ՊԸՐՐԻ ԴԺԳՈՀ՝ ԸՆՏՐԱԿԱՆ ՅԱՆՁՆԱԽՈՒՄԲԵՐՈՒ ԿԱԶՄՈՒԹԵԱՆ ՀՐԱՒԷՐԷՆ

0
122

Հանրապետութեան նախագահ  Միշէլ Սըլէյման  Պաապտայի  պալատին մէջ ընդունեց պաշտպանութեան նախարար Ֆայէզ  Ղոսնը եւ անոր հետ  քննարկեց երկրին ապահովական իրավիճակը:   Սըլէյման  նաեւ ընդունեց  նախկին նախարար  Քարիմ Բագրատունին, նախկին երեսփոխան  Ճիհատ Սամատը եւ այլ անձնաւորութիւններ:

Խորհրդարանի նախագահ Նեպիհ Պըրրի իր  դժգոհութիւնը յայտնեց  նախագահին եւ վարչապետին կողմէ   ընտրական յանձնախումբերու  կազմութեան  հրաւէրին առնչութեամբ:  Ան դիտել տուաւ, որ   1960-ի ընտրական  օրինագիծը անիրագործելի պիտի  ըլլայ յետ այսու: Ան նաեւ  յայտնեց, թէ առ այսօր,   Ուղղափառ Հանդիպումէն  բխած օրինագիծը  միակն  է, որ  կը  գտնուի  օրինական  հիմքերու վրայ:  Ան   նշեց, թէ ցարդ կը սպասէ համախոհական օրինագիծի մը   ծնունդին:  Նշենք, թէ խորհրդարանի նախագահը հանդիպում մը պիտի ունենայ   Ընկերվար   Յառաջդիմական Կուսակցութեան պետ Ուալիտ Ճոմպլաթի հետ եւ պիտի  քննարկէ  ընտրական գործընթացը:

 Վարչապետ Նեժիպ Միքաթի վարչապետարանին մէջ ընդունեց Լիբանանի մօտ Բրիտանիոյ դեսպան Թոմ Ֆլեչըրը: Դեսպանը  գնահատեց  շրջանային զարգացումներու հանդէպ լիբանանեան կռավարութեան որդեգրած չէզոք  կեցուածքը:

Բանակի ընդհանուր հրամանատար զօրավար Ժան Քահուաճի Եարզէի իր  գրասենեակին մէջ ընդունեց  երեսփոխաններ  Հանրի Հելուն, Ֆուատ Սատը եւ Անթուան Սաատը եւ անոնց հետ  քննարկեց  երկրին վերջին զարգացումները:

Ապահովական գետնի վրայ, զինուորական ատեանը երէկ  հարցաքննութեան ենթարկեց Մահէր Միքտատը: Հարցաքննութեան յաջորդ նիստը տեղի պիտի ունենայ  24 Մայիսին: Այլ գետնի վրայ, ապահովական  մարմիններ  Պէյրութի միջազգային օդակայանին մէջ  ձերբակալեցին Խալէտ  Հաժ Տիպը: Վերջինս  Ֆաթհ Իսլամի ղեկավարներէն Ահմէտ Հաժ Տիպի եղբայրն է:

LEAVE A REPLY

Please enter your comment!
Please enter your name here