ԵՈՒՎԵՆԹՈՒՍ ԵՒ ԵՈՒՆԱՅԹԸՏ ԿԸ ՍՈՒՐԱՆ – ՄԵՍԻ ՆՇԱՆԱԿԵՑ ՅԱՋՈՐԴԱԿԱՆ 18-ՐԴ ԿՈԼԸ

0
194

 Իտալիոյ  ֆութպոլի ախոյեանութեան  29-րդ  հանգրուանի մրցումներուն, Եուվենթուս օտար դաշտի մէջ  2-0 արդիւնքով պարտութեան  մատնեց  Պոլոնիան (կիսախաղ՝ 0-0):  Հանդիպման  երկրորդ կիսախաղին,   Միրքօ  Վուչինիչ եւ  Գլաուտիօ   Մարքիզօ  նշանակեցին   Եուվէ-ի կոլերը:  Սոյն  յաղթանակէն ետք, Անթոնիօ  Գոնթիի խումբը  11 կէտով կը գերազանցէ  երկրորդ դիրքի վրայ գտնուող Նափոլիին, որ  սեփական դաշտին մէջ 2-2 արդիւնքով հաւասրութիւն մը արձանագրեց Աթալանթայի դէմ:   Ուտինեզէ    3-1 արդիւնքով պարտութիւն մը  կրեց   Գալիարիէն:

 Սան Սիրօ մարզադաշտին մէջ,  Մարիօ Պալոթելիի զոյգ կոլերը բաւարար էին, որպէսզի  Ա.Սէ. Միլան  2-0արդիւնքով յաղթանակ մը  արձանագրէ  Փալերմոյի դէմ: Սամփտորիա –  Ինթէր հանդիպումը յետաձգուեցաւ՝  անբարենպաստ եղանակի  պատճառով: Ռոմա բարձրացաւ աղիւսակին   5-րդ դիրքը, շնորհիւ Փարմայի դէմ  արձանագրած 2-0 յաղթանակին:  Ռոմայի միջնապահ՝ Թոթի  նշանակած կոլերուն թիւը  բարձրացուց 226-ի, դառնալով  Իտալիոյ  ֆութպոլի պատմութեան երկրորդ  ռմբարկուն:  Նշենք, թէ   առաջին դիրքը կը գրաւէ   Սիլվիօ  Փիոլան՝  247 կոլ:

Սպանիոյ   ֆութպոլի ախոյեանութեան 28-րդ հանգրուանի մրցումներուն գծով, Պարչելոնայի արժանթինցի յարձակող Լիոնէլ Մեսի  արձանագրեց  հերթական  մրցանիշը , երբ   Ռայօ Վալեքանոյի դէմ իր կազմին տարած  3-1 յաղթանակին ընթացքին նշանակեց  յաջորդական իր  18-րդ կոլը:  Պարչելոնա   կէտերուն  թիւը  բարձրացուց  74 –ի:  Ռէալ Մատրիտ՝  5-2 արդիւնքով պարտութեան մատնեց Մայորքան:  Մրցումի ընթացքին  Քրիսթիանօ  Ռոնալտօ նշանակեց ասպարէզի իր 350-րդ կոլը (189-րդը՝ Ռէալի շապիկով):    Կոնզալօ Հիկուային (2), Լուքա Մոտրիչ եւ Քարիմ Պենզեմա ամբողջացուցին «Արքայական  խումբին» կոլերու փառատօնը:   Ներկայիս  Ռէալ Մատրիտ 61 կէտով  կը գրաւէ ընդհանուր դասաւորման   երկրորդ դիրքը:  Կեթաֆէ՝ 1-0 արդիւնքով պարտութեան մատնեց Աթլեթիք  Պիլպաօն:

Գերմանիոյ ախոյեանութեան   26-րդ հանգրուանի մրցումներուն,  Պորուսիա  Տորթմունտ  5-1արդիւնքով   պարտութեան մատնեց   Ֆրայպուրկը:   Ռոպերթ  Լեվանտովսքի  երկու կոլ  ուղարկելով    Ֆրայպուրկի   բերդին մէջ,   ակումբային մրցանիշ մը սահմանեց:  Լեհաստանի հաւաքականի յարձակողը  ախոյեանութեան ութ   յաջորդական մրցումներու ընթացքին  կը նշանակէ  8-րդ  անընդմէջ կոլը,  գերազանցելով   Ֆրիտհելմ  Քոնեցքիի   մրցանիշը, որ 1964-65  մարզական տարեշրջանին,  եօթ անընդմէջ  մրցումներու ընթացքին նշանակած էր  նոյնքան  թիւով կոլ :   Նիւրենպուրկ  3-0 արդիւքով պարտութեան մատնեց  Շալքէ 04-ը:

