ԳՈՐԾԱԶՐԿՈՒԹԵԱՆ ՀԱՄԵՄԱՏՈՒԹԻՒՆԸ ԿԸ ՆՈՒԱԶԻ ՄԻԱՑԵԱԼ ՆԱՀԱՆԳՆԵՐՈՒ ՄԷՋ

0
132

Միացեալ Նահանգներու աշխատաւորական հարցերու նախարարութիւնը Ուրբաթ, Մարտ 8-ին հաղորդեց, թէ Փետրուար ամսուան ընթացքին անգործութեան համեմատութիւնը 7.7 տոկոսի իջած է՝ Յունուարին արձանագրուած 7.9 տոկոսին փոխարէն: 7.7 տոկոս համեմատութիւնը ամենացածն է վերջին չորս տարիներուն ընթացքին:
Փետրուար ամսուան ընթացքին աշխատանքի 236,000 նոր կարելիութիւններ ստեղծուած են, սակայն տակաւին մօտաւորապէս 12 միլիոն անգործներ կը մնան երկիրին մէջ ու մտահոգութիւններ կան, թէ պետական ծախսերու կրճատումները կրնան դանդաղեցնել տնտեսութեան աճը:
Յատկանշական է, որ շինարարական մարզին մէջ 48,000 աշխատանքի նոր կարելիութիւններ գոյացած են Փետրուար ամսուան ընթացքին՝ Սեպտեմբերէն ի վեր այդ մարզին արձանագրած գործաւորներու աճը հասցնելով 151,000-ի: Ճարտարարուեստի մարզէն ներս եւս յատկանշական թիւով գործի նոր կարելիութիւններ ստեղծուած են:
Հինգշաբթի օր նաեւ հաղորդուած էր, թէ նախորդ շաբթուան ընթացքին անգործութեան ապահովագրութենէն նպաստ ստանալու առաջին դիմումը կատարողներուն թիւը 7000-ով նուազած է՝ իջնելով 340,000-ի, մինչ այդ տուեալին չորս շաբաթեայ միջինը իջած է 348,750-ի, ինչ որ նուազագոյն միջինն է Մարտ 2008-էն ի վեր:

 

LEAVE A REPLY

Please enter your comment!
Please enter your name here