Հայ-Թրքական Յարաբերութիւններու «Բնականոնացման» Միջնորդական Ջանքերը Կը Շարունակուին

0
105

 Հայաստանի մօտ Զուիցերիոյ դեսպան Կոնսթանթին Օպոլենսքին «Ազատութիւն» ձայնասփիւռի կայանին հետ ունեցած զրոյցին ընթացքին յայտնած է, որ ներկայ հանգրուանին շեշտը դրուած է Հայաստանի ու Թուրքիոյ քաղաքացիական հասարակութիւններուն միջեւ կամուրջներու կառուցման վրայ, որովհետեւ անիկա կրնայ նպաստել երկու պետութիւններուն միջեւ յարաբերութիւններու բնականոնացման։
Անոր համաձայն, Զուիցերիա կը շարունակէ միջնորդական ջանքեր գործադրել՝ Հայաստանի ու Թուրքիոյ միջեւ յարաբերութիւններու բնականոնացման եւ երկու երկիրներուն միջեւ սահմանի վերաբացման ուղղութեամբ:
«Ինչպէս գիտենք, (հայ-թրքական յարաբերութիւններու կարգաւորման) գործընթացը ներկայիս կը գտնուի  երկու երկիրներու խորհրդարաններուն մէջ, եւ շատ բաներ փոխուած են այն պահէն ի վեր, երբ 2009 թուականին Ցիւրիխի մէջ ստորագրուեցան (հայ-թրքական) արձանագրութիւնները: Այժմ երկու երկիրներու կառավարութիւնները, խորհրդարանները պէտք է որոշեն՝ առաջ շարժուել, կամ ո»չ, դիտել տուած է դեսպանը։ Կոնսթանթին Օպոլենսքի աւելցուցած է. «Այսօր մենք կը խրախուսենք քաղաքացիական հասարակութեան առնչուած նախաձեռնութիւնները, որոնք այս գործընթացի յառաջդիմութեան կը նպաստեն, քանի որ վստահ ենք, որ սահմանները պէտք չէ փակ ըլլան, յատկապէս 21րդ դարուն: Սահմանի երկու կողմերը գտնուող մարդիկ պէտք է ճանչնան զիրար, որովհետեւ հայերն ու թուրքերը դրացիներ են, եւ ես տարիներէ ի վեր ապրելով Հայաստանի մէջ, ատիկա շատ լաւ հասկցած եմ»։
Պատասխանելով «Ազատութեան» այն հարցումին, թէ իբրեւ դեսպան ի՞նչ նախատեսութիւններ կրնայ ընել, յառաջիկային ի՞նչ ընթացք պիտի ստանայ հայ–թրքական յարաբերութիւններու բնականոնացման գործընթացը՝ զուիցերիացի դիւանագէտը արձագանգած է. «Ես կը դժուարանամ կանխատեսումներ ընելու: Չեմ գիտեր, թէ ինչպէ՛ս պիտի զարգանայ գործընթացը մօտիկ ապագային, բայց յոյս ունիմ եւ կը հաւատամ, որ երկար ատեն (հայ- թրքական) սահմանը փակ պիտի չըլլայ, որովհետեւ ատիկա բնական չէ»:
«Եւրոպայի մէջ մենք նման փորձառութիւն ունինք, երբ սահմանները փակուած էին: Ես կը յիշեմ իմ երիտասարդութեան տարիներս, երբ այդ սահմանները բացուեցան, ինչ թեթեւութիւն իջաւ բոլորիս վրայ, եւ ես վստահ եմ պիտի գայ այն օրը եւ նման թեթեւութիւն պիտի զգան հայ ու թուրք ժողովուրդները, երբ այս հարցը լուծուի», եզրափակած է Կոնսթանթին Օպոլենսքի։

 

LEAVE A REPLY

Please enter your comment!
Please enter your name here