 Պայերն    Միւնիխ  մրցակիցի  դաշտին մէջ  2-1 արդիւնքով  պարտութեան  մատնեց  Պայէր Լեվերքուզէնը:  Մարիօ   Կոմէզ եւ   Ֆիլիփ  Վոլսայտ (սեփական  բերդէն ներս)   դարձան  Պայերնի յաղթանակին հերոսները:   Պայերն   Միւնիխ  69 կէտով կը գլխաւորէ ընդհանուր դասաւորումը՝ քսան կէտով  գերազանցելով  երկրորդ դիրքի վրայ գտնուոաղ   Պորուսիա Տորթմունտին:

Ուքրանիոյ ախոյեանութեան  21-րդ հանգրուանի մրցումներուն գծով,  Տոնեցքի Շախտիորը  ընդունեց   Տոնպաս Արենան եւ երեք անպատասխան գնդակ զետեղեց անոր  բերդին մէջ:   Սոյն  մրցումին ընթացքին,  Հենրիկ  Մխիթարեան, ոչ միայն կոլ մը նշանակեց, այլեւ՝  100-րդ մրցումը կատարեց  Շախտիորի շապիկով:

 Անգլիոյ  ախոյեանութեան  30-րդ  հանգրուանի մրցումներուն  Մանչեսթըր Եունայթըտ  1-0 արդիւնքով   յաղթանակ մը արձանագրեց    Ռետինկի դէմ:   Եունայթըտի կոլը, մրցումի 21-րդ վայրկեանին  նշանակեց Ուէյն Ռունին: Սըր Ալեքս Ֆերկըսընի խումբը 74 կէտով կը գլխաւորէ ընդհանուր դասաւորումը:  Եունայթըտ՝ 15 կէտի առաւելութիւն մը  կը վայելէ երկրորդ դիրքի վրայ գտնուող  Մանչեսթըր Սիթիի նկատմամբ, որ 2-0 արդիւնքով  ծանր պարտութիւն մը կրեց  Էվըրթընէն:  Արսենալ՝  2-0 արդիւնքով պարտութեան մատնեց Սուանսին: Լիվըրփուլ 3-1արդիւնքով  պարտուեցաւ  Սաութեմթընէն:   Թոթենհամ  սեփական դաշտին  մէջ  1-0 արդիւնքով անկակնկալ պարտութիւն մը կրեց  Ֆուլամէն:   Տիմիթար Պերպաթով մրցումի   52-րդ վայրկեանին նշանակեց  մրցումին  միակ կոլը:  Թոթենհամ՝  54 կէտով մնաց չորրորդ դիրքի վրայ: Սթեմֆորտ Պրիճ մարզադաշտին մէջ, Չելսի  2-0 արդիւնքով պարտութեան մատնեց  Ուեսթ Համ  Եունայթտը:   Ֆրենք Լամփարտ եւ Էտին Հազարտ  նշանակեցին  «Կապոյտներ»ուն կոլերը:  Սոյն յաղթանակէն ետք՛ Չելսի  շրջանցեց  Թոթենհամը եւ   55 կէտով գրաւեց ընդհանուր դասաւորման  երրորդ դիրքը:  Ուիկան՝ 2-1 արդիւնքով պարտութեան մատնեց Նիուքասլ Եունայթըտը:

 Ֆրանսայի ախոյեանութեան  29-րդ    հանգրուանի մրցումներուն,   Պասթիայի կազմը սեփական դաշտին մէջ  4-1 արդիւնքով  փայլուն  յաղթանակ  մը արձանագրեց  Լիոնի դէմ:  Պարտութիւնը  ծանր հարուած մըն էր, ախոյեանութեան տիտղոսին տիրանալու Լիոնի յոյսերուն:  Փարի Սէն Ժերմէն  2-2 արդիւնքով հաւասարութեամբ մը գոհացաւ Սէն Թեթիէնի դէմ:

