«Մենք Սուրիոյ Տագնապին Միջամտող Ուժերուն Վերջիններէն Ենք, Ուրիշներ, Որոնց Մէջ Նաեւ Մուսթաքպալ Հոսանքը, Կանխած Են Մեզի» Շեշտեց Սէյիտ Նասրալլա

0
258

Վիրաւոր մարտիկի օրուան առիթով, Հըզպալլայի ընդհանուր քարտուղար սէյիտ Հասան Նասրալլա երէկ արտասանեց պատկերասփռուած ճառ մը, որուն մէջ ան շեշտեց, որ Քուսէյրի ճակատամարտէն ետք կացութիւնը նոյնն է, «մենք պիտի ըլլանք հոն, ուր որ պէտք է ըլլանք», ըսաւ ան:

Սէյիտ Նասրալլա խստիւ դատապարտեց երկրին մէջ օրական դրութեամբ հնչող գրգռութիւն յառաջացնող յայտարարութիւնները, ինչպէս նաեւ կրօնական հրահանգները, որոնք տարբեր կողմերը «կը հրաւիրեն» սպաննելու, քանդելու եւ արիւնահեղութեան:

Սէյիտ Նասրալլա շեշտեց, որ անցեալ կիրակի օր իրանեան դեսպանատան մօտակայքը սպաննուած երիտասարդին իրաւունքը պէտք է հետապնդել` աւելցնելով, որ այդ արարքը դատապարտելի է:

Հըզպալլայի ընդհանուր քարտուղարը դատապարտեց նաեւ տարբեր լրատուամիջոցներուն տարածած լուրերը, որոնք կը միտին Պեքաայի մէջ սիւննի-շիի գրգռութիւններ հրահրել. ան հերքեց այն յայտարարութիւնները, թէ Արսալէն հրթիռարձակում կը կատարուի:

«Պեքաան հարուածող հրթիռներուն աղբիւրը Սուրիոյ զինեալ խմբաւորումներն են, եւ հարկ է լուծում գտնել այդ հարցին», ըսաւ ան:

Սուրիոյ տագնապին շրջագիծին մէջ` սէյիտ Նասրալլա շեշտեց, որ տասնեակ հազարաւոր զինեալներ կը բերուին Սուրիա` աւելցնելով, որ Հըզպալլա Սուրիոյ տագնապին միջամտող ուժերուն վերջիններէն է:

«Ուրիշներ, ինչպէս Մուսթաքպալ հոսանքը եւ այլ լիբանանեան քաղաքական ուժեր կանխած են մեզի: Սակայն եթէ մեր միջամտութիւնը սուրիական ընդդիմութեան ի նպաստ ըլլար, ապա կը դառնայինք հերոսներ: Սակայն մենք մեր երիտասարդները Սուրիա ղրկելու պարագային չենք ձեւացներ, որ կաթ եւ ծածկոց կ՛ուղարկենք: Իսկ երբ մեր նահատակներուն յուղարկաւորութիւնը կատարելու ըլլանք, ապա մեր երիտասարդները Սուրիոյ մէջ չենք թաղեր եւ անոնց ընտանիքները չենք պարտադրեր, որ լուռ մնան: Մենք ճակատաբաց կը կռուինք եւ յուղարկաւորութիւնը օր ցերեկով կը կատարենք», ըսաւ ան:

Սէյիտ Նասրալլա ընդգծեց, որ Դիմադրութիւնը կ՛ուղղուի դէպի այնպիսի ուղի մը, որուն բոլոր հետեւանքները նախատեսուած են` աւելցնելով, որ իրենք պատրաստ են հանդուրժելու զանոնք:

Սէյիտ Նասրալլա նշեց, որ Հըզպալլա Ծոցի երկիրներուն մէջ անդամներ չունի եւ ոչ մէկ ծրագիրներ ունի այդ երկիրներուն մէջ:

 

LEAVE A REPLY

Please enter your comment!
Please enter your name here