւնները կայացնել  ճշդուած  ժամանակացոյցին եւ  մաղթեցին  մշակել   ներկայացուցչութիւնը առաւելագոյնս  երաշխաւորող  օրինագիծ մը:  Նիստը աւարտելէ ետք, Պշարա Ռայի գարտինալը   մեկնեցաւ Հռոմ, մասնակցելու նոր Պապի  ընտրութեան:

 Պետական պաշտօնեաներու եւ ուսուցիչներու աշխատավարձի  յաւելումները հետապնդող  Աշխատաւորական  Սենտիքայական  Համակարգումի  Խորհուրդը  սկզբունքով վաղը՝ Երեքշաբթի առաւօտեան ժամը  տասին  նստացոյց մը պիտի կազմակերպէ   Պաապտայի նախագահական պալատին առջեւ:

LEAVE A REPLY

Please enter your comment!
Please enter your name here