ՆԱԹՕ ՄՏԱԴՐՈՒԹԻՒՆ ՉՈՒՆԻ ՍՈՒՐԻՈՅ ՎՐԱՅ ՈՉ ԹՌԻՉՔԱՅԻՆ ԳՕՏԻ ՍՏԵՂԾԵԼՈՒ

0
116

«Ռոյթըրզ» լրատուական գործակալութիւնը հաղորդեց, թէ նախագահ Պարաք Օպամա, յենելով բրիտանական եւ ֆրանսական աղբիւրներու  տեղեկութիւններուն վրայ  որոշ  քանակութեամբ զինաստեսակներ արտօնած է Սուրիոյ ապստամբներուն: Ընդդիմութեան  ռազմական  օգնութիւն ցուցաբերելու մասին սոյն  որոշումը տրուեցաւ այն պահուն,  երբ անգլիական եւ ֆրանսական աղբիւրներ հաղորդեցին,թէ սուրիական իշխանութիւնները  սահմանափակ քանակութեամբ քիմիական զէնք   կիրարկած են ապստամբներուն դէմ եւ պատճառ դարձած են  100-էն 150 մարդու մահուան: Ուաշինկթընի այս   կեցուածքին լոյսին տակ,  ՆԱԹՕ սուրիական  իշխանութիւններուն թելադրեց  միջազգային դիտորդներ հրաաաւիրել եւ  հետաքննութիւն մը բանալ   քիմիական զէնք  օգտագործելու ամբաստանութիւններուն  շուրջ:  

«Սքայ Նիուզ» հաղորդեց, թէ հակաօդայիններ եւ   ծանր  զէնքեր արդէն մուտք գործած են  Սուրիա:  Ուաշինկթընի  կեցուածքը այնքան ալ  հեզասահ չընդունուեցաւ անոր արեւմտեան դաշնակիցներէն:  Գերմանիա  մերժեց զէնք մատակարարել Սուրիոյ ընդդիմութեան, նոյնպէս ալ Ֆրանսա եւ Բրիտանիա: Իսկ Ֆրանսայի արտաքին գործոց նախարա Լորան Տիւմա յայտարարեց, թէ Սուրիան հարուածելու  որոշումը առնուած էր նախքան   այդ  երկրին մէջ խլրտումներուն սկսիլը: Տիւմա աւելցուց, թէ հազարաւոր  վարձկաններ մարզուած են  Սուրիոյ վարչակարգը տապալելու  նպատակով:

 ՆԱԹՕ-ի ընդհանուր քարտուղար Անտերս Ֆոկ Ռասմուսեն   յայտարարեց, թէ Հիւսիս Ատլանտեան Ուխտը  ոչ թռիչքային գօտի ստեղծելու մտադրութիւն չունի Սուրիոյ վրայ:  Ան ըսաւ, թէ  քիմիական զէնքի կիրարկման իւրաքանչիւր փաստ պէտք է ընդունիլ իբրեւ  միաջզգային իրաւունքի անթոյլատրելի խախտում: Սուրիոյ արտաքին գործոց նախարարութիւնը սուտերով լեցուն յերիւրանք նկատեց Սպիտակ Տան ամբաստանութիւնները:  

Ռուսիոյ  խորհրդարանի արտաքին քաղաքականութեան յանձնախումբի նախագահ Ալեքսէյ  Պուշքոֆ  յայտարարեց, թէ    Միացեալ Նահանգներ   պատրուակներ կը փնտռէ  արդարաձնելու՝  Սուրիոյ հակամարտութեան իր  միջամտութիւնները, այնպէս ինչպէս կատարեց Իրաքի  նախագահ Սատամ Հիւսէյն ի դէմ:  Ռուսիոյ փոխարտաքին գործոց նախարար Միխայիլ Պոկտանով դատապարտեց Սուրիոյ  ընդդիմութիւնը զէնքով  մատակարարելու որոշումը: Ան յայտնեց, թէ  Ռուսիա կառչած կը մնայ հակամարտութիւնը  երկխօսութեան ճանապարհով լուծելու ընտրանքին:  Պոկտանով նշեց, թէ  նախագահներ Փութին եւ Օպամա Հիւսիսային Իրլանտայի մէջ հանդիպում մը պիտի ունենան  սոյն ամսուան 28 եւ 29-ին, Մեծ Ութեակի խորհրդաժողովին ծիրին մէջ եւ պիտի քննարկեն Սուրիոյ իրավիճակը:

Միւս կողմէ  Քրեմլին յայտարարեց, թէ  տակաւին  սառեցուցած է   Սուրիոյ  ուղարկելիք «Էս-300»  հրթիռներուն փոխանցումը:  Ռուսիոյ Ծերակոյտի միաջազգային հարցերու  նախագահ   Միխայիլ Մարկիլով  պահանջեց  շուտափոյթ հետաքննութիւն մը բանալ  ամերիկեան ամբաստանութւիններուն շուրջ: Մարկիլով անհամոզիչ եւ  շինծու նկատեց  Ուաշինկթընի ամբաստանութիւնները:

Սուրիոյ ընդդիմութիւնը յայտարարեց, թէ  պիտի  չմասնակցի «Ժընեւ-2»   կամ որեւէ այլ խորհրդաժողովի, առանց  լուծում գտնելու հակամարտութեան  հիմնապատճառին, որ նախագահ Պաշշար Ասատի հեռացումն է:

LEAVE A REPLY

Please enter your comment!
Please enter your name here