Քիւրտ Գրողներու Միութեան Նախագահը Ծիծեռնակաբերդ Կ՛այցելէ

0
101

Երեւանը եւ Տիարպեքիրը շուտով պիտի դառնան քոյր քաղաքներ եւ համագործակցութիւնը առաջին հանգրուանին մշակութային մակարդակի վրայ պիտի ըլլայ. այս մասին յայտարարած է Հայաստանի գրողներու միութեան հրաւէրով Հայաստան այցելող Քիւրտ գրողներու միութեան նախագահ Իրֆան Պապաօղլու: Անոր կ՛ընկերանայ նաեւ քիւրտ անուանի գրող, հրապարակախօս Շեխմուս Տիքեն:
Իրֆան Պապաօղլու 1980-ին Թուրքիոյ մէջ տեղի ունեցած պետական յեղաշրջման օրերուն ձերբակալուած է եւ դատապարտուած մահուան: Սակայն 1991-ին, անոր վճիռը վերածուած է 20 տարուան բանտարկութեան եւ ազատ արձակուած է 2000-ին: Հայկական հարցին նուիրուած հինգ գիրքերու հեղինակ է ան:
Հիւրերը անդրադարձած են հայ-քրտական մշակութային բարեկամութեան ու անոր ակունքներուն: Կիսելով իր հայաստանեան այցելութեան տպաւորութիւնները՝ Քիւրտ գրողներու միութեան նախագահը նշած է, որ Ծիծեռնակաբերդէն յուզուած վերադարձած է: Ըստ իրեն՝ հաւանաբար 25 տարի առաջ տեղի պիտի չունենային Հալապճայի (Իրաքի մէջ քրտական շրջան մը) ջարդերը, եթէ 1915-ի Հայկական Ցեղասպանութեան պատասխանատուները արդարացի պատիժ ստանային:
«Որոշեցինք համագործակցութիւնը սկսիլ մշակոյթէն: Քիւրտերը Իրաքի եւ յատկապէս Թուրքիոյ մէջ արգելքներ կը դիմագրաւեն, մինչդեռ Հայաստանի մէջ մեր լեզուն ծաղկում կ՛ապրի: Հայ եւ քիւրտ ժողովուրդները իրարու թեւ-թիկունք դարձած՝ պէտք է յառաջանան, որովհետեւ ունին միեւնոյն ճակատագիրը», եզրակացուցած է Պապաօղլու:

LEAVE A REPLY

Please enter your comment!
Please enter your name here