ՔԵՐՐԻ՝ ՍՈՒՐԻՈՅ ՀԱԿԱՄԱՐՏՈՒԹԵԱՆ ԼՈՒԾՈՒՄԸ ԺԸՆԵՒԻ ՀԱՂՈՐԴԱԳՐՈՒԹՒԻՆՆ Է

0
132

Միացեալ Նահանգներու արտաքին գործոց նախարար Ճոն Քերրի երէկ յայտարարեց, որ Սուրիոյ մէջ ընդդիմութեան եւ վարչակարգին համար լուծումը Ժընեւի հաղորդագրութիւնն է:

Միացեալ Նահանգներու իր պաշտօնակից Ճոն Քերիիի հետ տուած միացեալ մամլոյ ասուլիսին ընթացքին յայտնեց. «Սէուտական Արաբիա եւ Միացեալ Նահանգներ կը դատապարտեն կարգ մը երկիրներու կողմէ Սուրիոյ վարչակարգին զէնքի մատակարարումը»՝ աւելցնելով, որ «ինքնապաշտպանութիւնը սուրիացի ժողովուրդին արդար իրաւունքն է»: Ֆայսալ իշխանը ըսաւ, որ այն, ինչ Սուրիոյ մէջ տեղի կ՛ունենայ՝ «ջարդ մըն է, որ պէտք է անպայման դադրի»:
Ակնարկելով ընդդիմութիւնը զինելու հարցին՝ Քերրի նշեց, որ «գոյութիւն չունի որեւէ երաշխիք, թէ զէնքերը սխալ ձեռքերու մէջ կրնան չիյնալ», ու աւելցուց, թէ Ուաշինկթըն պիտի շարունակէ աշխատանք տանիլ, «որպէսզի սուրիական ընդդիմութիւնը կարողութիւնն ունենայ խաղաղ ճամբով լուծում հաստատելու», ինչպէս նաեւ նախագահ Պաշշար Ասատի վարչակարգին վրայ յաւելեալ ճնշումներ պիտի գործադրէ»:
Քերրի Սէուտական Արաբիա տուած իր երկօրեայ պաշտօնական այցելութեան աւարտին մեկնեցաւ Արաբական Միացեալ Էմիրութիւններ, ապա՝ Քաթար, քննարկելով երկկողմանի եւ շրջանային հարցեր, ներառեալ՝ Սուրիոյ տագնապը:

Իսրայէլ ՄԱԿ-ի Ապահովութեան խորհուրդին յղեց զգուշացում մը, որ ինք «ձեռնածալ» չի կրնար մնալ, մինչ Սուրիոյ մէջ տեղի ունեցող զինեալ տագնապը Սուրիոյ սահմաններէն դուրս կը տարածուի:

ՄԱԿ-ի մօտ Իսրայէլի դեսպան Ռոն Փրոսոր Ապահովութեան խորհուրդին յղած իր նամակին մէջ գանգատեցաւ Սուրիայէն հրետանիէ արձակուած ռումբերու Իսրայէլի մէջ իյնալէն եւ ըսաւ, որ «պէտք չէ սպասել, որ Իսրայէլ ձեռնածալ մնայ, մինչ իր քաղաքացիներուն կեանքերը կը վտանգուին սուրիական կառավարութեան անպատասխանատու արարքներուն պատճառով: Իսրայէլ մինչեւ հիմա ծայրայեղ աստիճանի ինքնազսպում ցուցաբերեց»:

ՄԱԿ-ի մօտ Ռուսիոյ դեսպան Վիթալի Չուրքին իր կարգին յայտնեց, որ Կոլանի մէջ ՄԱԿ-ի խաղաղապահ ուժերուն գտնուած շրջաններուն մէջ զինեալներու գոյութիւնը «նոր եւ վտանգաւոր երեւոյթ մըն է, այդ ալ չափազանց վտանգաւոր երեւոյթ մը»: Ան ցաւ յայտնեց, որ խաղաղապահ ուժերը այսպիսի կացութեան մը հետ վարուելու որեւէ լիազօրութիւն չունին, «որովհետեւ այդ ուժերը անզէն դէտերէ կը բաղկանան»:

