ՓԱՐԻԶԻ ՄԷՋ, ՆԱԼՊԱՆՏԵԱՆ – ԵԱՀԿ ՄԻՆՍՔԻ ԽՈՒՄԲԻ ՀԱՄԱՆԱԽԱԳԱՀՆԵՐՈՒ ՀԱՆԴԻՊՈՒՄ

0
154

 Հայաստանի արտաքին գործոց նախարար Էտուարտ Նալպանտեան Փարիզի մէջ հանդիպում մը  ունեցաւ ԵԱՀԿ Մինսքի խմբակի համանախագահներ Իկոր Փոփովի (Ռուսիա), Ժագ Ֆորի (Ֆրանսա) եւ Իան Քելիի (Միացեալ Նահանգներ) հետ, ինչպէս նաեւ ԵԱՀԿ-ի գործող նախագահի անձնական ներկայացուցիչ, դեսպան Անճէյ Քասփըրչիքի հետ։
Արտաքին գործոց նախարարութեան մամլոյ ծառայութեան կողմէ փոխանցուած լուրերուն համաձայն, քննարկուած են արցախեան հիմնախնդիրի կարգաւորման գործընթացին առնչուող հարցեր: Անդրադարձ կատարուած է վստահութեան ամրապնդման վերաբերող միջոցներուն առնչութեամբ եռանախագահներուն կողմէ նախորդ հանդիպումին ներկայացուած առաջարկներուն:
Համաձայնութիւն կայացած է յառաջիկային համանախագահներուն տարածաշրջան կատարելիք այցելութեան մասին:
Էտուարտ Նալպանտեան համանախագահներուն ուշադրութեան յանձնած է, որ Փարիզի մէջ կայացած Հայաստանի եւ Ատրպէյճանի արտաքին գործոց նախարարներուն եւ համանախագահներուն միջեւ կայացած նախորդ երկու հանդիպումներուն ընթացքին որդեգրուած մամլոյ հաղորդագրութիւնները ատրպէյճանական կողմը ոչ միայն չհրապարակեց, այլեւ արդէն բնորոշ դարձած իր ոճով, ներկայացուց քննարկուած հարցերուն հետ առնչութիւն չունեցող հաղորդագրութիւններ: Արդէն աւանդութիւն դարձած է, որ ատրպէյճանական կողմը մերժէ եռանախագահներուն կողմէ ներկայացուած առաջարկները, իսկ աւելի ուշ մտահոգութիւն յայտնէ բանակցային գործընթացին վերաբերեալ:
Արտաքին գործոց նախարարը վերահաստատած է, որ Հայաստան համանախագահներուն հետ պիտի շարունակէ ջանքերը՝ Լեռնային Ղարաբաղի հիմնախնդիրի բացառապէս խաղաղ կարգաւորման նպատակով:
Նշենք, որ 2 Մարտին, համանախագահները առանձին հանդիպում մը ունեցած էին Ատրպէյճանի արտաքին գործերու նախարար Էլմար Մամետիարովի հետ:
Համանախագահները այս հանդիպումներէն ետք հրապարակած են յայտարարութիւն մը, ուր տեղեկացուցած են յառաջիկային տարածաշրջան այցելելու կապակցութեամբ կողմերու միջեւ կայացած պայմանաւորուածութեան մասին:

 

LEAVE A REPLY

Please enter your comment!
Please enter your name here