Փարիզցիներըւ  58 կէտով կը գրաւեն ընդհանուր դասաւորման առաջին  դիրքը:  Լիոն՝  53 կէտով կը գրաւէ երկրորդ  դիրքը:

ՔԻՄԻ  ՌԱՅՔՈՆԷՆ  ՇԱՀԵՑԱՒ   ԱՒՍՏՐԱԼԻՈՅ ԿՐԱՆ ՓՐԻՆ

 Ֆորմիւլա  1 Ինքնաշարժներու  աշխարհի ախոյեանութիւնը սկսաւ   Լոթիւս  ինքնաշարժի վարորդ    Քիմի Ռայքոնէնի յաղթանակով,  երբ  29-ամեայ  ֆինը շահեցաւ Մելպուռնի Կրան Փրին:   Ֆեռնանտօ Ալոնզօ  (Ֆեռարի)   երկրորդ հանդիսացաւ,  Սեպասթիան Վեթէլ   (Ռէտ Պուլ) երրորդ:

 

ՆԱՏԱԼ ԵՒ   ՇԱՐԱՓՈՎԱ  ՝  ԻՆՏԻԱՆ ՈՒԵԼՍ   ՄՐՑԱՇԱՐՔԻ  ՏԻՏՂՈՍԱԿԻՐ

Միացեալ Նահանգներու  Ինտիան  Ուելս   թենիսի  աղջկանց միջազգային  մրցաշարքը  վերջ գտաւ Մարիա Շարափովայի յաղթանակով:  Աւարտական   մրցումին,  Շարափովա  6-2, 6-2արդիւնքով պարտութեան մատնեց Գարոլայն Վոզնիաքիին:   Տիտղոսը՝ Շարափովայի  28-րդ էր  արհեստավարժ դառնալէ ետք, եւ այս տարուան առաջինը:  Սոյն  յաղթանակէն ետք, Շարափովա կը գրաւէ   թենիսի աղջկանց  համաշխարհային դասաւորման երկրորդ դիրքը:  Իր կարգին, Ռաֆայէլ Նատալ շահեցաւ   տղոց  մրցաշարքը, աւարտական մրցումին  4-6, 6-3, 6-4 արդիւնքով պարտութեան մատնելով  Մարթին Տէլ Փոթրօն:

 

ԱՐՈՆԵԱՆ ՊԱՐՏՈՒԹԵԱՆ  ՄԱՏՆԵՑ  ԿԱԼՎԱՆՏԸ  ԵՒ ԻՎԱՆՉՈՒՔԸ

Ճատրակի   միջազգային   ֆետերասիոնի   կողմէ կազմակերպուած  աշխարհի ախոյեանութեան  յաւակնորդներու  մրցումներուն,  Լեւոն Արոնեան արձանագրեց երկու յաջորդական յաղթանակ: Նշենք, թէ   մրցաշարքի առաջին մրցումին, Արոնեան  հաւասարութիւն մը արձանագրեց  Մակնուս Գարլսընի հետ:  Երկորդ հանգրուանին, հայ ճատրակիստը   պարտութեան  մատնեց   Պորիս Կալվանտը:   Իսկ երրորդին՝ առաւելութեան հասաւ  ուքրանացի  վարպետ  Վասիլի Իվանչուքի դէմ:  Այս  յաղթանակներէն ետք, Արոնեան   ձեռք  բերած է  2.5  կէտ: Ան միանձնեայ կը գրաւէ  մրցաշարքին աղիւսակը:   Արոնեանի մրցակիցը  չորրորդ հանգրուանին պիտի ըլլայ  Փիոթըր  Սվիտլըրը:  Հանդիպումը տեղի պիտի ունենայ  Երեքշաբթի, 19 Մարտին:

 

ՄԱՐԶԱԿԱՆ  ԿԱՐՃ ԼՈՒՐԵՐ

–         Պարչելոնայի նախկին կիսապաշտպան  Ռիվալտօ  կը պատրաստուի հետեւիլ մարզչութեան:  40-ամեայ ֆութպոլիստը պայմանագրութիւն  մը ստորագրած է    Սան  Քայէթանօ ակումբին հետ:   Ռիվալտօ պատրաստակամութիւն յայտնեց  ստանձնելու Պարչելոնայի  մարզչութեան պաշտօնը, եթէ  սպանական  ակումբը  դիմէ  իր ծառայութեան:

–         WBO  կարգի  բռնցքամարտի աշխարհի ախոյեան  Արթուր Աբրահամ  կը խոստանայ  յաղթանակով աւարտել   Ռոպերթ   Շթիլինկի   դէմ    փոխվրէժի   ճակատումը:  Մրցումը տեղի պիտի ունենայ   Գերմանիոյ Մակտեպուրկ  քաղաքին մէջ,  23  Մարտին:  Նշենք, թէ Աբրահամ   25 Օգոստոս  2012-ին մրցավարներու  միաձայն որոշումով պարտութեան մատնեց  Շթելիկը:

–          Հայաստանի  ազգային խումբի  եւ  Քուպանի կիսապաշտպան Արաս  Օզպիլիս  պիտի  բացակայի  Մոնտիալ  2014-ի զտման  մրցումներուն գծով  26  Մարտին, Երեւանի մէջ   Չեխիոյ դէմ տեղի ունենալիք   հանդիպումէն: 23-ամեայ ֆութպոլիստը  վնասուածքի  հետեւանքով առնուազն 15 օր  պիտի  բացակայի  դաշտերէն:

–          Սպանական   մարզաթերթերու կողմէ  կազմակերպուած հարցախոյզ մը ցոյց կու տայ, թէ Ռէալ Մատրիտ ակումբի անդամներուն  89.7 առ հարիւրը  կը փափաքի, որ Ժոզէ Մուրինիօ շարունակէ  գլխաւոր մարզիչի պաշտօնը:  Մուրինիոյի պայմանագրութիւնը  Ռէալի հետ կ’աւարտի  2016-ի ամրան:

–          Իտալական  Ինթէր Միլան ակումբը յաջողեցաւ   համոզել  Պարչելոնայի եւ Չիլիի ազգային  խումբի  յարձակող  Ալեքսիս Սանչէսը, որպէսզի յառաջիկայ  տարեշրջանի կրէ    Ինթէրի շապիկը:   Սանչէսէն բացի, իտալական ակումբը  կը փափաքի իր կազմին մէջ ունենալ  Մարթին  Մոնթոյան եւ Ալեքս Սոնկը:

–         Լոնտոնեան Արսենալը  մտադրածէ   փոխանցումային պատուհանի ժամանակ իր կազմին մէջ ունենալ  Ֆիորենթինայի յարձակող   Սթեֆան   Եովեթիչը:  Ֆիորենթինա առնուազն  20  միլիոն  սթերլին գումար մը պիտի  պահանջէ  Եովեթիչի համար:

–         ԷՆ.ՊԻ.ԷՅ-ի մրցումներուն գծով,   ընթացիկ տարուան ախոյեան  Մայէմի Հիթ արձանագրեց յաջորդական իր   21-րդ  յաղթանակը, երբ   107-94 արդիւնքով պարտութեան  մատնեց     Միլուոքի Պաքսը:

–           Ռէալ Մատրիտի եւ  Ֆրանսայի  հաւաքականի յարձակող  Քարիմ   Պենզեմա յայտարարեց, թէ անկախ   Ժոզէ Մորինիոյի ճակատագիրէն,  ինք պիտի մնայ արքայական  ակումբին  հետ:   Մարզական   թերթերու համաձայն,   Պենզեմա կրնայ    փոխանցուիլ  Փարի Սէն  Ժերմէնին:

–         Ռուս՝ Թաթիանա Վոլոսոժար եւ  Մաքսիմ  Թրանքով զոյգը   նուաճեցին   գանատական Լոնտոնի մէջ տեղի ունեցող,  գեղասահքի աշխարհի ախոյեանութեան պարային զոյգերու  ախոյեանի տիտղոսը:

–          Պարչելոնայի եւ   Սպանիոյ հաւաքականի 34-ամեայ յետսապահ Գարլոս Փույոլ ենթարկուեցաւ  ծնկայօդի վիրահատութեան:  Շատ հնարաւոր, է որ Փույոլլ   մինչեւ   Մայիս բացակայի դաշտերէն:

LEAVE A REPLY

Please enter your comment!
Please enter your name here