ԵՈՒՎԵՆԹՈՒՍ ԵՒ ԵՈՒՆԱՅԹԸՏ ԿԸ ՍՈՒՐԱՆ

0
122

 Իտալիոյ  ֆութպոլի ախոյեանութեան  29-րդ  հանգրուանի մրցումներուն, Եուվենթուսի կազմը  օտար դաշտի մէջ  2-0 արդիւնքով պարտութեան  մատնեց  Պոլոնիան (կիսախաղ՝ 0-0):  Հանդիպման  երկրորդ կիսախաղին,   Միրքօ  Վուչինիչ եւ  Գլաուտիօ   Մարքիզօ  նշանակեցին   Եուվէ-ի կոլերը:  Սոյն  յաղթանակէն ետք Անթոնիօ  Գոնթիի խումբը  12 կէտով կը գերազանցէ  երկրորդ դիրքի վրայ գտնուող Նափոլիին:  Ուտինեզէ    3-1 արդիւնքով պարտութիւն մը  կրեց   Գալիարիէն:

Սպանիոյ   ֆութպոլի ախոյեանութեան 28-րդ հանգրուանի մրցումներուն գծով,  Ռէալ Մատրիտ  5-2 արդիւնքով պարտութեան մատնեց Մայորքան:  Մրցումի ընթացքին  Քրիսթիանօ  Ռոնալտօ նշանակեց ասպարէզի իր 350-րդ կոլը (189-րդը՝ Ռէալի շապիկով):    Կոնզալօ Հիկուային (2), Լուքա Մոտրիչ եւ Քարիմ Պենզեմա ամբողջացուցին «Արքայական  խումբին» կոլերու փառատօնը:   Ներկայիս  Ռէալ Մատրիտ 61 կէտով  կը գրաւէ ընդհանուր դասաւորման   երկրորդ դիրքը:  Կեթաֆէ՝ 1-0 արդիւնքով պարտութեան մատնեց Աթլեթիք  Պիլպաօն:

Գերմանիոյ ախոյեանութեան   26-րդ հանգրուանի մրցումներուն,  Պորուսիա  Տորթմունտ  5-1արդիւնքով   պարտութեան մատնեց   Ֆրայպուրկը:   Ռոպերթ  Լեվանտովսքի  երկու կոլ  ուղարկելով    Ֆրայպուրկի   բերդին մէջ,   ակումբային մրցանիշ մը սահմանեց:  Լեհաստանի հաւաքականի յարձակողը  ախոյեանութեան ութ   յաջորդական մրցումներու ընթացքին  կը նշանակէ  8-րդ  յաջորդական կոլը,  գերազանցելով   Ֆրիտհելմ  Քոնեցքիի   մրցանիշը, որ 1964-65  մարզական տարեշրջանին  եօթ կոլ նշանակած էր՝ եօթ անընդմէջ  մրցումներու ընթացքին :   Նիւրենպուրկ  3-0 արդիւքով պարտութեան մատնեց  Շալքէ 04-ը:

 Պայերն    Միւնիխ  մրցակիցի  դաշտին մէջ  2-1 արդիւնքով  պարտութեան  մատնեց  Պայէր Լեվերքուզէնը:  Մարիօ   Կոմէզ եւ   Ֆիլիփ  Վոլսայտ (սեփական  բերդէն ներս)   դարձան  Պայերնի յաղթանակին հերոսները:   Պայերն   Միւնիխ  69 կէտով կը գլխաւորէ ընդհանուր դասաւորումը՝ քսան կէտով  գերազանցելով  երկրորդ դիրքի վրայ գտնուոաղ   Պորուսիա Տորթմունտին:

Ուքրանիոյ ախոյեանութեան  21-րդ հանգրուանի մրցումներուն գծով,  Տոնեցքի Շախտիորը  ընդունեց   Տոնպաս Արենան եւ երեք անպատասխան գնդակ զետեղեց անոր  բերդին մէջ:   Սոյն  մրցումին ընթացքին,  Հենրիկ  Մխիթարեան, ոչ միայն կոլ մը նշանակեց, այլեւ՝  100-րդ մրցումը կատարեց  Շախտիորի շապիկով:

