Խորհրդարանական Մեծամասնութիւնը Կտրականապէս Կը Մերժէ 1960-ի Ընտրական Օրէնքը Վերակենդանացնելու Փորձերը

0
130

Խորհրդարանական մեծամասնութիւնը ներկայացնող քաղաքական ուժերը ներկայացնող երեսփոխաններ` Հայկական երեսփոխանական պլոքի ներկայացուցիչ, երեսփոխան Յակոբ Բագրատունի, Իպրահիմ Քանաան, Նաժի Ղարիոս, Ալեն Աուն, Ըսթֆեն Տուէյհի, Այուպ Հըմայէտ, Հասան Ֆատլալլա, Ալի Պեզզի, Նաուար Սահիլի, Սիմոն Ապի Ռամիա, Ալի Ֆայեատ, Հիքմաթ Տիպ, Նաուաֆ Մուսաուի, Հանի Քպայսի եւ Ալի Ամմար, երէկ հանդիպում մը ունեցան:

Հանդիպումին ընթացքին ներկաները խստիւ դատապարտեցին հանրապետութեան նախագահ զօր. Միշել Սըլէյմանի եւ վարչապետ Նեժիպ Միքաթիի կողմէ ընտրական յանձնախումբերը կազմելու շրջաբերականին ստորագրութիւնը` զայն նկատելով իր մահկանացուն կնքած 1960-ի ընտրական օրէնքը վերակենդանացնելու փորձ մը:

Նիստէն բխած հաղորդագրութիւնը կարդացուեցաւ երեսփոխան Իպրահիմ Քանաանի կողմէ:

Քանաան նշեց, որ երկրին գործադիր իշխանութեան կողմէ յանձնախումբերը կազմելու շրջաբերականին ստորագրութիւնը սեւ օր է Լիբանանի համար, որովհետեւ այդ իշխանութիւնը օրինազանցութիւն մը կատարած է` շրջանցելով ազգային կամքը, յատկապէս քրիստոնէական կամքը, որ կտրականապէս կը մերժէ 1960-ի ընտրական օրէնքը:

Քանաան հաստատեց, որ այդ օրէնքը միայն մէկ անգամուան համար գործադրելի է:

Խորհրդարանական մեծամասնութեան կեցուածքը յայտարարելէ ետք, երեսփոխաններ Իպրահիմ Քանաան, Ալի Պեզզի եւ Ալի Ամմար ուղղուեցան Այն Թինէ, ուր անոնք հանդիպում մը ունեցան խորհրդարանի նախագահ Նեպիհ Պըրրիի հետ:

Հանդիպումէն ետք Քանաան յայտնեց, որ խորհրդարանի նախագահը քաջատեղեակ է արձանագրուած այս քայլին վտանգին եւ երկրին ընդհանուր կացութեան առթած վտանգին մասին:

Ան աւելցուց սակայն, որ Պըրրի յանձնառու է պահպանելու Լիբանանի ժողովրդավարութիւնը, խորհրդարանական վարչակարգն ու լիբանանցիներուն ազգային կամքը:

ՆՇԵՆՔ, որ Պըրրի ընդունեց նաեւ խորհրդարանի նախկին փոխնախագահ Էլի Ֆըրզլին, որ յայտնեց, թէ յանձնախումբերը կազմելու շրջաբերականին ստորագրութիւնը լիբանանեան ազգային կամքի միասնականութեան հետ կը հակադրուի: Ֆըրզլի շեշտեց, որ այդ քայլը հակասահմանադրական է:

 

LEAVE A REPLY

Please enter your comment!
Please enter your name here