Ամփոփուեցան «Հայապահպանութեան գործին մէջ նշանակալի աւանդի համար» ամէնամեայ մրցանակաբաշխութեան 2012թ. Արդիւնքները

0
113

 Մարտ 5-ն կայացաւ ՀՀ սփիւռքի նախարարութեան, Համաշխարհային հայկական գոնկրէսի եւ Ռուսաստանի հայերու միութեան կողմէ համատեղ իրականացուող «Հայապահպանութեան գործին մէջ նշանակալի աւանդի համար» ամէնամեայ մրցանակաբաշխութեան 2012թ արդիւնքներու ամփոփումը: Մրցանակաբաշխութիւնը տեղի կ’ունենայ 2010 թուականէն ի վեր:

«Հայապահպանութեան գործին մէջ նշանակալի աւանդի համար» մրցանակաբաշխութեան ծիրէն ներս 2012թ իրականացուած է «Հայկական կրթօճախ», «Մայրենիի պաշտպան», «Հայկական լրատուամիջոց» անուանակարգերով, ինչպէս նաեւ «Ցեղասպանութեան 100-ամեայ տարելիցը» շարադրութիւններու, ուսանողական հետազօտութիւններու մրցոյթները: Մրցոյթին մասնակցած է 144 սփիւռքահայ անհատ եւ Սփիւռքի հայկական կազմակերպութիւն, որմէ 121-ը արժանացած է մրցանակի: 

Միջոցառման մասնակիցներուն իր օրհնանքը բերաւ Մայր Աթոռ Սուրբ Էջմիածնի միաբան, Քրիստոնէական դաստիարակութեան կեդրոնի տնօրէն Վարդան աբեղայ Նաւասարդեան. «Աստծուց օրհնութիւն խնդրենք այս ծրագրի նախաձեռնողներին եւ մրցոյթի մասնակիցներին հայապահպանութեանն ուղղուած ջանքերի եւ հայրենանուէր գործունէութեան համար»: 

Ողջունելով եւ շնորհաւորելով մրցանակաբաշխութեան մասնակիցներուն` նախարար Հրանոյշ Յակոբեան նշեց. «Այսօր յաղթել են բոլոր մասնակիցները, յաղթել են, որովհետեւ դժուարին պայմաններում իրենց ժամանակը նուիրաբերել են եւ ջանք չեն խնայել տարբեր մշակոյթներ կրող երկրներում պահպանել հայոց լեզուն ու մշակոյթը եւ դրանով կառչած մնալ իրենց արմատներին, քանի որ հայրենիքից դուրս ապրողի համար այսօր ամենահզօր թշնամին ուծացումն է»: 

Միջոցառման ողջոյնի խօսքով հանդէս եկան նաեւ Համաշխարհային հայկական քոնկրէսի առաջին փոխնախագահ Արամ Սարգսեան եւ Ռուսաստանի հայերու միութեան  փոխնախագահ Վլատիմիր Աղայեան, որոնք, շնորհակալութիւն յայտնելով ՀՀ սփիւռքի նախարարութեան արդիւնաւէտ համագործակցութեան համար, նշեցին, որ իւրայատուկ կամուրջ  ձեւաւորուած է ՀՀ սփիւռքի նախարարութեան, Համաշխարհային հայկական քոնկրէսի եւ Ռուսաստանի հայերու միութեան միջեւ: Համահայկական կառոյցներու հետ համագործակցութեամբ մրցանակաբաշխութիւնը  շարունակական բնոյթ պիտի կրէ եւ պիտի ընդլայնուին հայապահպանութեան ուղղուած համատեղ ծրագիրներ: 

Մրցանակակիրներուն յանձնուեցան 1-ին, 2-րդ, եւ 3-րդ կարգի տիպլոմներ, դրամական եւ խրախուսական պարգեւներ: Մրցոյթէն ստացած դրամական պարգեւը Նիտըրլանտներու Սուրբ Գրիգոր Լուսաւորիչ Հայ Առաքելական եկեղեցւոյ դպրոցը տրամադրեց սուրիահայ ուսանող Վանէս Աղճոյի ուսման վարձավճարի փոխհատուցման, իսկ «Դոնի Նախիջեւան» թերթի խմբագրութիւնը գումարը փոխանցեց Արագածոտնի մարզի Արագած գիւղի դպրոցին: 

Ձեռնարկին ներկայ էր 40-է աւելի սփիւռքահայ մրցանակակիր եւ անոնց ներկայացուցիչները, որոնք իրենց երախտագիտութիւնը յայտնեցին մրցանակաբաշխութեան կազմակերպիչներուն իրենց գործունէութիւնը բարձր գնահատելու համար:

Նշուեցաւ  նաեւ, որ 2013թ «Հայապահպանութեան գործին մէջ նշանակալի աւանդի համար» մրցանակաբաշխութեան ծիրէն ներս պիտի իրականացուին «Հայրենիք քեզ այսպիսին եմ տեսնում» մանկական ստեղծագործութիւններու, «Մայր իմ անուշ ու անգին» շարադրութիւններու, ինչպէս նաեւ «Երիտասարդական/ուսանողական կազմակերպութիւն», «Մայրենիի պաշտպան», «Համայնքային կառոյց» անուանակարգերու  մրցոյթներ:

 

LEAVE A REPLY

Please enter your comment!
Please enter your name here