Կը շարունակուի «Հայկական ինքնութեան խնդիրները 21-րդ դարուն» թեմայով գիտաժողովը

0
120

ԵՊՀ  խորհուրդի նիստերու դահլիճին մէջ կը շարունակուի ՀՀ սփիւռքի նախարարութեան, ԵՊՀ սփիւռքագիտութեան ամպիոնի եւ Պէյրութի Հայկազեան համալսարանի Սփիւռքի ուսումնասիրութեան կեդրոնի համատեղ նախաձեռնութեամբ կազմակերպուած «Հայկական ինքնութեան խնդիրները 21-րդ դարուն» խորագիրով գիտաժողովը:

Յիշեցնենք, որ գիտաժողովի նպատակն է քննարկել հայկական ինքնութեան արդի հիմնախնդիրները եւ ճշդել այդ ոլորտին մէջ Հայաստան-Սփիւռք գործակցութեան հնարաւոր ուղիները:

Գիտաժողովի երկրորդ օրուան աշխատանքները «Ինքնութեան կերտման հիմնական գործօնները Սփիւռքի մշակութային եւ քաղաքական ենթահողի վրայ» զեկոյցով սկսաւ աստուածաբանական գիտութիւններու դոկտոր, Պէյրութի Հայկազեան համալսարանի նախագահ  Փոլ Հայտոսթեան:

Այնուհետեւ զեկոյցներով հանդէս եկան պատմական գիտութիւններու դոկտոր, ՀՀ ԳԱԱ պատմութեան ինստիտիւտի յառաջատար գիտաշխատող Էդուարդ Մելքոնեան, ՀՀ սփիւռքի նախարարութեան Հայրենադարձութեան եւ հետազօտութիւններու վարչութեան պետ, ԵՊՀ սփիւռքագիտութեան ամպիոնի դասախօս Արման Եղիազարեան, փիլիսոփայական գիտութիւններու դոկտոր, ԵՊՀ փիլիսոփայութեան ամպիոնի վարիչ Սէյրան Զաքարեան: Հեռակապի միջոցով իր զեկոյցը ներկայացուց հնագիտութեան դոկտոր, Հայկազեան համալսարանի արուեստի եւ գիտութեան բաժինի տեսուչ Արտա Էքմեքճին: «Սփիւռքահայ կնոջ բացակայութիւնը որոշումնառու դիրքերէ ինքնութեան խնդի՞ր, թէ՞ պատեհութեան հարց» հետաքրքիր զեկոյցը ան նուիրեց հայ կանանց:

Ընդմիջումէն ետք իրենց զեկոյցները պիտի ներկայացնեն պատմական գիտութիւններու դոկտոր, ԵՊՀ մշակութաբանութեան ամպիոնի փրոֆէսոր Համլէտ Պետրոսեան, մամուլի լիբանանցի գործիչ Մարուն Սալհանին, պատմական գիտութիւններու թեկնածու, ԵՊՀ հայոց պատմութեան ամպիոնի դոցենտ Արտակ Մովսիսեան, Դամասկոսի պետական համալսարանի դասախօս Նորա Արիսեան, բանասիրական գիտութիւններու թեկնածու, ԵՊՀ սփիւռքագիտութեան ամպիոնի դոցենտ Թադեւոս Տօնոյեան:
Գիտաժողովի աւարտին տեղի  պիտի ունենայ «Սփիւռքագիտութիւն տեսութեան եւ պատմութեան հարցեր» տարեգիրքի (Երեւան 2012)  շնորհանդէսը: Տարեգիրքին մէջ զետեղուած են 2011 թուականին Պէյրութի մէջ տեղի ունեցած «Հայաստան-Սփիւռք գործակցութիւն. երէկ, այսօր, վաղը» խորագիրով գիտաժողովի զեկոյցները:

 

LEAVE A REPLY

Please enter your comment!
Please enter your name here