ԹՈՒՐՔ ԼՐԱԳՐՈՂ ՄԸ ԵՒՍ ՑԵՂԱՍՊԱՆՈՒԹԻՒՆԸ ՃԱՆՉՆԱԼՈՒ ԶՈՀ

0
100

 Հրանդ Տինքի սպանութեան մէջ թրքական պետութիւնը մեղադրած եւ այդ պատճառով Թուրքիոյ քրէական օրէնսգիրքի տխրահռչակ 301-րդ յօդուածով մեղադրուած Թեմել Տեմիրէրի դէմ՝ նո՛յն մեղադրանքով նոր հետաքննութիւն սկսած է:
Թրքական «Վաթան» թերթի փոխանցումով՝ Անգարայի ոստիկանութիւնը դատախազութեան դիմած է՝ պնդելով, թէ Տեմիրէրի դէմ ոստիկանութեան բացած վերջին դատի աւարտին, Տեմիրէր կրկին յանցանք գործած է՝ ըստ 301-րդ յօդուածին:
Ինչպէս հաղորդած էինք, Փետրուար 19-ին, քաղաքացիական գործերով Անգարայի 2-րդ դատարանը որոշած էր յետաձգել 301-րդ յօդուածով մեղադրուող Տեմիրէրի նկատմամբ հետաքննութիւնն ու դատական գործընթացը, որմէ ետք Տեմիրէր յայտարարած է. «2007-ին ըսած եմ, որ Հրանդ Տինք սպաննուած է պետութեան կողմէ եւ Հայկական Ցեղասպանութիւնը տեղի ունեցա՛ծ է: Ես կրկին կ՛ըսեմ, որ պետութի՛ւնը սպաննած է Տինքը: Թող կրկին դատ բանան դէմս: Այսօր բոլորն էլ գիտեն Հայկական Ցեղասպանութեան մասին»:
Նորագոյն հետաքննութեան մասին լսելէ ետք, Տեմիրէր ըսած է. «Զարմանալի ոչինչ կայ: Կ՛ըսեն, որ փոխուած է մտածելակերպը, բայց կը տեսնենք, որ չէ՛ փոխուած: Կ՛ըսեն, որ Թուրքիան ժողովդրավար կը դառնայ, բայց այդ հաստատումը ճիշդ չէ՛»:

 

LEAVE A REPLY

Please enter your comment!
Please enter your name here