 Անգլիոյ  ախոյեանութեան  30-րդ  հանգրուանի մրցումներուն  Մանչեսթըր Եունայթըտ  1-0 արդիւնքով   յաղթանակ մը արձանագրեց    Ռետինկի դէմ:   Եունայթիտ կոլը, մրցումի 21-րդ վայրկեանին  նշանակեց Ուէյն Ռունին: Սըր Ալեքս Ֆերկըսընի խումբը 74 կէտով կը գլխաւորէ ընդհանուր դասաւորումը:  Եունայթըտ՝ 15 կէտի առաւելութիւն մը ունի երկրորդ դիրքի վրայ գտնուող  Մանչեսթըր Սիթիէն, որ 2-0 արդիւնքով  ծանր պարտութիւն մը կրեց  Էվըրթընէն:  Արսենալ՝  2-0 արդիւնքով պարտութեան մատնեց Սուանսին: Լիվըրփուլ 3-1արդիւնքով  պարտուեցաւ  Սաութեմթընէն:

 Ֆրանսայի ախոյեանութեան  29-րդ    հանգրուանի մրցումներուն,   Պասթիայի կազմը սեփական դաշտին մէջ  4-1 արդիւնքով  փայլուն  յաղթանակ  մը արձանագրեց  Լիոնի դէմ:  Պարտութիւնը  ծանր հարուած մըն էր, ախոյեանութեան տիտղոսին տիրանալու Լիոնի յոյսերուն:  Ներկայիս Լիոն  53  կէտով կը  մնայ ընդհանուր դասաւորման երրորդ դիրքին վրայ:  

 

ՔԻՄԻ  ՌԱՅՔՈՆԷՆ  ՇԱՀԵՑԱՒ   ԱՒՍՏՐԱԼԻՈՅ ԿՐԱՆ ՓՐԻՆ

 Ֆորմիւլա  1 Ինքնաշարժներու  աշխարհի ախոյեանութիւնը սկսաւ   Լոթիւս  ինքնաշարժի վարորդ    Քիմի Ռայքոնէնի յաղթանակով,  երբ  29-ամեայ  ֆինը շահեցաւ Մելպուռնի Կրան Փրին:   Ֆեռնանտօ Ալոնզօ  (Ֆեռարի)   երկրորդ հանդիսացաւ,  Սեպասթիան Վեթէլ   (Ռէտ Պուլ) երրորդ:

 

ՆԱՏԱԼ ԵՒ   ՏԷԼ  ՓՈԹՐՕ՝  ԻՆՏԻԱՆ ՈՒԵԼՍ   ՄՐՑԱՇԱՐՔԻ ԱՒԱՐՏԱԿԱՆԻՆ

Արժանթինցի  մարզիկ  Մարթին Տէլ   Փոթրօ   հասաւ   Միացեալ Նահանգներու   թենիսի  միջազգային Ինտիան  Ուելս  մրցաշարքի աւարտականին:   Կիսաւարտական   մրցումին,  Տէլ Փոթրօ՝   4-6, 6-4, 6-4 արդիւնքով պարտութեան մատնեց  Նովաք   Տիոքովիչը: Աւարտականին, Տէլ  Փոթրոյի մրցակիցը պիտ իըլլայ  Ռաֆայէլ Նատալը:

 

ԱՐՈՆԵԱՆ ՊԱՐՏՈՒԹԵԱՆ  ՄԱՏՆԵՑ  ԿԱԼՎԱՆՏԸ

Ճատրակի   միջազգային   ֆետերասիոնի   կողմէ կազմակերպուած  աշխարհի ախոյեանութեան  յաւակնորդներու  երկրորդ  հանգրուանի մրցումներուն,  Լեւոն Արոնեան  պարտութեան  մատնեց   Պորիս Կալվանտը:  Այս  յաղթանակէն ետք, Արոնեան   ձեռք  բերած է  1.5  կէտ:  Արոնեանի   մրցակիցը երրորդ հանգրուանին պիտի ըլլայ  Վասիլի Իվանչուքը:  Նշենք, թէ   մրցաշարքի առաջին մրցումին, Արոնեան  հաւասարութիւն մը արձանագրեց  Մակնուս Գարլսընի հետ:

 

ՄԱՐԶԱԿԱՆ  ԿԱՐՃ ԼՈՒՐԵՐ

–         Պարչելոնայի նախկին կիսապաշտպան  Ռիվալտօ  կը պատրաստուի հետեւիլ մարզչութեան:  40-ամեայ ֆութպոլիստը պայմանագրութիւն  մը ստորագրած է    Սան  Քայէթանօ ակումբին հետ:   Ռիվալտօ պատրաստակամութիւն յայտնեց  ստանձնելու Պարչելոնայի  մարզչութեան պաշտօնը, եթէ  սպանական  ակումբը  դիմէ  իր ծառայութեան:

–         WBO  կարգի  բռնցքամարտի աշխարհի ախոյեան  Արթուր Աբրահամ  կը խոստանայ  յաղթանակով աւարտել   Ռոպերթ   Շթիլինկի   դէմ    փոխվրէժի   ճակատումը:  Մրցումը տեղի պիտի ունենայ   Գերմանիոյ Մակտեպուրկ  քաղաքին մէջ,  23  Մարտին:  Նշենք, թէ Աբրահամ   25 Օգոստոս  2012-ին մրցավարներու  միաձայն որոշումով պարտութեան մատնեց  Շթելիկը:

–          Հայաստանի  ազգային խումբի  եւ  Քուպանի կիսապաշտպան Արաս  Օզպիլիս  պիտի  բացակայի  Մոնտիալ  2014-ի զտման  մրցումներուն գծով  26  Մարտին, Երեւանի մէջ   Չեխիոյ դէմ տեղի ունենալիք   հանդիպումէն: 23-ամեայ ֆութպոլիստը  վնասուածքի  հետեւանքով առնուազն 15 օր  պիտի  բացակայի  դաշտերէն:

–          Սպանական   մարզաթերթերու կողմէ  կազմակերպուած հարցախոյզ մը ցոյց կու տայ, թէ Ռէալ Մատրիտ ակումբի անդամներուն  89.7 առ հարիւրը  կը փափաքի, որ Ժոզէ Մուրինիօ շարունակէ  գլխաւոր մարզիչի պաշտօնը:  Մուրինիոյի պայմանագրութիւնը  Ռէալի հետ կ’աւարտի  2016-ի ամրան:

–          Իտալական  Ինթէր Միլան ակումբը յաջողեցաւ   համոզել  Պարչելոնայի եւ Չիլիի ազգային  խումբի  յարձակող  Ալեքսիս Սանչէսը, որպէսզի յառաջիկայ  տարեշրջանի կրէ    Ինթէրի շապիկը:   Սանչէսէն բացի, իտալական ակումբը  կը փափաքի իր կազմին մէջ ունենալ  Մարթին  Մոնթոյան եւ Ալեքս Սոնկը:

–         Լոնտոնեան Արսենալը  մտադրածէ   փոխանցումային պատուհանի ժամանակ իր կազմին մէջ ունենալ  Ֆիորենթինայի յարձակող   Սթեֆան   Եովեթիչը:  Ֆիորենթինա առնուազն  20  միլիոն  սթերլին գումար մը պիտի  պահանջէ  Եովեթիչի համար:

–         ԷՆ.ՊԻ.ԷՅ-ի մրցումներուն գծով,   ընթացիկ տարուան ախոյեան  Մայէմի Հիթ արձանագրեց յաջորդական իր   21-րդ  յաղթանակը, երբ   107-94 արդիւնքով պարտութեան  մատնեց     Միլուոքի Պաքսը:

–           Ռէալ Մատրիտի եւ  Ֆրանսայի  հաւաքականի յարձակող  Քարիմ   Պենզեմա յայտարարեց, թէ անկախ   Ժոզէ Մորինիոյի ճակատագիրէն,  ինք պիտի մնայ արքայական  ակումբին  հետ:   Մարզական   թերթերու համաձայն,   Պենզեմա կրնայ    փոխանցուիլ  Փարի Սէն  Ժերմէնին:

–         Ռուս՝ Թաթիանա Վոլոսոժար եւ  Մաքսիմ  Թրանքով զոյգը   նուաճեցին   գանատական Լոնտոնի մէջ տեղի ունեցող,  գեղասահքի աշխարհի ախոյեանութեան պարային զոյգերու  ախոյեանի տիտղոսը:

 Պարչելոնայի եւ   Սպանիոյ հաւաքականի 34-ամեայ յետսապահ Գարլոս Փույոլ ենթարկուեցաւ  ծնկայօդի վիրահատութեան:  Շատ հնարաւոր, է որ Փույոլլ   մինչեւ   Մայիս բացակայի դաշտերէն

LEAVE A REPLY

Please enter your comment!
Please enter your name here