«Ընդդիմութեան Արտաքին Ֆինանսաւորողները Կ՛արգելակեն Սուրիական Տագնապի Լուծումը» Կ՛ըսէ Լաւրով

0
120

Ռուսիոյ արտաքին գործոց նախարար Սերկէյ Լաւրով յայտարարեց, որ սուրիական ընդդիմութեան արտաքին ֆինանսաւորողներէն շատեր Սուրիոյ մէջ երկխօսութեան սկսման ու բռնարարքներու կասեցման արգելք կը հանդիսանան:

Ան Սուրիական ժողովրդավարական փոփոխութեան ուժերու ազգային համակարգումի մարմինի նախագահ Հայսամ Մաննահի հետ երէկ Մոսկուայի մէջ տեղի ունեցած հանդիպումէն առաջ յայտնեց, որ «Սուրիոյ մէջ կացութիւնը չի բարելաւուիր, հակառակ անոր որ բոլոր կողմերը բռնարարքներու կասեցման եւ երկխօսութեան սկսելու կարեւորութեան աւելի գիտակից դարձան: Սակայն զայն արգելակել փորձողներ գոյութիւն ունին, եւ անոնք սակաւաթիւ չեն, անոնց շարքին են ընդդիմութեան արտաքին ֆինանսաւորողները»:

Լաւրով իր խօսքը համակարգումի մարմինին ուղղելով յայտնեց, որ «մենք վստահ ենք, որ իշխանութեան հետ երկխօսութիւն կատարելու հիմամբ ազգային ընդդիմութիւնը միաւորելու ձեր ջանքերը մեր յառաջ մղելիք հոլովոյթին կարեւոր օժանդակութիւն է, եւ Փարիզի մէջ ազգային ընդդիմադիր ուժերու խորհրդաժողովը (երկխօսութեան սկսելու) շինիչ քայլ էր»:

Ռուսիոյ դիւանագիտութեան պետը յիշեցուց, որ սուրիական կառավարութիւնը երկխօսութեան սկսելու վերաբերեալ իր գաղափարները յայտարարեց, եւ ըսաւ. «Կ՛ուզենք այդ երկու հոլովոյթներու միաւորման նպաստել»: «Ամէնէն կարեւորը այն է, որ սուրիացիները իրենց բոլոր հարցերը իրենք լուծեն առանց արտաքին դեղատոմսերու, իրենց երկրին ու քաղաքագէտներուն ճակատագիրը իրենք որոշեն»:

Լաւրովի հետ իր հանդիպումէն ետք Մաննահ յայտնեց, որ «սուրիական ընդդիմութիւնը սուրիական իշխանութեան հետ յառաջիկայ բանակցութեանց համար հասարակաց հիմք մը պէտք է կազմէ»:

Խօսելով Լաւրովի հետ իր հանդիպումին մասին` ան ըսաւ, որ «քննարկումները դրական մթնոլորտի մէջ ընթացան եւ Սուրիոյ տագնապին վերաբերեալ բազմաթիւ հասարակաց կեցուածքներ գոյութիւն ունին»:

Ան աւելցուց, որ «սուրիական տագնապին նկատմամբ Ռուսիոյ եւ Միացեալ Նահանգներու կեցուածքներու մերձեցումը պիտի նպաստէ սուրիական զինեալ ընդդիմութեան վրայ ճնշումի բանեցման` զայն ստիպելու համար երկրին մէջ բռնարարքը դադրեցնելու»` նշելով, որ «Արաբական լիկան պէտք է իր ջանքերը կեդրոնացնէ Ժընեւի համաձայնութեան վրայ հիմնուած երկխօսութեան վրայ»:

Մաննահ յայտնեց, որ քննարկուած է տագնապին առնչակից երկու կողմերուն զէնքերու մատակարարման հարցը, ինչպէս նաեւ ապագային Սուրիան խորհրդարանական երկրի վերածելու կարելիութիւնը` նշելով, որ «Սուրիոյ տագնապին խաղաղ եւ քաղաքական լուծման ճամբան Մոսկուայէն կ՛անցնի»: Ան նշեց, որ քաղաքական լուծումն է, որ Սուրիան Սոմալիի վերածուելէն պիտի փրկէ:

Ռուսիոյ պաշտպանութեան նախարար Սերկէյ Շոյկու յայտարարեց, որ Ռուսիա Միջերկրականի մէջ մնայուն կերպով կայք հաստատած մարտանաւերու խումբ կազմելու եւ ապահովելու բոլոր կարելիութիւնները ունի: Ան նշեց, որ այդ հիմամբ խմբաւորումներ կազմելու որոշում մը որդեգրուած է:

Միւս կողմէ, իսրայէլեան լրատուամիջոցներ հաղորդեցին, որ Կոլանի վրայ գտնուող իսրայէլեան ուժերը պատրաստ վիճակի մէջ դրուած են եւ Իսրայէլի զինուորական ղեկավարութիւնը Սուրիոյ մէջ իրադարձութեանց մօտէն կը հետեւի:

Իսրայէլեան ձայնասփիւռի կայանը հաղորդեց, որ զինեալ սուրիացիներ քանի մը օր առաջ Կոլանի բարձունքներուն վրայ գտնուող ապազինեալ գօտի մուտք գործած են:

«Սքայ Նիուզ» հաղորդեց, որ Դամասկոսի Պապ Շարքի շրջանին մէջ չորս պայթումներ զոհեր եւ վիրաւորներ պատճառած են: «Մայատին» պատկերասփիւռի արբանեակային կայանը հաղորդեց, որ հրասանդի հրթիռներ իյնալով վիրաւորներ պատճառած են: «Մայատին» աւելի ուշ հաղորդեց, որ Դամասկոսի մէջ Թըշրին մարզադաշտի ռմբակոծումը 5 վիրաւոր պատճառած է:

 

 

LEAVE A REPLY

Please enter your comment!
Please enter your name here