Նախարար Զօր. Մանճեան Կ՛առաջարկէ Իրաւունքը Իրաւատէրերուն Հասցնող Ընտրական Օրինագիծ Մը

0
116

 Լիբանանի պետական նախարար զօր. Փանոս Մանճեան հարցազրոյցի մը ընթացքին խստիւ մերժեց երկիրը դէպի 1960-ի ընտրական օրէնք տանող որեւէ քայլ՝ կոչ ուղղելով՝ վաւերացնել ընտրական նոր օրէնք մը, որ իրաւունք պիտի հասցնէ իրաւատէրերուն:
Մանճեան շեշտեց, որ համախոհական լուծումի մը յանգելու համար, անհրաժեշտ է գործակցութիւնն ու խորհրդակցութիւնները շարունակել եւ ոչ թէ ձեռնածալ մնալ:
Անդրադառնալով «Մուսթաքպալ» հոսանքի եւ Ընկերվար Յառաջդիմական կուսակցութեան միջեւ բիւրեղացած ընտրական օրինագիծին՝ Մանճեան յայտնեց, որ այդ օրինագիծը «մեռած ծնած է», որովհետեւ քաղաքական իւրաքանչիւր խմբաւորում կ՛ուղղուի դէպի իր անձնական շահերու իրագործումը:
Միւս կողմէ, Փոփոխութիւն եւ Բարեկարգում համախմբումի նախագահ, երեսփոխան զօր. Միշել Աուն շեշտեց, որ այն պաշտօնատարները, որոնք կը մերժեն վաւերացնել «Ուղղափառ հանդիպում»ին մշակած ընտրական օրինագիծը, պատասխանատու են երկրին մէջ տիրող անիշխանութեան: Ան աւելցուց, թէ պետական գանձարկղին ձեռք երկարողները պէտք է հաշուետուութեան ենթարկուին ու ընդգծեց, որ անհրաժեշտ է պետական պաշտօնեաներուն եւ ուսուցիչներուն վերաբերող աշխատավարձի յաւելումները անյապաղ կատարել:

LEAVE A REPLY

Please enter your comment!
Please enter your name here