ԵՒՐՈՊԱԿԱՆ ՄԻՈՒԹԻՒՆԸ ՎԱՂԸ ՊԻՏԻ ՔՆՆԱՐԿԷ ՀԸԶՊԱԼԼԱՆ ՍԵՒ ՑՈՒՑԱԿԻ ՄԷՋ ԱՆՑԸՆԵԼՈՒ ՕՐԱԿԱՐԳԸ

0
213

 Եւրոպական  Խորհրդարանի անդամները եւ  Եւրոպական  Միութեան  ղեկավարները  վաղը՝  Չորեքշաբթի պիտի  փորձեն   քաղաքական  համաձայնութիւն մը գոյացնել  2014-2020 պիւտճէին  շուրջ, իսկ տուեալ երկիրներու արտաքին գործոց նախարարները պիտի  քննարկեն Հըզպալլան  ահաբեկչական  կազմակերպութիւններու ցանկին  մէջ անցընելու  կարելիութիւնները:

  Երէկ՝ Երկուշաբթի, Եւրոպական  Խորհրդարանը  Սթրազպուրկի  մէջ  սկսաւ քննարկել  960 միլիառ  եուրօ արժողութեամբ   պիւտճէական կրճատում կատարելու յանձնառութիւն մը: Շատ  հաւանաբար,  մեծամասնութիւնը   ողջունէ  տնտեսական սահմանափակումներու մասին տուեալ   առաջարկը, սակայն միւս կողմէ, իւրաքանչիւրը  իր պարտաւորութիւններէն  խուսափելու  միջոցներ   պիտի փնտռէ՝  պատրուակելով  եկամտաբեր աղբիւրներու  սակաւութիւնը…:

Վերոյիշեալ  օրակարգին զուգահեռ,   Եւրոպական  Խորհրդարանը  քուէարկութեան  պիտի  ներկայացնէ երկու  տարբեր   օրակարգեր:  Երկուքն ալ  խիստ  ճակատագրական՝ քսան  եւ եօթ պետութիւններէ բաղկացած միութեան   ապագային եւ յառաջիկայ  տարիներու անոր   տնտեսական քաղաքականութեան:  Եւրոպական  Խորհրդարանը  պիտի ձգտի կազմել   անդամ  պետութիւններու ազգային տնտեսութիւնները վերահսկող  Խորհուրդ:  Այս Խորհուրդը հսկողութեան  տակ պիտի  վերցնէ  անդամ  պետութիւններու ազգային տնտեսութիւնները, ինչպէս նաեւ՝ հակակշիռի տակ պիտի  փորձէ պահել  իւրաքանչիւրին պիւտճէն: Երկրորդը՝ կը  վերաբերի  անդամ պետութիւններուն փոխանցուող   գիւղատնտեսական  յատկացումներուն՝ աւելի լիարժէք եւ հաւասարաչափ բաժնելու  կարելիութեան:  Օրակարգի վրայ պիտի   ըլլայ   Եւրոպական Միութիւն- Միացեալ Նահանգներ ազատ առեւտուրի համաձայնագիրը, ինչպէս նաեւ  17.5  միլիառ  եուրօ՝ Կիպրոսի  փոխառութեան դիմումը:  

  Խորհրդաժողովը  պիտի  լսէ  Սուրիոյ  հակամարտութիւնը կարգաւորելու  լիազօրուած ՄԱԿ-ի եւ Արաբական  Լիկայի պատուիրակ Լախտար  Իպրահիմիի  զեկոյցը:

Եւրոպական   Խորհրդարանի եւ Եւրոպական  Միութեան անդամները պիտի   լսեն  Իսրայէլի նախագահ Շիմոն Փերէզի ելոյթը:  Կանխաւ  ծանօթ է բոլորին, որ  Փերէզ պիտի  պահանջէ Հըզպալլան  ներառնել ահաբեկչական կազմակերպութիւններու ցուցակին մէջ եւ  յաւելեալ պատժամիջոցներ հաստատել Իրանի դէմ  : 

Երէկ՝ Երկուշաբթի,  Եւրոպական Միութեան արտաքին գործոց նախարարները, Պրիւքսէլի իրենց կեդրոնատեղիին մէջ  լսեցին,  Պուրկասի մէջ ( Պուլկարիա) անցեալ տարի , իսրայէլացի  զբօսաշրջիկներ   փոխադրող   օթոպիւսի մը դէմ կատարուած ահաբեկչական գործողութեան վերաբերեալ   Պուլկարիոյ  ներկայացուցիչ  Նիքոլայ  Մլատենովի  տեղեկագիրը:  Հակառակ  Միացեալ Նահանգներու  եւ  Իսրայէլի բանեցուցած ճնշումներուն,   Եւրոպական Միութիւնը տեղի պիտի  չտայ   Հըզպալլան սեւ ցուցակի  վրայ անցընելու  անոնց պահանջին: 

  Պուլկարիոյ ներքին գործոց նախարար  Զվեթան Զվեթանով վերջերս հաստատեց, թէ  Պուրկասի   միջադէպին առնչութեամբ ձերբակալուած երկու  կասկածելիները կը պատկանին Հըզպալլայի  զինուորական  թեւին:  Գերմանիա եւ Ֆրանսա լուրջ  չընդունեցին Զվեթանովի  յայտարարութիւնը:   Սի.Այ.Էյ-ի նորանշանակ  ղեկավար   Ճոն Պրենան  ժամանակէ մը  ի վեր Եւրոպական  Միութենէն  կը  պահանջէ   առանց տատամսելու  ահաբեկչական  կազմակերպութիւններու ցուցակին մէջ   անցընել Հըզպալլան:  Եւրոպացիները  գրեթէ անտեսեցին անոր կոչերը:

