ՉԵՄՓԻԸՆԶ ԼԻԿ: ԱՅՍՕՐ՝ ՊԱՐՉԵԼՈՆԱ – Ա.ՍԷ. ՄԻԼԱՆ

0
138

 Եւրոպայի Ախոյեան Ակումբներու Ախոյեանութեան  «Չեմփիընզ Լիկ » մրցաշարքի 1/8-րդ հանգրուանի  դարձի  մրցումներուն գծով,ա յսօր՝  Երեքշաբթի,  12  Մարտ,  երեկոյեան ժամը՝  21.45-ին, Պարչելոնա պիտի   մրցի  Ա.Սէ. Միլանի դէմ:   Երթի  մրցումը  Իտալիոյ մէջ վերջ գտած էր  Միլանի յաղթանակով՝ 2-0: ԵՈՒԵՖԱ-ի  նախագահ  Միշէլ Փլաթինի յայտարարեց, թէ    երկու կոլի տարբերութիւնը   չէզոքացնելը  բաւական  դժուար պիտի ըլլայ  Պարչելոնայի համար:

Ա.Սէ.  Միլանի յարձակող   Ճամփաուլօ   Փացինի, կրնայ բացակայիլ   «Չեմփիընզ Լիկ» բաժակի 1/8 հանգրուանի  գծով  Պարչելոնայի դէմ այսօր  երեկոյեան  տեղի ունենալիք  դարձի մրցումէն:  28-ամեայ  յարձակողը  Ճենովայի դէմ կատարած մրցումին ընթացքին  վնասուածք ստանալով   հեռացաւ դաշտէն:

«Չեմփիընզ Լիկ» մրցաշարքի 1/8րդ  հանգրուանի գծով,   Պարչելոնա – Ա.Սէ.Միլան մրցումին նախօրէին, Միլանի 45-ամեայ մարզիչ  Մաքսիմիլիանօ  Ալեկրի յայտարարեց, թէ   գաթալոնական խումբը աշխարհի ամենահզօրն է:  Նշենք, թէ երկու    հսկաներուն միջեւ երթի մրցումը  վերջ գտած էր  Միլանի  յաղթանակով՝ 2-0:

Նոյն պահուն,  Շալքէ 04 պիտի  ընդունի  Կալաթասարայը:  Երթի հանդիպումը  Իսթանպուլի մէջ վերջ գտած էր 1-1՝ հաւասարութեամբ:

 

ՎԱՂԸ  ՉՈՐԵՔՇԱԲԹԻ՝ ՊԱՅԵՐՆ  ՄԻՒՆԻԽ  –  ԱՐՍԵՆԱԼ

Եւրոպայի  Ախոյեան Ակումբներու Ախոյեանութեան «Չեմփիընզ Լիկ» բաժակի 1/8-րդ  հանգրուանի   դարձի մրցումներուն գծով, Պայերն Միւնիխ իր սեփական՝  Ալիանզ Արենա դաշտին մէջ, Չորեքշաբթի երեկոյեան պիտի ընդունի Արսենալը:  Երթի  հանդիպումը Լոնտոնի մէջ վերջ գտած էր գերմանացիներուն յաղթանակով՝ 3-1:  Մրցումը պիտի սկսի   Պէյրութի ժամով՝ 21.45-ին: Պայերնէի  կազմէն  վնասուածքի պատճառով պիտի  բացակայի  Ֆրանք Ռիպերին: Միջնապահներ   Պասթիան  Շուանշթայկըր եւ  Ճերոմ Պոթենկ  զգուշացումներ ստացած  ըլլալու պատճառով նոյնպէս պիտի  բացակային  մրցումէն:   Արիան Ռոպէնի կացութիւնը կը մնայ կասկածելի՝ ծունկի վնասուածքի հեւեւանքով : Արսենալի յարձակողներէն  Օլիվիէ   Ժիրու ըսաւ, թէ  «Կանըրզ»ներուն  իրաւունք չունին  սխալելու:

Նոյն  ժամուն,  Մալակա պիտի  ընդունի Փորթօն: Երթի մրցումը  աւարտած էր  փորթուգալական խումբին յաղթանակով՝ 1-0:

ՄԱՐԶԱԿԱՆ  ԿԱՐՃ ԼՈՒՐԵՐ

– Անգլիոյ  Փրըմիյէրշիփի Ռիտինկ խումբը պաշտօնէն արձակեց  մարզիչ  Պրայըն  Մաքտերմոթը:  Վերջինիս շատ   հաւանաբար  փոխարինէ Փաուլօ Տի Գանիօն:

–  Զուիցերիական Սիոն  խումբի իտալացի կիսապաշտպան   Ճենարօ Կաթուզօ  յայտարարեց, թէ  ընթացիկ մրցաշրջանի  վերջաւորութեան պիտի աւարտէ  ֆութպոլային ասպարէզը: 35-ամեայ  ֆութպոլիստը մտադրած է  անցնիլ մարզչութեան:  Կաթուզօ   73 անգամ կրած է Իտալիոյ ազգային խումբին շապիկը, նշանակելով մէկ կոլ:

LEAVE A REPLY

Please enter your comment!
Please enter your name here