ՄԵՍԻ ՆՇԱՆԱԿԵՑ ԵՂԱՆԱԿԻ 40-ՐԴ ԿՈԼԸ

0
213

Սպանիոյ  ֆութպոլի  ախոյեանութեան 27-րդ հանգրուանի մրցումներուն գծով, Պարչելոնա  2-0 արդիւնքով պարտութեան մատնեց    Տեփորթիվօն:  Գաթալոնացիները  իւրաքանչիւր   խաղակէսին մէկ գնդակ նշանակեցին    Տեփորթիվոյի բերդին մէջ:  Պարչելոնայի երկրորդ կոլը նշանակեց  Լիոնէլ Մեսին, յաջորդական՝ իր  17-րդը:    Մեսի   հաստատեց  համաշխարհային նոր մրցանիշ  մը:  Նախապէս այս մրցանիշը կը պատկանէր   Թէոտոր   Փիոթերեքին:   Վերջինս 1937-38  մրցաշրջանին, յաջողած է  յաջորդական  16 ախոյեանական կոլ նշանակել լեհական   Ռուհ ակումբի շապիկով: «Պարսա»յի առաջին կոլը նշանակեց Ալեքսիս  Սանչես:  Մարզիչ Թիթօ  Վիլանովայի   խումբը   ներկայիս   ունի  71 կէտ:  Այսօր  երեկոյեան Ռէալ Մատրիտ պիտի մրցի   Չելթա Վիկոյի դէմ: Ռէալի կազմէն պիտի  բացակային Ռաֆայէլ Վարանը,  Սերժիօ Ռամոսը եւ  Ֆապիօ  Քուենթրաօն:

Իտալիոյ  ֆութպոլի ախոյեանութեան  28-րդ հանգրուանի մրցումներուն,   Ռոմա՝ 1-1 արդիւնքով հաւասարութիւն մը արձանագրեց  Ուտինեզէի դէմ:  Էրիք Լամելա   նշանակեց  Ռոմայի կոլը:   Լուիս   Մուրիէլի հաւասարեցուց  հաշիւը:  Ռոմա կը գրաւէ դասաւորման   7-րդ դիրքը: Ա.Սէ.  Միլան 2-0 արդիւնքով պարտութեան մատնեց  Ճենովան:  Փացինի եւ Մարիօ Պալոթելի նշանակեցին  Միլանի կազմին կոլերը:  Ներկայիս  Միլան՝ 51  կէտով կը գրաւէ ընդհանուր դասաւորման  3-րդ դիրքը:

 

Պելճիքայի ախոյեանութեան  29-րդ հանգրուանի մրցումներուն Սելքլ Պրիւժ  սեփական  դաշտին մէջ  3-1 արդիւնքով պարտութիւն մը կրեց   Մոնսէն:  Պրիւժի միակ կոլը նշանակեց  ուրուկուահայ  25-ամեայ   յարձակող  Խոակին  Պօղոսեանը:  Սերքլ Պրիւժ  կ’եզրափակէ  ախոյեանութեան դասաւորումը:

Անգլիոյ բաժակի  քառորդ աւարտականի մրցումներուն,  Մանչեսթըր Սիթի  5-0 արդիւնքով պարտութեան մատնեց  Պարնզլին:   Գարլոս Թեվէզ նշանակեց  երեք կոլ (հեթ թրիք): Մնացեալ կոլերը նշանակեցին  Ալեքսանտըր  Քորալովը եւ  Տաւիտ Վիլան:

 Էվըրթըն  սեփական դաշտին մէջ  3-0 արդիւնքով պարտուեցաւ Ուիկանէն: Յատկանշական էր, որ Ուիկան յաջորդկան երեք վայրկեաններու մէջ  նշանակեց   իր երեք կոլերը:

Անգլիոյ ախոյեանութեան մրցումներուն գծով՛   Ուեսթ Պրոմուիչ Ալպիոն 2-1 արդիւնքով պարտութեան մատնեց   Սուանսի Սիթին:  Քուինզ Փարք  Ռէյնճըրս 3-1 արդիւնքով   յաղթեց  Սանտերլանտին:    Ռետինկ իր դաշտին մէջ 2-1 արդիւնքով խոնարհեցաւ  Ասթոն Վիլայի առջեւ:

Գերմանիոյ   ախոյեանութեան  25-րդ հանգրուանի  մրցումներուն, Պայերն  Միւնիխ  3-2 արդիւնքով պարտութեան մատնեց Ֆորթունա Տուսելտորֆը:   Թոմաս Միւլըր,  Ֆրանք Ռիպերի եւ Ժերոմ  Պոթենկ նշանակեցին պաւարիական կազմին կոլերը:  Միւս կողմէ, Պայերնի անմիջական մրցակիցը՝ Պորուսիա Տորթմունտ   2-1 արդիւնքով պարտութիւն մը կրեց  Շալքէ 04-էն:  Եուլիան  Տրաքսլէր եւ   Քլաս Իան  Հանթելաաար    նշանակեցին Շալքէի կոլերը, Ռոպերթ  Լեվանթովսքի՝  Տորթմունտի:

 Ֆրանսայի ախոյեանութեան   28-րդ հանգրուանի մրցումներուն,  Լիլ՝ 3-1 արդիւնքով պարտութեան մատնեց  Վալենսիէնը:  Ռոտելի,  Մելօ եւ  Փեթրեթ նշանակեցին Լիլի կոլերը: Միւս կողմէ,  շնորհիւ  Զլաթան Իպրահիմովիչի  59-րդ եւ 62-րդ  վայրկեաններուն   նշանակած  կոլերուն,  Փարի Սէն Ժերմէն  2-1 արդիւնքով  պարտութեան մատնեց   Նանսին:  Մայրաքաղաքի խումբը ներկայիս   57 կէտով կը գլխաւորէ ընդհանուր աղիւսակը:

ԿԱՐՃ   ԼՈՒՐԵՐ

–         Ա.Սէ.  Միլանի յարձակող   Ճամփաուլօ   Փացինի, կրնայ բացակայիլ   «Չեմփիընզ Լիկ» բաժակի 1/8 հանգրուանի  գծով  Պարչելոնայի դէմ  տեղի ունենալիք  դարձի մրցումէն:  28-ամեայ  յարձակողը  Ճենովայի դէմ կատարած մրցումին ընթացքին  վնասուածք ստանալով   հեռացաւ դաշտէն:

–          4  Յունիսին  Գերմանիոյ Լայփցիք  քաղաքին մէջ տեղի պիտի ունենայ   ազգային խումբի կիսապաշտպան Մայքըլ Պալաքի   հրաժեշտի  մրցումը:  Սոյն  մրցումին տոմսերը  հրապարակ   ելլելէ  24  ժամ ետք, անմիջապէս  սպառեցան:  Պալաք  98 անգամ կրած է ազգային խումբին շապիկը նշանակելով  42 կոլ: Նշեալ օրը, Պալաքի  կողմէ  ընտրանի մը պիտի մրցի աշխարհի  հաւաքականին դէմ:

–          Եուվենթուոսի մարզիչ  Անթոնիօ  Գոնթէ հերքեց   մարզական եղանակի  վերջաւորութեան  անգլիական Չելսի  խումբին միանալու մասին տեղեկութիւնները:  43-ամեայ Գոնթէ ըսաւ.«  գիտեմ, որ յառաջատար ակումնբեր բարձր կը գնահատեն  աշխատանքս, բայց   կը  նախընտրեմ  մնալ Եուվենթուսի  հետ»:

–          Անգլիական  Մանչեսթըր Եունայթըտ ակումբը մեծ գումար մը կը պատրաստէ  Քրիսթիանօ Ռոնալտօն դարձեալ իր կազմին մէջ  ունենալու համար:  Ռոնալտոյի  փոխնացման համար  Ռէալ Մատրիտ  կը պահանջէ  70  միլիոն եուրօ  գումար մը: Իր կարգին, Ռէալ Մատրիտ կը  պատրաստուի 110 միլիոն  եուրօ գումար մը  առաջարկել Թոթենհամի եզրային միջնապահ Կարէթ Պէյլի համար:

–         «Չեմփիընզ Լիկ» մրցաշարքի 1/8րդ  հանգրուանի գծով,   Պարչելոնա – Ա.Սէ.Միլան մրցումին նախօրէին, Միլանի 45-ամեայ մարզիչ  Մաքսիմիլիանօ  Ալեկրի յայտարարեց, թէ   գաթալոնական ակումբը աշխարհի ամենահզօր  խումբն է:  Նշենք, թէ երկու    հսկաներուն միջեւ երթի մրցումը  վերջ գտած էր  Միլանի  յաղթանակով՝ 2-0:

–          Հայատանի ֆութպոլի Ֆետերասիոնը  շնորհաւորեց կիսապաշտպան Արազ  Օզիպիլիը,  անոր ծննդեան 23-րդ տարեդարձին  առիթով: Օզպիլիս  մաս կը կազմէ  Քրասնատարի Քուպան խումբին:

–          Հայազգի  Լեւոն Արոնեան   21 Ապրիլէն  1 Մայիսի միջեւ,  Փարիզի եւ Սան  Փեթերսպուրկի մէջ պիտի մասնակցի   շախմատի աշխարհի կուռքերէն Սերկէյ Ալիոխինի յիշատակին կազմակերպուելիք մրցաշարքներուն: 

–           Համաշխարհային   քրոյսմասթըր  Գրիգոր- Սեւակ  Մխիթարեան  շահեցաւ Պրազիլի  շախմատի ախոյեանութեան  տիտղոսը:

–         Փիւնիկի 22-ամեայ   կիսապաշտպան Դաւիթ Մանոյեան ապաքինելէ ետք, Գերմանիայէն  վերադարձաւ  Երեւան: Տաղանդաշատ   ֆութպոլիսը Դեկտեմբերի սկիզբը ծունկի  վիրահատութեան  պատճառով մեկնած էր Գերմանիա:

–         Հայաստանի  հաւաքականը  Մոնտիալ 2014-ի զտման  մրցումներուն գծով,  26 Մարտին, Երեւանի մէջ պիտի  ընդունի  Չեխիոյ հաւաքականը:

–         Սպանիոյ   Ֆութպոլի  բաժակի  Ռէալ Մատրիտ – Աթլեթիքօ Մատրիտ  աւարտականի  մրցումը տեղի պիտի ունենայ   17 Մայիսին,   Մատրիտի Սանթիակօ Պեռնպաօ մարզադաշտին մէջ:

ՉԵՄՓԻԸՆԶ ԼԻԿ

ՊԱՐՉԵԼՈՆԱ   -Ա.ՍԷ. ՄԻԼԱՆ

 Եւրոպայի Ախոյեան Ակումբներու Ախոյեանութեան  «Չեմփիընզ Լիկ » մրցաշարքի 1/8-րդ հանգրուանի  դարձի  մրցումներուն գծով,   Երեքշաբթի,  12  Մարտ,  երեկոյեան ժամը՝  21.45-ին, Պարչելոնա պիտի   մրցի  Ա.Սէ. Միլանի դէմ:   Երթի  մրցումը  Իտալիոյ մէջ վերջ գտած էր  Միլանի յաղթանակով՝ 2-0: ԵՈՒԵՖԱ-ի  նախագահ  Միշէլ Փլաթինի յայտարարեց, թէ    երկու կոլի տարբերութիւնը   չէզոքացնելը  բաւական  դժուար պիտի ըլլայ  Պարչելոնայի համար:

Նոյն պահուն,  Շալքէ 04 պիտի  ընդունի  Կալաթասարայը:  Երթի հանդիպումը  Իսթանպուլի մէջ վերջ գտած էր 1-1՝ հաւասարութեամբ:

LEAVE A REPLY

Please enter your comment!
Please enter your name here