«Եթէ Լիբանանցին Կամենայ` Երեսփոխանական Ընտրութիւնները Կը Կատարուին Եւ Լիբանանը Կը Բարգաւաճի» Ընդգծեց Յ. Բագրատունի

0
187

Հայկական երեսփոխանական պլոքի ներկայացուցիչ, երեսփոխան Յակոբ Բագրատունի անցեալ շաբաթավերջին «Մանար» պատկերասփիւռի կայանին հետ իր ունեցած հարցազրոյցին ընթացքին անդրադարձաւ լիբանանեան իրադարձութիւններուն, ընտրական օրինագիծին, ինչպէս նաեւ երկրին մէջ առկայ սենտիքայական պահանջներուն եւ ուսուցիչներուն ու պետական պաշտօնեաներուն արդար իրաւունքներուն:

Ուսուցչաց տօնին առիթով` հարցազրոյցը սկսաւ երեսփոխանը հիւրընկալող լրագրողին կողմէ, անոր ուղղուած շնորհաւորութեամբ:

Ուսուցիչներուն կողմէ այս տօնը փողոցը անցընելու եւ իրենց արդար իրաւունքները պահանջելու ցոյցեր կազմակերպելու իրականութիւնը ցաւալի է եւ ամօթ Լիբանանին եւ բոլոր լիբանանցիներուն համար:

«Ինծի համար ուսուցիչներուն դիմագրաւած այս մարտահրաւէրը շատ աւելի լուրջ է, քան` ընտրական օրէնքը, որովհետեւ այսօր կառավարութեան կողմէ այդ թղթածրարին նկատմամբ ցուցաբերուած անլուրջ մօտեցումը մերժելի է եւ անիկա ի վերջոյ պիտի հարուածէ երկրին ուսեալ դասակարգը եւ եթէ այդ մէկը կատարուի, ապա այլեւս ուսեալ քաղաքական անձնաւորութիւններ կրնան չըլլալ, երկրին մէջ ահաբեկչութիւնն ու աղքատութիւնը կը շատնայ եւ պատերազմի հաւանականութիւնները կը բարձրանան», ըսաւ Յ. Բագրատունի:

Ան շեշտեց, որ կառավարութեան կողմէ ուսուցիչներուն իրաւունքներուն նկատմամբ ցուցաբերուած կեցուածքները, ինչպէս նաեւ կառավարութեան իսկ կատարած  խոստումները դրժելու իրականութիւնը անընդունելի է:

Պետական պաշտօնեաներուն եւ ուսուցիչներուն աշխատավարձերու յաւելումին մասին ՀՅԴ-ի կեցուածքին մասին հարցումի մը պատասխանելով` Յ. Բագրատունի շեշտեց, որ ՀՅ Դաշնակցութիւնը ընկերվարական կուսակցութիւն է եւ ան կը զօրակցի ուսուցիչներուն ու աշխատաւորներուն պահանջներուն եւ իրաւունքներուն: «Մենք կը հասկնանք երկրին մէջ տիրող տնտեսական ընդհանուր իրավիճակը, սակայն կարելի չէ արդար պահանջներու նկատմամբ նման անլրջութիւն եւ ձգձգում ցուցաբերել», շեշտեց ան:

Երեսփոխանական ընտրութիւնները կայացնելու առումով արտաքին միջամտութիւններուն մասին հարցումի մը պատասխանելով` Յ. Բագրատունի շեշտեց, որ եթէ Լիբանան եւ լիբանանցի պատասխանատուները առիթ տան այլ պետութիւններուն` միջամուխ ըլլալու երեսփոխանական ընտրութիւններուն, ապա այդ երկիրները իրենց դեսպաններուն եւ դիւանագէտներուն ճամբով ոչ մէկ անգամ կը վարանին միջամտելէ: «Մենք պէտք է գիտնանք, թէ ինչպէ՛ս պէտք է վերջ տանք եւ կասեցնենք այդ միջամտութիւնը: Եթէ անցեալին որոշ պետութիւններ մեր վրայ ճնշում բանեցուցած են` որոշ պատկերով կազմելու մեր երկրին խորհրդարանը, ապա այդ արարքը մեզ կը վարկաբեկէ եւ ոչ թէ այդ պետութիւնները, իսկ հոս պէտք է հաստատել, որ եթէ մենք ճնշում եւ միջամտութիւն չպահանջենք, ոչ ոք կը համարձակի միջամուխ ըլլալ մեր ընտրութիւններուն», շեշտեց երեսփոխան Բագրատունի:

Երկրին ապահովական կայունութեան եւ երեսփոխանական ընտրութիւններուն առաջնահերթութեան մասին հարցումի մը պատասխանելով` Յ. Բագրատունի նշեց, որ Լիբանան կ՛ուղղուի դէպի անորոշութիւն, եւ եթէ Լիբանանը չըլլայ, ապա ընտրութիւնները անհեթեթ կ՛ըլլան: «Ասիկա վիճելի հարց չէ, առաջնահերթութիւնը Լիբանանի Հանրապետութեան պահպանումն է», ըսաւ ան:

Յ. Բագրատունի նշեց, որ երեսփոխանական ընտրութիւններու չկայացման պարագային, խորհրդարանը իր նստաշրջանը կ՛երկարաձգէ: Ան աւելցուց, որ այս մէկը կրնայ առողջ չըլլալ, սակայն սահմանադրութեան եւ օրէնքներուն համաձայն, այդ մէկը կարելի է:

Հարցազրոյցին ընթացքին Մուսթաքպալ հոսանքի երեսփոխան Մոհամետ Հաժժարի կողմէ հեռաձայնային հաղորդակցութեան ընթացքին արձանագրուած յայտարարութիւններուն պատասխանելով` Յ. Բագրատունի շեշտեց, որ Մարտ 8-ի քաղաքական ուժերը երեսփոխանական ընտրութիւնները կամ ընտրական օրէնքի քննարկումը յետաձգելու յանցանքով ամբաստանելը անհիմն են:

«Մենք ոչ մէկ անգամ թերացած ենք կամ բացակայած խորհրդարանի միացեալ յանձնախումբերուն նիստերուն մեր մասնակցութեան առումով, ինչպէս նաեւ մնայուն կերպով մասնակցած ենք միացեալ յանձնախումբերէն բխած ընտրական օրինագիծին մշակման ենթայանձնախումբին նիստերուն: Ընդհակառակն` 2005-էն ի վեր առաջին անգամն է, որ Մարտ 14-ի եւ Մարտ 8-ի քաղաքական ուժերուն երկփեղկումը խզուեցաւ եւ անոնց միջեւ մերձեցում արձանագրուեցաւ, երբ Փաղանգաւոր եւ Լիբանանեան ուժեր կուսակցութիւնները համաձայն գտնուեցան Ուղղափառ հանդիպումին մշակած ընտրական օրինագիծին: Հետեւաբար, տարբերութիւնը այն է, որ մենք կ՛ուզենք համախոհութիւն գոյացնել այնպիսի ընտրական օրէնքի մը շուրջ, որ քրիստոնեայ եւ իսլամ երեսփոխաններուն միջեւ հաւասարութիւնը կը յարգէ եւ ոչ թէ քրիստոնեաներուն ներկայացուցչութեան հաշուոյն համախոհութիւն կը գոյացնէ», ըսաւ ան:

Յ. Բագրատունի ընդգծեց, որ 1990-էն սկսեալ խորհրդարանին մէջ քրիստոնեայ համայնքին անարդար ներկայացուցչութիւնը եւ անոր իրաւազրկումը կուտակումներ են, որոնց պատճառով մշակուած է Ուղղափառ հանդիպումին օրինագիծը, «որ խորքին մէջ ընտրական օրէնք մը ըլլալէ աւելի ըմբոստութիւն մըն է բոլոր ճնշումներուն դէմ, որոնք պարտադրուած են մեր վրայ օտար պետութիւններուն կողմէ», ըսաւ ան:

Յ. Բագրատունի ընդգծեց, որ 1960-ի ընտրական օրէնքին հիման վրայ երեսփոխանական ընտրութիւններ պիտի չկատարուին Լիբանանի մէջ, որովհետեւ այդ օրէնքը ժողովուրդին կամքին հետ կը հակադրուի եւ որքան ալ օրէնքի հիման վրայ ըլլան հանրապետութեան նախագահին եւ վարչապետին կողմէ ընտրական յանձնախումբերը կեանքի կոչելու քայլերը, ի վերջոյ ժողովուրդին կամքը կը գերակշռէ երկրին սահմանադրութեան:

Սուրիոյ տագնապին մասին հարցումի մը պատասխանելով` Յ. Բագրատունի ցաւ յայտնեց, որ այդ տագնապը հետզհետէ աւելի կը վատթարանայ` աւելցնելով, որ եթէ կացութիւնը այդպէս շարունակուի, ապա Սուրիա բաժանումի ուղիին վրայ կը գտնուի:

Սուրիոյ տագնապին շրջագիծին մէջ մնալով` երեսփոխան Բագրատունի հաւանական նկատեց, որ այդ տագնապին բոցերը հասնին նաեւ Իրաք, Լիբանան եւ Յորդանան` նկատել տալով միաժամանակ, որ Թուրքիա ինքն է, որ Սուրիոյ բոցերը կը պատճառէ:

Այս ծիրին մէջ Բագրատունի մէջբերեց Թուրքիոյ վարչապետ Էրտողանի մէկ յայտարարութիւնը, որուն մէջ ան յայտնած է, թէ Պաշշար Ասատի անունը իր ընտանիքէն պիտի ջնջէ, որովհետեւ ոճրագործներու հետ չ՛ուզեր կապի մէջ ըլլալ, եւ հարց տուաւ. «Արդեօք Էրտողան ի՞նչ կը զգայ Հայոց ցեղասպանութիւնը գործած իր նախահայրերուն աթոռին վրայ նստելով. արդեօք անոնք ոճրագործ չե՞ն եւ ինք անոնց շառաւիղը չէ՞»:

Յ. Բագրատունի եզրափակեց, որ եթէ լիբանանցիները կամենան, ապա Լիբանանի մէջ երեսփոխանական ընտրութիւններ կը կատարուին եւ Լիբանանը կը բարգաւաճի:

 

LEAVE A REPLY

Please enter your comment!
Please enter your name here