ՀԱԼԷՊ ԴԱՐՁԵԱԼ ԱՌԱՆՑ ԵԼԵԿՏՐԱԿԱՆՈՒԹԵԱՆ

0
155

 Հալէպի մէջ վերջին շաբթուան ընթացքին ելեկտրականութիւնը գրեթէ ամբողջութեամբ ընդհատուած է։ Այս տեղեկութիւնը «Արմէնփրէս»ին փոխանցած է Բերիոյ թեմի ազգային առաջնորդարանի բանբեր Ժիրայր Ռէյիսեանը։
Շարունակուող բախումներուն մասին Ռէյիսեան յայտնած է, որ հայկական թաղամասերուն մէջ թէեւ բախումներ չկան, սակայն ռումբերուն ձայները մնայուն կերպով լսելի են: Քաղաքի Աշրաֆիէ կոչուող թաղամասը, որ ժամանակին հայաշատ, նաեւ մարդաշատ եւ աշխոյժ թաղամաս կը նկատուէր, այժմ ամայացած է եւ բուռն բախումներու թատերաբեմ դարձած է: Բնակիչներուն մեծամասնութիւնը հեռացած է շրջանէն:
Անդրադառնալով Պէյրութ տանող ճամբուն վրայ առեւանգուած Նազարէթ Սապունճեանի եւ նախապէս առեւանգուած հայ հոգեւորականին պարագաներուն՝ բանբերը նշած է, որ անոնց մասին տակաւին տեղեկութիւններ չկան, սակայն զանոնք փրկելու աշխատանքները կը շարունակուին:
Սուրիական ՍԱՆԱ լրատու գործակալութիւնը յայտնած է, որ բախումները կը շարունակուին Հալէպի որոշ թաղամասերու մէջ: Մասնաւորապէս Մասաքին Հանանու թաղամասին մէջ գտնուող ոստիկանական բաժանմունքի, մշակոյթի կեդրոնի, նամակատան մօտ, ինչպէս նաեւ Պուսթան ալ Քասր եւ Քալլասա թաղամասերուն մէջ մեծ թիւով զինեալներ սպաննուած են եւ ոչնչացուած են անոնց զէնքերը։
Սուրիական պատերազմական կացութեան լոյսին տակ հայութեան իրավիճակին մասին խօսելով՝ Ժ. Ռէյիսեան դիտել տուած է, որ Հալէպահայ շտապ օգնութեան մարմինին տեղեկութիւններուն համաձայն, Հալէպի մէջ շուրջ մէկ տարուան ընթացքին 90 հալէպահայ առեւանգուած է: Բարեբախտաբար անոնց մեծամասնութիւնը ազատ արձակուած է՝ փրկագինի փոխարէն։  Բախումներու պատճառով վիրաւորուած հալէպահայերու թիւը 87 է, իսկ զոհերուն թիւը  տակաւին չէ ճշդուած: Հաստատ է, որ այդ թիւը մօտ է չորս տասնեակին: Երկու զինուորական ծառայողներ՝ Խաժակ Աբէլեանը եւ Ղազար Կարապետեանը անյայտ կորսուած կը նկատուին մինչեւ օրս: Շտապ օգնութեան մարմինին կողմէ շուրջ 3500 օգնութեան ծրարներ յատկացուած են հալէպահայ ընտանիքներուն: Մէկ տարուան ընթացքին Հալէպի մէջ ստեղծուած ծանր իրավիճակին լոյսին տակ մօտ 12-13 հազար հայեր հեռացած են քաղաքէն:

 

LEAVE A REPLY

Please enter your comment!
Please enter your name here