ՊԱՔՈՒ ՅՈՒՍԱԽԱԲ՝ ԻՐԱՆ ՉԻ ՄԻԱՆԱՐ ՀԱՅԱՍՏԱՆԻ ԴԷՄ ՇՐՋԱՓԱԿՈՒՄԻՆ

0
126

Ատրպէյճանի փոխվարչապետ Ալի Հասանով Պաքուի մէջ համագումարի մը մասնակից թուրք լրագրողներու հարցումներուն պատասխանելով՝ Հայաստանի դէմ խիստ արտայայտութիւններ ունեցաւ ու մեղադրեց նաեւ Իրանը, որ Հայաստանին պաշտպան կը կանգնի ու կը խանգարէ Անգարայի կողմէ եւս Հայաստանի դէմ գործադրուող շրջափակումը։ «Եթէ Իրան մէկ օր առեւտուր չընէ Հայաստանի հետ, Հայաստանը սովահար կը մեռնի», ըսաւ Հասանով։
Հասանով դժգոհ է այն բանէն, որ Իրան դէմ եկած է Անգարայի եւ Պաքուի կողմէ Հայաստանի դէմ գործադրուող շրջափակման։ Ատրպէյճան այն համոզումն ունի, որ Հայաստան ծունկի պիտի գայ միայն տնտեսական շրջափակման դիմաց, իսկ Իրանը կը խանգարէ այդ ծրագիրը։ Ըստ Հասանովի՝ Ատրպէյճան միշտ սեղանի վրայ կը պահէ զինուորական միջամտութեան տարբերակը, բայց այս պահուն, Ատրպէյճան կը նախընտրէ բարելաւել քարիւղի ու բնական կազի իր եկամուտները:
Ան աւելցուց, թէ Իրանի մէջ աւելի քան 20 միլիոն ատրպէյճանցիներ կան, եւ մտահոգութիւն յայտնեց, թէ Իրան Ատրպէյճանի հողամասերուն վրայ կրնայ գրգռութիւններ յառաջացնել՝ շահագործելով շիիները։
Հասանով գովասանքով խօսեցաւ Թուրքիոյ մասին՝ յիշեցնելով, որ վարչապետ Էրտողան միշտ ըսած է, թէ Հայաստանի սահմանը պիտի չբացուի, մինչեւ որ վերջ չդրուի «Ղարաբաղի բռնագրաւման»։
Հասանովի յայտարարութեան ամէնէն հետաքրքրական մասը կը վերաբերի պատերազմի տարբերակին։ Փոխվարչապետը ըսաւ, որ եթէ Ատրպէյճան Ղարաբաղի մէջ զինուորական միջամտութիւն մը ընէ, իր դիմացը պիտի գտնէ ոչ թէ Հայաստանը, այլ՝ Ռուսիան, եւ այդ պատճառաւ պէտք է լաւ մտածել նման որոշումէ մը առաջ:
«Հայաստա՞նն էր, որ բռնագրաւեց մեր հողերը։ Ո՛չ։ Հայաստանի ուժը կը բաւէ՞ այսպիսի բանի մը։ Այդ հողերը, որոնք իմ ալ ծննդավայրս են, գրաւուեցան ռուսերու զօրակցութեամբ։ Ես աչքերովս տեսայ, որ ռուս զինուորը հրասայլէն դուրս ելաւ ու հայ զինուորին հետ շամփայն խմեց», ըսաւ Հասանով։
Հասանով պաշտպանեց այն կարծիքը, թէ Ղարաբաղի լուծումը կախեալ է Միացեալ Նահանգներէն, բայց աւելցուց, թէ Ուաշինկթըն չի ցանկար Ռուսիան նեղացնել այս հարցով:

 

LEAVE A REPLY

Please enter your comment!
Please enter your name here