Զօրակցութիւն՝ Արցախի

0
118

 Եւրոպայի ՀՅԴ Հայ Դատի գրասենեակը կը տեղեկացնէ, թէ Եւրոխորհրդարանի պատգամաւորները սկսած են զօրակցութեան նամակներ յղելու Լիթուանիոյ խորհրդարանի այն ինը պատգամաւորներուն, որոնք որոշած են Արցախի Հանրապետութեան հետ բարեկամութեան խումբ ստեղծել: Եւրոխորհրդարանականներէն առաջինը Եւրոխորհրդարանի Եւրոմիութիւն-Հայաստան բարեկամութեան խմբակի նախագահ, Կիպրոսէն պատգամաւոր Էլենի Թէոքարուսն է:
Եւրոպայի ՀՅԴ Հայ Դատի գրասենեակի նախագահ Գասպար Կարապետեան աւելցուցած է. «Լիթուանիոյ խորհրդարանի ինը պատգամաւորներու նախաձեռնութիւնը՝ Արցախի Հանրապետութեան հետ բարեկամութեան խումբ մը ստեղծելու շուրջ, պէտք է օրինակ ծառայէ բոլոր այն քաղաքական անձերուն, որոնք շարունակաբար կը քարոզեն մարդկային իրաւունքներու պաշտպանութիւն եւ ժողովուրդներու ազատ ինքնորոշման իրաւունք: Սակայն անոնց մեծամասնութեան համար յաճախ պետական կարճաժամկէտ կամ անձնական շահը, ըստ երեւոյթին, աւելի ծանր կը կշռէ, քան մարդկային հիմնական վեհ արժէքները»:
Լիթուանիոյ խորհրդարանի ինը պատգամաւորները Փետրուար 26-ին հռչակագիր հրապարակած էին Արցախի Հանրապետութեան հետ բարեկամութեան խումբ ստեղծելու որոշումին մասին: Այդ հռչակագիրի վաւերացումէն ետք, Ատրպէյճան սկսած է ճնշումներ բանեցնելու խորհրդարանականներուն վրայ՝ որոշումը բեկանելու նպատակով, սակայն պատգամաւորները հաստատակամ մնացած են Արցախի Հանրապետութեան հետ բարեկամութեան խումբ ստեղծելու իրենց որոշումին վրայ:
Եւրոպայի Հայ Դատի յանձնախումբի Պրիւքսէլի գրասենեակը, սոյն հռչակագիրի հրապարակումէն անմիջապէս ետք, յատուկ գրութեամբ մը շնորհաւորած էր պատգամաւորները՝ քաջալերելով զանոնք, որ շարունակեն իրենց որոշումը կեանքի կոչելու աշխատանքները եւ անտեսեն Պաքուի անբարոյական, անարժէք ճնշումներն ու սպառնալիքները:

 

LEAVE A REPLY

Please enter your comment!
Please enter your name here