Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻՆ ՇՆՈՐՀԱՒՈՐԱԿԱՆ ՆԱՄԱԿԸ ՆՈՐԸՆՏԻՐ ՊԱՊԻՆ

0
108
          Ն.Ս.Օ.Տ.Տ. Արամ Ա. Կաթողիկոս հետեւեալ շնորհաւորական նամակը յղեց Հռոմէական Եկեղեցւոյ նորընտիր Սրբազան Քահանայապետ` Նորին Սրբութիւն Ֆրանսիս Ա. Պապին, անոր ընտրութեան առթիւ, 14 Մարտ 2013:

 

 

Ձերդ Սրբութիւն,

 

Հոգեկան անհուն ուրախութեամբ եւ քրիստոնէական սիրոյ ու եղբայրակցութեան ոգիով կ՛ողջունենք Ձեր ընտրութիւնը: Վստահ ենք, որ Հռոմէական Կաթոլիկ եկեղեցին դիմագրաւող մարտահրաւէրներով լեցուն ներկայ ժամանակներուն, Ձեր ընտրութիւնը եկեղեցւոյ առաքելութեան ու վկայութեան նկատմամբ նոր յոյս պիտի բերէ: Ձեր կեանքի պարզութիւնը,  ընկերութեան զրկեալ դասակարգին նկատմամբ Ձեր ունեցած յատուկ հոգածութիւնը եւ Ձեր ամբողջական յանձնառութիւնը եկեղեցւոյ հովուական առաքելութեան, վստահաբար նոր կենսունակութիւն պիտի յառաջացնէ Կաթոլիկ եկեղեցւոյ աւետարանչական առաքելութեան ծիրէն ներս:

 

Մեր հաստատ յոյսն է, որ վերանորոգ թափով պիտի շարունակուին Մեծի Տանն Կիլոիկիոյ Կաթողիկոսութեան եւ Հռոմի Եկեղեցւոյ միջեւ գոյութիւն ունեցող գործակցութիւնը, որ արմատացած է մեր երկու եկեղեցիներու պատմութեան մէջ: Մեր սպասումն է, որ միջ–եկեղեցական յարաբերութեանց այս ժամանակաշրջանին Կաթոլիկ եկեղեցւոյ միջ–եկեղեցական դերակատարկութիւնը աւելի լայն արտայայտութիւն գտնէ միջազգային, շրջանային ու տեղական մակարդակներու վրայ:

 

Այս յոյսով, կրկին անգամ Ձերդ Սրբութեան կը փոխանցենք Մեր եղբայրական սէրն ու ջերմ շնրոհաւորութիւնները: Կա՛ղօթենք առ Բարձրեալն Աստուած, որ Ձեզ զօրացնէ ֆիզիքապէս ու հոգեպէս որպէսզի կարողանաք զօրեղ հաւատքով ու յստակ տեսիլքով կատարել Ձեզի վստահուած հայրապետական առաքելութիւնը` բազմազան մարտահրաւէրներով լեցուն ներկայ ժամանակներուն:

 

                                                                                                                                      Ձերդ Քրիստոսով`

 

ԱՐԱՄ Ա. ԿԱԹՈՂԻԿՈՍ

ՄԵԾԻ ՏԱՆՆ ԿԻԼԻԿԻՈՅ

*********

LEAVE A REPLY

Please enter your comment!
Please enter your name here