ՉԵՄՓԻԸՆԶ ԼԻԿ – ՊԱՐՉԵԼՈՆԱ ՀԱՍԱՒ ՔԱՌՈՐԴ ԱՒԱՐՏԱԿԱՆ ՀԱՆԳՐՈՒԱՆ

0
102

Երեքշաբաթի երեկոյեան  գաթալոնիայի Նու Գամփ  մարզադաշտին մէջ, Եւրոպայի Ախոյեան Ակումբներու Ախոյեանութեան  «Չեմփիընզ Լիկ» բաժակի   1/8-րդ հանգրուանի դարձի մրցումներուն գծով, Պարչելոնա ընունեց  Ա.ՍԷ. Միլանը:  Երթի   հանդիպումը ֆութպոլի երկու հսկաներուն միջեւ  վերջ գտած էր   իտալական խումբին յաղթանակով՝ 2-0:  Դարձի  մրցումին  մեկնարկը տրուելէ   հինգ վայրկեան ետք, Զաւիի հետ  կարճ  խաղարկումէ մը ետք, Լիոնէլ Մեսի  բացաւ խաղին հաշիւը:  Պարչելոնա շարունակեց  յարձակումները: 40-րդ վայրկեանին, Ինիէսթայի մէկ փոխանցումին վրայ Մեսի կրկնապատկեց մրցումին արդիւնքը եւ   իր նշանակած  կոլերուն թիւը:  Սպանացիները  ընդմիջումէն ետք շարունակեցին շարունակելով  առաջին  խաղակէսի յարձակողական խաղաոճը:  55-րդ վայրկեանին,  Տաւիտ Վիլա նշանակեց    մրցումին երրորդ կոլը:  Իսկ   մրցումի վերջաւորութեան, հաշուած վայրկեաններուն ընթացքին,  Ճորտի Ալպա   եզրափակեց   իտալացիներուն ողբերգութիւնը, նշանակելով  Պարչելոնայի  չորրորդ  կոլը: Մրցումը վերջ գտաւ 4-0  Պարչելոնայի  արժանի  յաղթանակով:

Մեկնաբանելով իր խումբին յաղթանակը՝   Պարչելոնայի յառաջապահ  Տաւիտ Վիլա ըսաւ, թէ  իր խաղընկերները մրցումին սկիզբէն տրամադրուած էին ջախջախելու Միլանը:« Միլանի դէմ  յաղթանակէն ետք, նշանակութիւն չունի, թէ ով պիտի  դառնայ մեր յաջորդ մրցակիցը» ըսաւ Վիլա:   Յետսապահ    Ճերառ  Փիքէ  յայտնեց, թէ   Պարչելոնա առաջին  իսկ վայրկեանէն կը գերազանցէր  Միլանին:  Ան նաեւ  շնորհակալութիւն յայտնեց   համակիրներուն   քաջալերանքին:  Իսկ  Ա.ՍԷ. Միլանի մարզիչ  Մաքսիմիլանօ Ալեկրէ   ըսաւ, թէ  շատ կը  մեղքանայ իր մարզիկներուն  համար…:

 Գերմանիոյ մէջ ընթացող  Շալքէ 04 – Կալաթասարայ  ճակատումը վերջ գտաւ  թրքական խումբին յաղթանակով՝ 3-2: Երթի  հանդիպումը  Իսթանպուլի մէջ  1-1  հաւասարութեամբ  վերջ գտած ըլլալով,  Կալաթասարայ   ձեռք բերաւ  քառորդ աւարտական հանգրուանի ուղեգիրը:

Նշենք, թէ Ուրբաթ տեղի պիտի ունենայ   քառորդ աւարտականի մրցումներուն վիճակաձգութիւնը:

LEAVE A REPLY

Please enter your comment!
Please enter your name here