«ՉԵՄՓԻԸՆԶ ԼԻԿ» – ԹՈՒՐՔ ԻՐԱՒԱՐԱՐԻՆ ԱՆԱՐԴԱՐԱՆԱԼԻ ՈՐՈՇՈՒՄԸ ՓՃԱՑՈՒՑ ԵՈՒՆԱՅԹԸՏ – ՌԷԱԼ ՄՐՑՈՒՄԸ

0
149

Եւրոպայի Ախոյեան Ակումբներու Ախոյեանութեան «ՉեմփինզԼիկ» մրցաշարքի նոք –աութ հանգրուանի ամենասպասուած   հանդիպումը իրաւարարին անարդարանալի մէկ որոշումին հետեւանքով  փճացաւ:  Թուրք իրաւարարը իրաւունք չունէր  կարմիր  քարթով  դաշտէն հեռացնելու   Մանչեսթըր Եունայթըտի կիսապաշտպան Նանին:  Ճակատագրական այսօրինակ   մրցումի մը ընթացքին, իրաւարարին  թոյլ տուած անպատասխանատու արարքը իր անմիջական  ազդեցութիւնը ունեցաւ մրցումին ընթացքին վրայ: Բայց բոլորէն աւելի, մեծագոյն  տուժողը եղաւ ֆութպոլը:

Արդարեւ, երթի հանգրուանի մրցումը  Սպանիոյ մայրաքաղաքին մէջ  1-1  հաւասարութեամբ աւարտելէ ետք,   միլիոնաւոր ֆութպոլասէներու ուշադրութիւնը   կեդրոնացած էր   Օլտ Թրեֆորտ մարզադաշտին  մէջ  «Չեմփիընզ Լիկ» մրցաշարքի գծով տեղի ունենալիք Մանչեսթըր Եունայթըտ –  Ռէալ Մատրիտ  դարձի  ճակատումին: 74959 մարզասէրներու  ներկայութեան, թուրք իրաւարարը  ժամը 21.45-ին տուաւ  մրցումին ազդանշանը: Պէտք է ըսել, որ  զոյգ խումբերը լաւ պատրաստուած էին  խաղին: Առաջին իսկ սուլիչէն, անոնք  սկսան կիրարկել մաքուր եւ   բարձր մակարդակի ֆութպոլ: Մրցումին առաջին կիսախաղը   0-0  աւարտելէ ետք,  երկրորդ կիսախաղին, Ռէալ Մատրիտ տեղի տուաւ  «Կարմիր Սատանաներ»ու յարձակումներուն եւ  48-րդ վայրկեանին Սերժիօ Ռամոս  սեփական  բերդէն ներս   ուղեց  գնդակը՝  Մանչեսթըր Եունայթըտին  շնորհելով արդար առաւելութիւն մը: Մատրիտի մէջ կայացած  մրցումը  1-1 հաւասարութեամբ  աւարտած ըլլալով, կը թուէր, թէ  Սըր Ալեքս Ֆերկըսնի կազմը գտած էր  քառորդ աւարտական հանգրուան հասնելու բանալին: Սակայն  թուրք իրաարարը այլ  հաշիւներ ունէր մտքին մէջ: Հանդիպման 56-րդ վայրկեանին,  Եունայթըտի յետսապահ  Ռաֆայէլին կողմէ  Նանիին հասցէագրուած գնդակին վրայ  Ռէալի յետսապահ  Արպէոլայի վիճելի միջամտութիւնը պատճառ  դարձաւ, որ  իրաւարարը առանց որեւէ  նախազգուշացումի, անմիջապէս կարմիր  տոմս մը  բարձրացնէ   Նանիի դէմ:  Անսպասելի այս որոշումը  յեղաշրջեց մրցումին ընթացքը:   Լուքա Մոտրիչի եւ Քրիսթիանօ Ռոնալտոյի կոլերը,  ընդամէնը երեք վայրկեաններու մէջ հաւասարեցուցին, ապա՝ առաւելութիւն  շնորհեցին Ռէալին:  Մրցումը  վերջ գտաւ Ռէալի յաղթանակով՝  2-1: Երկու   հանգրուաններու վրայ՝ 3-2:

Մրցումէն ետք,  Եունայթըտի   օգնական մարզիչ  Մայք  Ֆիլըն  լրագրողներուն յայտնեց, թէ Սըր Ալքես Ֆերկիըսն  « մթնլորտին մէջ  չէ» մեկնաբանաելու թուրք իրաւարարին արարքը:

Ռէալ Մատրիտի  մարզիչ Ժոզէ Մուրինիօ խոստովանեցաւ, թէ իր կազմը արժանի չէր հասնելու  քառորդ աւարտականի  հանգրուան.« Անկախ իրաւարարին որոշումէն, լաւագոյն խումբը պարտուեցաւ:  Տաւիտ Տը Խէա  Մատրիտի մէջ կայացած երթի  հանդիպումին հերոսն էր, իսկ  Տիէկօ Լոփէզ դարձաւ դարձի մրցումին հերոսը:  Մենք  արժանի չէինք  յաղթանակի, սակայն ֆութպոլը յաճախ այսպիսի  վախճան կ’ունենայ »  ըսաւ  Մուրինիօ:  Իր կարգին Քրիսթիանօ Ռոնալտօ խոստովանեցաւ, թէ   Եունայթըտի դէմ զոյգ մրցումները  բաւական յուզիչ   եղած են  իրեն համար:

 «Չեմփիընզ Լիկ»ի   գծով օրուան երկրորդ մրցումին,   Պորուսիա Տորթմունտ 3-0 արդիւնքով տպաւորիչ  յաղթանակ մը արձանագրեց  Տոնեցքի Շախտիորին դէմ:  Ուսեթֆալենսթատիոն  մարզադաշտին մէջ,  80 հազար մարզասէրներու ներկայութեան,  Ֆելիփէ Սանթանա, Մարիօ Կէոց եւ  Եաքոպ  Պլազյքովսքի  երեք անպատասխան գնդակ զետեղեցին   ուքրանական  խումբին բերդին մէջ (կիսախաղ՝ 2-0):

 ՎԱՂԸ՝  ԵՈՒՐՈՓԱ  ԲԱԺԱԿԻ 1/16-ՐԴ  ՀԱՆԳՐՈՒԱՆԻ ԵՐԹԻ ՄՐՑՈՒՄՆԵՐԸ

Վաղը՝  Հինգշաբթի, 7  Մարտ  2013,  տեղի պիտի ունենան ԵՈՒՐՈՓԱ  ԳԱՓ մրցաշարքի  1/16-րդ  հանգրուանի երթի մրցումները: Ստորեւ մրցումներուն յայտագիրը:

Անժի Մախալա – Նիուքասլ Եունայթըտ  ժամը՝  19.00

  Սթէուա  Պուքարսեթ –  Չելսի ժամը՝  20.00

 Փլզէն –  Ֆեներպահչէ ժամը՝  20.00

 Շթութկարթ –  Լացիօ Ռոմա  ժամը՝  20.00

 Պալ –  Զենիթ  ժամը՝  22.05

 Պենֆիքա –Պորտօ  ժամը՝  22.05

 Լեվանթէ –  Ռուպին Քազան  ժամը՝  22.05

Թոթենհամ – Ինթէր Միլան ժամը՝ 22.05

LEAVE A REPLY

Please enter your comment!
Please enter your name here