Հայերէն Ներողութիւն Պէտք Է Խնդրել, Կ՛ըսէ Թուրք Նախկին Դիւանագէտ Մը

0
126

 Թուրք նախկին դիւանագէտ, Թուրքիոյ արդիւնաբերողներու եւ գործարարներու միութեան տնօրէններու խորհուրդի մնայուն անդամ Վոլքան Վուրալ կրկին պնդած է, որ պէտք է յարաբերութիւններ ստեղծել Հայաստանի հետ, եւ Թուրքիան, առանց ընդունելու Հայկական Ցեղասպանութիւնը՝ պէտք է հայերէն ներողութիւն խնդրէ տեղի ունեցած ողբերգութեան համար:
Վոլքան Վուրալ թրքական «Haber7»ի թղթակիցին հետ հարցազրոյցի մը ընթացքին կրկնած է տարիներ առաջ իր կատարած յայտարարութիւնը, որուն խստօրէն հակադարձած էին Թուրքիոյ մէջ: «Այս հողերուն վրայ միլիոնի մօտ հայ ապրած է: Անոնք այս հողերու զաւակներն են: Շարք մը իրադարձութիւններ եղած են: Ոմանք անոնց «ցեղասպանութիւն» անունը կու տան, ոմանք ալ՝ «մեծ ողբերգութիւն»: Եթէ ինծի մնայ՝ այդ մէկը տեղահանութիւն էր ու ողբերգութիւն: Ի հարկէ, այն ժամանակուան Օսմանեան պետութիւնը մեղաւոր էր: Այդ մեղքին պատճառով, կարելի է ներողութիւն խնդրել: Ի հարկէ, հայերն ալ մեղք ունին: Իմ կարծիքով՝ ասիկա քաղաքական խնդիր է, զոր քաղաքական գործիչները կրնան լուծել: Կարելի է ներողութիւն խնդրել, մահացած եւ տեղահանութեան ենթարկուած մարդկանց թոռներուն կարելի է կոչով դիմել. «Ասոնք նաեւ ձեր հողերն են. եկէ՛ք, ձեզի համար ալ տեղ կայ»: Եկողներուն կարելի է քաղաքացիութիւն տալ», ըսած է Վուրալ:
Այն հարցումին, թէ «եթէ միլիոնաւոր մարդ գայ, ի՞նչ պիտի ընենք»՝ Վուրալ պատասխանած է. «Այդքան շատ չեն: Ամենաշատը կրնայ 500 հազար ըլլալ: Թող երեխաներուն եւ թոռներուն հետ 600 հազար ըլլան»:
Ան նաեւ յոյս յայտնած է, որ մինչեւ 2015 կը բացուին Հայաստանի եւ Թուրքիոյ միջեւ սահմանները՝ այդ մէկը յատկապէս Կարսի համար շատ կարեւոր նկատելով: «Ուղղակի առեւտուր ընելու հնարաւորութեան գոյութեան պատճառով կ՛օգտուին երրորդ երկիրներ», եզրակացուցած է ան:

 

LEAVE A REPLY

Please enter your comment!
Please enter your name here