Չուրքին Ռուսիոյ կողմէ ՄԱԿ-ի Ապահովութեան խորհուրդի նախագահութեան ստանձնումի արարողութեան ընթացքին տրուած մամլոյ ասուլիսի մը ընթացքին յայտնեց, որ Կոլանի շրջանին մէջ զինեալներու գործողութիւնը «շատ վտանգաւոր» է եւ «կրնայ Սուրիոյ եւ Իսրայէլի միջեւ ապահովութիւնը քայքայել»:

«Այն կողմը, որ այդ գործունէութեան կ՛աջակցի կամ լուռ կենալով անոր կը զօրակցի, ով որ ալ ըլլայ, շատ վտանգաւոր խաղ մը կը խաղայ», ըսաւ ան` աւելցնելով, որ այս հարցը պէտք է շրջանին մէջ ապահովական կացութեան վերաբերեալ ՄԱԿ-ի զեկուցումին մէջ առնուի:

Չուրքին ըսաւ, որ իր երկիրը եւ Արեւմտեան երկիրներ Սուրիոյ տագնապի լուծման շուրջ տարակարծիք են` շեշտելով, որ «այդ տագնապը առանց կառավարութեան եւ ընդդիմութեան մասնակցութեամբ երկխօսութեան լուծում չունի»:

Ան յայտնեց, որ Մոսկուա եւ Ուաշինկթըն արտաքին գործոց փոխնախարարներ Միխայիլ Պոկտանովի եւ Ուիլիըմ Պըրնզի մակարդակով Սուրիոյ հարցին շուրջ երկխօսութիւն պիտի կատարեն: «Մենք պատրաստ ենք Սուրիոյ կացութեան շուրջ Միացեալ Նահանգներու հետ երկխօսութիւնը շարունակելու: Կը կարծեմ, որ յառաջիկայ շաբաթ Եւրոպայի մէջ Միխայիլ Պոկտանովի եւ Ուիլիըմ Պըրնզի միջեւ հանդիպում մը տեղի պիտի ունենայ»:

Յորդանանի Ապտալլա Բ. թագաւորը Թուրքիա իր այցելութեան ծիրին մէջ Թուրքիոյ նախագահ Ապտիւլլա Կիւլի հետ միացեալ մամլոյ ասուլիսի մը ընթացքին յայտնեց, որ «փոխանցման համապարփակ հոլովոյթ մը միայն կրնայ յարանուանական տագնապն  ու Սուրիոյ քայքայումը կանխարգիլել»:

Լիբանանեան «Ախպար» օրաթերթը հաղորդեց, որ Սուրիոյ նախագահ Պաշշար Ասատ անցեալ շաբաթ Ղովմի կուսակցութենէն պատուիրակութիւն մը ընդունելու ընթացքին յայտնած է, որ Սուրիոյ մէջ գտնուող զինեալ խմբաւորումները այժմ իրենց «գոյութեան խաղ»-ի նմանող հանգրուանի մը մէջ են:

Ասատ յայտնած է, որ «այլեւս հաստատ է, որ Սուրիոյ դէմ դաւադրութիւնը իր աւարտին մօտեցած է», եւ ինք շատ գոհ է զինուորական կացութենէն` աւելցնելով, որ «Սուրիա այս ճակատամարտին մէջ յաղթեց եւ իր դէմ նիւթուած դաւադրական ծրագիրը տապալեց»:

Ֆրանսական «Լը Ֆիկարօ» օրաթերթը կը հաղորդէ, որ Միջին Արեւելքի մէջ ֆրանսական զինուորական աղբիւր մը յայտնած է, որ ամերիկացի զինուորական մասնագէտներ Յորդանանի մէջ Սուրիական ազատ բանակի զինեալներուն ռազմարուեստ կը սորվեցնեն: «Անոնք ջոկատներ կը ձեւաւորեն, կը ղեկավարեն եւ սուրիացի ըմբոստներուն անցեալ տարուընէ ի վեր խորհուրդներ կու տան», կը նշէ աղբիւրը:

Նախապատրաստումը տեղի կ՛ունենայ «Ապտալլա թագաւոր» ուսումնական վարժարանին մէջ, որ Յորդանանի մայրաքաղաքէն հիւսիս կը գտնուի:

LEAVE A REPLY

Please enter your comment!
Please enter your name here