ՓՈՒԹԻՆ ԿԻՐԱԿԻ ՕՐ ԳԱՄԵՐՈՆԻ ՀԵՏ ՊԻՏԻ ՔՆՆԱՐԿԷ ՍՈՒՐԻՈՅ ԻՐԱՎԻՃԱԿԸ

0
105

Ռուսիոյ նախագահ Վլատիմիր Փութին  Կիրակի օր,  Բրիտանիոյ վարչապետ Տէյվիտ Գամերոնի հետ պիտի  քննարկէ  Սուրիոյ իրավիճակը:  Փութին Բրիտանիա կը մեկնի մասնակցելու  ճարտարարուեստով հարուստ   «Ճի-8»  պետութիւններու  խորհրդաժողովին: Գամերոն երէկ  ուշ գիշերին,  հեռաձայնային հաշղորդակցութիւններ ունեցաւ նախագահ Պարաք Օպամայի, վարչապետ Անկելա Մերքէլի, նախագահ Ֆրանսուա Հոլանտի եւ Իտալիոյ վարչապետ  Էնրիքէ  Լեթայի հետ:  Գամերոն  քննարկեց Սուրիոյ  շուրջ ստեղծուած իրավիճակը եւ   հակամարտութիւնը  դադրեցնելու կարելիութիւնները:

  «Ութնեակ»ի  խորհրդաժողովը պիտի սկսի Երկուշաբթի,  Հիւսիսային Իրլանտայի մէջ: Գերմանիոյ վարչապետ Անկելա Մերքէլ պահանջեց ՄԱԿ-ի Ապահովութեան Խորհուրդի արտակարգ նիստ  մը  հրաւիրել Սուրիոյ առնչութեամբ: Մերքէլ մերժեց ռազմական օգնութիւն  տրամադրել Սուրիոյ ընդդիմութեան: Ռուսիոյ արտաքին գործոց նախարար Սերկէյ Լաւրով   դատապարտեց  Սուրիոյ  ընդդիմութիւնը   զինելու Ուաշինկթընի որոշումը: Լաւրով զգուշացուց, թէ  լուծումի  լաւագոյն ընտրանքը  երկխօսութիւնն է: Ան  ընդգծեց, թէ Յորդանանի սահմանագիծին վրյ  Փաթրիորթ հրթիռներու տեղակայումը միջազգային   օօդէրէնսդրութեան խախտում   է:

Չեչենիոյ նախագահ  Ռամատան  Քատիրով    դիտել տուաւ, որ մութ ձեռքեր կ’աշխատին  չեչէն երիտասարդներ  զինուորագրել՝ ծայրայեղականներուն  կողքին կռուելու  նպատակով: Ան ըսաւ, թէ ոչ ոք ճիհատ յայտարարած է Սուրիոյ մէջ, սակայն արտաքին արշաւ մը  կազմակերպուած է երկիրը քանդելու մտադրութեամբ:

Այլ  գետնի վրայ, Ուաշինկթըն կ’ուսումնասիրէ  Սուրիոյ օդային  տարածքին  մէջ  ոչ թռիչքային գօտի մը ստեղծելու կարելիութիւնը:  Հարցը այն է, թէ  Միացեալ Նահանգներ անհրաժեշտ  չի գտներ  դիմելու ՄԱԿ-ի  արտօնութեան:

 Հալէպի հայաշատ Սուլէյմանիյէ  թաղամասը  դարձած է  հրթիռային  յարձակումներու թիրախ:  Աւելի քան տասը հրթիռներ արձակուած են  Սուլէյմանիյէի եւ Նոր Գիւղի ուղղութեամբ՝ վնասելով շարք մը  շէնքեր:  Հալէպի մերձակայ շրջաններուն մէջ, ծայրայեղականները նռնակներով  հարուածած  են նախագահ Պաշշար Ասատի զարմիկ Հաֆէզ  Մախլուֆը փոխադրող  շարասիւնը:  Պաշտօնական Դամասկոս ոչ մէկ  մեկնաբանութիւն կատարեց այս մասին:  

Միւս կողմէ, ՄԱԿ կը շարունակէ  փոխարինողներ   փնտռել՝ Կոլանի բարձունքները լքող  աւստրիացի խաղաղապահներուն: Ըստ երեւոյթին, հարցը տակաւին հեռու է լուծումէն: ՄԱԿ-ի ընդհանուր  քարտուղար Պան Քի Մուն իր յոյսը  դրած է սքանտինաւեան երկիրներու մասնակցութեան վրայ: Վերջիններս կը  խուսափին այս պարտաւորութենէն: Անոնց  փոխարէն, Մոսկուա  պատրաստակամութիւն կը յայտնէ ռուս խաղաղապահներ ուղարկել Կոլան:

LEAVE A REPLY

Please enter your comment!
Please enter your name here