 Ուաշինկթընի համար պատճառներ չեն  պակսիր տկարացնելու Հըզպալլան:  Միացեալ Նահանգներու  կարծիքով,   Հըզպալլայի անդամներէն  Ալի Մուսա  Տաքտուք, վճռական դերակատարութիւն ունեցած է  Յունուար  2007-ին,   Իրաքի մէջ  ամերիկեան զօրախումբի մը դէմ կազմակերպուած գործողութեան,  որուն հետեւանքով  ապաննուեցան հինգ   ծառայողներ: Անտեսելով նախագահ Պարաք Օպամայի զայրոյթը,   Իրաքի  կառավարութիւնը ազատ արձակեց Տաքտուքը: Վերջինս վերադարձաւ Լիբանան:  Միացեալ Նահանգներու դէմ  Հըզպալլայի  ճակատումները ունին աւելի քան երեսնամեայ  վաղեմութիւն: Հոկտեմբեր  1983-ին, Պէյրութի մէջ, ամերիկացի եւ ֆրանսացի   մարինզներու դէմ  անձնասպանական  գործողութիւն մը խլեց   241  ամերիկացի  եւ 58  ֆրանսացի զինծառայողներու կեանքը:  Ուաշինկթըն, անցնող դարաշրջանի  90-ականներէն ի վեր, ահաբեկչական կազմակերպութիւններու ցուցակին  մէջ ընդգրկած է  Հըզպալլան:  Սի.Այ.Էյ-ի տուեալներով, մինչեւ  11 Սեպտեմբեր 2001,   Հըզպալալա  աւելի  մեծ թիւով ամերիկացի քաղաքացիներ սպաննած է, քան՝ Ալ Քայիտան:

Անցեալ շաբթուան  ընթացքին, պետական քարտուղար Ճոն Քելլի իր եւրոպացի գործընկերներուն  եւ  աշխարհի բոլոր կառավարութիւններուն դիմելով, պահանջեց  աւելի  խիստ եւ կտրական  միջոցառումներ ձեռնարկել  Հըզպալլայի  դմ:

Առ այսօր  կարելի  չէ  յստակ պատասխան գտնել, թէ  Եւրոպական Միութիւնը ինչո՞ւ  գրեթէ  անպատասխան կը ձգէ  Հըզպալլայի  վերաբերող ամերիկեան-իսրայէլեան կոչերը: Եւրոպական ցամաքամասի վրայ,  միակ պետութիւնը, որ Հըզպալլան  իր կրօնական, բարեսիրական եւ զինուորական  թեւերով՝ իբրեւ   ահաբեկչական կազմակերպութիւն  կը ճանչնայ, Հոլանտան  է:  Բրիտանիա՝ 2008-ին,  Հըզպալլայի զինուորական  թեւը հռչակեց ահաբեկչական կազմակերպութիւն:  Եւրոպական կարգ մը պետութիւններ կարծէք հնարք մը ստեղծած են՝ զանազանութիւն  դնելով Հըզպալլայի   քաղաքական եւ զինուորական  թեւերուն միջեւ: Սակայն Հըզպալալյի երկրորդ դէմքը,  շէյխ  Նայիմ Քասէմ   հերքեց  տարբեր  թեւերու  գոյութեան մասին տեղեկութիւնները .«  Մենք չունինք զինուորական եւ  քաղաքական թեւ,  մենք չունինք  մէկ կողմէ Հըզպալլա, միւս կողմէ՝  Դիմադրութիւն».  ընդգծեց  Քասէմ:

Քաղաքական եւ ապահովական  տարբեր գործօններու կարելի է վերագրել, Պուրկասի պայթումին  առնչութեամբ  Հըզպալլայի  հանդէպ Եւրոպական Միութեան տատամսոտ կեցուածքը:  Գերմանիա,  Կիպրոս,  Ֆրանսա, Շուէտ, Աւստրիա, Պելճիքա, ինչպէս նաեւ այլ անդամ պետութիւներ կը զգուշանան, որ  նման  քայլ մը  կը կրնայ  ապակայունացնել   Լիբանանի  փխրուն  կառավարութիւնը:  Միւս կողմէ, Իսրայէլի եւ  Լիբանանի սահմանագիծերուն վրայ տեղակայուած ՖԻՒՆԻԼ-ի խաղաղապահներուն մէջ կը գտնուին  Եւրոպական  Միութիւնը   ներկայացնող   ծառայողներ: Որքա՞ն խոհեմութիւն պիտի  ըլլայ  ամերիկեան  ճնշումներու  հետեւանքով ,  սպառնալիքի տակ դնել անոնց  անվտանգութիւնը:  Եւրոպական Միութիւնը  կը խուսափի   իր տարածութեան  մէջ  յարձակումներու  կրկնութենէն:

Պուլկարիոյ  ներկայացուցիչը առաւելագոյնը՝ պատժամիջոցներու  նոր  ցանկ մը կրնայ  պահանջել  Հըզպալլայի  զինուորական  թեւին  դէմ:  Այս բոլոր  նախատեսութիւններուն  զուգահեռ  գոյութիւն ունի  կարեւոր գործօն մը՝ Պուլկարիոյ  ներքին գործոց նախարարը յայտարարեց, թէ  յետաքննութիւնները  յաւելեալ ժամանակի կը կարօտին,  որովհետեւ կասկածելիներուն քաղաքական  պատկանելիութիւնը  չի նշանակեր, թէ  Հըզպալլան կազմակերպած էր   Պուրկասի պայթումը..:

ԱՀԱՐՈՆ  ՇԽՐՏԸՄԵԱՆ

LEAVE A REPLY

Please enter your comment!
Please enter your name here