ՆԱԽԱԳԱՀ ՍԸԼԷՅՄԱՆ՝ ԸՆՏՐՈՒԹԻՒՆՆԵՐԸ ՆՇԵԱԼ ԺԱՄԿԷՏԻՆ ԿԱՏԱՐԵԼՈՒ 95 ԱՌ ՀԱՐԻՒՐ ՀԱՒԱՆԱԿԱՆՈՒԹԻՒՆ

0
152

Հանրապետութեան  նախագահ  Միշէլ Սըլէյման  ընդունեց  խմբագիրներու սենտիքայի պատուիրակութիւն մը, սենտիքայի  նախագահ Իլիաս Աունի գլխաւորութեամբ եւ անոնց հետ   քննարկեց  ներլիբանանեան  բեմի վերջին զարգացումները:  Ապա պատասխանելով   իրեն ուղղուած   հարցումներուն, նախագահ Սըլէյման յայտնեց, թէ կը սպասէ արտաքին գործոց նախարար Ատնան Մանսուրի   վերադարձին, որպէսզի բացատրութիւններ  ստանայ  վերջինիս  կատարած  յայտարարութիւններուն վերաբերեալ:  Սըլէյման  ըսաւ, թէ  Արաբական Լիկայի մէջ Սուրիոյ ընդդիմութեան   ներկայացուցչութեան հանդէպ նախարար Ատնանի կեցուածքը, լաւագոյնս կը ցոլացնէ   Սուրիոյ զարգացումներուն  վերաբերեալ  չէզոք  դիրք  պահելու  Լիբանանի  քաղաքականութիւնը:

Սըլէյման հերքեց արաբական  Ծոցի պետութիւններուն կողմէ Լիբանանը  զգուշացնելու մասին տեղեկութիւնները:

Գալով ընտրական յանձնախումբերը կազմելու  շրջաբերականին ստորագրութեան  մասին խորհրդարանական  մեծամասնութեան կատարած  քննադատութեան, նախագահ Սըլէյման անտրամաբանական  գտաւ  պարտականութիւն  մը կատարած ըլլալու   առիթով  իրեն  ուղղուած  քննադատութիւնները:

Գալով  խորհրդարանական  ընտրութիւններուն,  նախագահ Սըլէյման ըսաւ, թէ հարիւրէն 95  հաւանականութիւն կայ,  որ  ընտրութիւնները տեղի ունենան  նշուած  ժամանակացոյցին, սակայն  ոչ՝ 1960-ի  օրինագիծին հիման վրայ:  Սըլէյման նկատել տուաւ, թէ գոյութիւն ունի   օրէնսդրութիւն եւ սահմանադրութիւն եւ  ճիշտ պիտի  չըլլայ  ապահովական պատրուակի տակ  ընտրութիւնները   յետաձգել  :  Ան դիտել տուաւ, որ  ընտրութիւնները   տեղի չունենալու կամ այժմու խորհրդարանին  պաշտօնավարութիւնը երկարաձգելու    պարագային, ապահովական   կացութիւնը առաւել եւս պիտի ծանրանայ:  Նախագահ Սըլէյման  յայտնեց, թէ  1960-ի  օրինագիծը  մահացաւ, սակայն կը սպասէ   օրինաւոր յուղարկաւորութեան, որովհետեւ  միայն նոր օրէնքի մը պարագային կարելի է  հինը  ջնջել:  

Նախագահը  հարց տւուաւ, թէ ինչո՞ւ կը  փորձեն Սուրիոյ հակամարտութիւնը   փոխադրել Լիբանան եւ  ինչո՞ւ Լիբանանը կը  փորձեն արաբական գարնան  զոհը դարձնել:   Նախագահը միաժամանակ մտահոգիչ նկատեց Թրիփոլիի իրավիճակը:

ԱՅՈՒՊ՝ ԴԱՍԱԴՈՒԼԸ  ՋՆՋԵԼՈՒ  ՈՐՈՇՈՒՄԸ  ԿԱԽԵԱԼ Է ԿԱՌԱՎԱՐՈՒԹԵԱՆ ՔԱՅԼԵՐԷՆ

 Երէկ՝  Հինգշաբթի,  ԵՈՒՆԵՍՔՕ պալատին մէջ Սենտիքայական    համակարգումի խորհուրդին  կազմակերպութեամբ   ԵՈՒՆԵՍՔՕ-ի պալատին մէջ, մեծ թիւով ուսուցիչներու, սենտիքաներու ներկայացուցիչներու, հասարակական  կազմակերպութիւններու  մասնակցութեամբ  նշուեցաւ ուսուցչաց  տօնը:  Այս առիթով  արտասանած իր խօսքին մէջ,  հիմնական  ուսումնարութեանց վարչական խորհուրդի  նախագան Մահմուտ Այուպ    յայտարարեց, թէ բաց    դասադուլը պիտի շարունակուի մինչեւ ամբողջական իրաւունքներու  ձեռքբերումը:  Այուպ ըսաւ, թէ   դասադուլը  ջնջելու  որոշումը կախեալ է  կառավարութեան քայլերէն

LEAVE A REPLY

Please enter your comment!
Please enter your name here