«Էմիլ Լահուտ» Հանդիսասրահին Մէջ «Քնար» Պարախումբը Պարարուեստի Ընդմէջէն Արժանավայել Կերպով Նշեց Արամ Խաչատուրեանի Ծննդեան 110-ամեակը

0
165

Հանճարեղ երգահան Արամ Խաչատուրեանի ծննդեան 110-ամեակին առիթով, երէկ` Կիրակի, 10 Մարտ 2013-ին, երեկոյեան ժամը 8:30-ին, «Էմիլ Լահուտ» հանդիսասրահին մէջ, հովանաւորութեամբ տէր եւ տիկին Նազարէթ եւ Ժան Այանեանի, տեղի ունեցաւ Համազգայինի Լիբանանի Շրջանային վարչութեան «Քնար» պարախումբին այս տարուան երրորդ եւ վերջին ելոյթը` ներկայութեամբ արուեստասէր եւ արուեստագէտ հասարակութեան եւ մասնակցութեամբ Համազգայինի «Գայեանէ» պարի դպրոցին:

«Քնար»-ի պարուսոյցն է Հայաստանէն հրաւիրուած Թաթուլ Ալթունեանի անուան երգ ու պարի համոյթի բազմավաստակ պարուսոյց Յովիկ Խաչիկեան: Յայտագիրի առաջին բաժինին մէջ «Քնար» պարախումբը ներկայացուց «Շիրակի», «Վաղարշապատ», «Հովիւներ», «Իլիկներ», «Հայուհի», «Քաջ Նազար», «Տաւիղ» եւ «Արցախ» պարերը: «Գայեանէ» պարի դպրոցը ներկայացուց «Իլեկիա»-ն, «Նինօ»-ն եւ «Եաման եար»-ը: Այս բաժինին ասմունքով իր մասնակցութիւնը բերաւ Իրմա Տէտէեան: Հետաքրքրական էր «Քաջ Նազար»ին կատարումը, որ բեմականացած էր եւ պարին ընդմէջէն ներկայացուած էր տիպարը:

Կարճ դադարէ մը ետք, երկրորդ բաժինով ելոյթը սկսաւ ջահերու պարով, որմէ ետք ներկաները դիտեցին Արամ Խաչատուրեանին կենսագրութիւնն ու արժէքը ներկայացնող տեսերիզ մը: «Քնար»-ը պարեց «Վարդագոյն աղջիկներ», «Շալախօ», «Լեռնցիներ», «Ուզուն տարա» եւ «Սուրեր» պարերը: Այս բաժինին մէջ «Գայեանէ»-ն ներկայացուց «Սուիտա» պարը, մինչ յայտագիրին «Գարուն Երեւան» երգով իր մասնակցութիւնը բերաւ սոփրանօ Շողիկ Թորոսեան: «Գայեանէ»-ի աշակերտներուն մասնակցութիւնը ելոյթին տուաւ յատուկ գունաւորում եւ երթին շարունակութիւնը ապահովող երաշխիք: «Քնար»-ի ելոյթը աւարտեցաւ փակման խմբային պարով:

Ելոյթին առիթով ձեռնարկին սկզբնաւորութեան ներկաներուն բաժնուած գրքոյկներուն մէջ Համազգայինի Լիբանանի Շրջանային վարչութիւնը իր խօսքին մէջ նշեց, որ «հետեւողական ու բծախնդիր իրենց մարզումներով` մեր տղաքն ու աղջիկները ջանացին հասնիլ կատարողական անթերի եւ նրբաճաշակ մակարդակի` իբրեւ մէկ ամրապինդ օղակը այն ոսկեշղթային, որ տասնամեակներէ ի վեր երգի, պարի, թատրոնի, երաժշտութեան, գրականութեան եւ կերպարուեստի բազմերանգ իրագործումներով Համազգայինի մշակութային ուղեւորութեան իրագործումները իրարու կ՛ագուցէ եւ գոհացում ու հպարտութիւն կ՛առթէ լիբանանահայ խստապահանջ հանդիսատեսին»:

Հաստատում մը, որ գործնապէս թարգմանուեցաւ նշեալ ելոյթին ընդմէջէն եւ անով իսկ արժանավայել կերպով նշուեցաւ մեծ արուեստագէտ Արամ Խաչատուրեանի ծննդեան 110-ամեակը:

 

 

LEAVE A REPLY

Please enter your comment!
Please enter your name here