ԱՌԵՒԱՆԳՈՒԱԾ ԽԱՂԱՂԱՊԱՀՆԵՐԸ ԱՅՍՕՐ ԱԶԱՏ ԱՐՁԱԿԵԼՈՒ ԽՈՍՏՈՒՄ

0
112

Սուրիոյ   ընդդիմութիւնը ներկայացնող պատասխանատու մը  յայտարարեց, թէ   Կոլանի բարձունքին վրայ առեւանգուած ՄԱԿ-ի  քսան խաղաղապահները ազատ պիտի արձակուին այսօր:

Այս  հարցին առնչութեամբ, Իսրայէլի պաշտպանութեան նախարարութեան ապահովական եւ քաղաքական մարմինի նախագահ Ամոս Կիլատ յայտնեց. «Կոլանի բարձունքներու հարաւային՝ սուրիական բաժինին մէջ ՄԱԿ-ի ֆիլիփինցի դէտերու առեւանգման դէպքը վտանգաւոր դէպք մըն է»: Ան միաժամանակ յայտնեց, որ ինք վստահ է, թէ ՄԱԿ-ը պիտի համոզէ առեւանգողները, որ պատանդները ազատ արձակեն: Յիշեցնենք, թէ Սուրիոյ կառավարութեան դէմ պայքարող զինեալներ 21 խաղաղապահներ  առեւանգեցին Չորեքշաբթի օր ու զանոնք կը շարունակեն պատանդ պահել՝ պահանջելով սուրիական բանակին հեռացումը այդ շրջանէն:
Կիլատ նշեց. «Իսրայէլ աչալուրջ կերպով կը հետեւի Սուրիոյ հետ սահմանի ետին արձանագրուող իրադարձութեանց եւ որեւէ հաւանական զարգացումի բոլոր պատրաստութիւնները կը տեսնէ»՝ աւելցնելով, որ Սուրիոյ իրադարձութիւնները կրնան նոր վտանգներ յառաջացնել: Ան ընդգծեց, որ «քիմիական զէնքերը տակաւին Պաշշար Ասատի վարչակարգի ուժերուն վերահսկողութեան տակ են»:
ՄԱԿ-ի ընդհանուր քարտուղար Պան Քի Մուն դատապարտեց դէտերու առեւանգումը եւ կոչ ուղղեց՝ զանոնք անմիջապէս ազատ արձակելու: Ռուսիոյ արտաքին գործոց նախարարութեան բանբեր Ալեքսանտր Լուքաշեւիչ բուռն կերպով դատապարտեց ՄԱԿ-ի խաղաղապահներու առեւանգումը՝ պահանջելով, որ անոնք «անմիջապէս եւ առանց նախապայմաններու» ազատ արձակուին: Ան նշեց, որ Ռուսիա բազմիցս ՄԱԿ-ի Ապահովութեան Խորհուրդին մէջ ազդարարած է, թէ Կոլանի մէջ ՄԱԿի հսկողութեան տակ գտնուող տարածքը զինեալներու կողմէ կ՛օգտագործուի, իբրեւ մարզումի եւ զէնքի մաքսանենգման կեդրոն:
Միւս կողմէ, Իրանի արտաքին գործոց նախարար Ալի Աքպար Սալեհի ՄԱԿ-ին կոչ ուղղեց «սուրիական տագնապին արագ լուծում մը գտնելու նպատակով՝ Եգիպտոսի, Իրանի եւ Թուրքիոյ ջանքերուն զօրակցելու»: Ան Պան Քի Մունի ուղղուած իր նամակին մէջ նշեց, որ երեք երկիրները տագնապի խաղաղ լուծման համար իրենց ջանքերը կը շարունակեն: Ան ցաւ յայտնեց կարգ մը երկիրներու աջակցութիւնը վայելող ծայրայեղական եւ ապօրէն խմբաւորումներու կողմէ ահաբեկչական արարքներու շարունակման առթիւ:

 

LEAVE A REPLY

Please enter your comment!
Please enter your name here