ՄԱՐԶԱԿԱՆ ԿԱՐՃ ԼՈՒՐԵՐ

0
166

-Պրազիլի  մէջ  տեղի ունեցող «Գոնֆետերէյշըն  Գափ»ի  առաջին հանգրուանի մրցումներուն, Սպանիոյ հաւաքականը   2-1 արդիւնքով պարտութեան մատնեց  Ուրուկուէյը: Փետրօ եւ  Սոլտատօ նշանակեցին սպանացիներուն կոլերը, Լուիս Սուարէզ՝ Ուրուկուէյի:  Մրցումին լաւագոյն մարզիկը ընտրուեցաւ Սպանիոյ հաւաքականի կիսապաշտպան  Ինիյէսթան:

– «Գոնֆետերէյշըն Գափ»ի առաջին հանգրուանի մրցումներուն, Իտալիա 2-1 արդիւնքով յաղթանակ մը  արձանագրեց  Մեքսիքոյի դէմ:  Իտալիոյ ազգային  խումբի  34-ամեայ միջնապահ Անտրէա Փիրլօ   իր  100-րդ մրցումը կատարեց ազգային խումբին շապիկով:  Ան միաժամանակ ընտրուեցաւ   մրցոււմին լաւագոյն մարզիկը եւ  նշանակեց  Իտալիոյ հաւաքականին առաջին կոլը:  Մարիօ Պալոթելի նշանակեց  իտալացիներուն  երկրորդ եւ յաղթանակի  կոլը:

-Անգլիական  Մանչեսթըր  Սիթին  միացաւ այն ակումբներուն, որոնք կը  փափաքին ձեռք բերել Լեհաստանի հաւաքականի եւ  Պորուսիա Տորթմունտի յարձակող  Ռոպերթ Լեվանտովսքիի ստորագրութիւնը:  Բրիտանական  «Տը Սան» օրաթերթը կը գրէ, թէ Սիթի պատրաստ է շաբթական 200 հազար սթերլին գումար աշխատավարձ  վճարելու 24-ամեայ ֆութպոլիստին: Ռէալ Մատրիտ, Չելսի եւ Մանչեսթըր Եունայթըտ   նոյնպէս կը հետապնդեն լեհ  ֆութպոլիստը:

-Լիվըրփուլ յառաջիկայ քանի մը օրերուն ընթացքին  իր կազմին մէջ պիտի ունենայ  Սանտերլանտի  պելճիքացի  բերդապահ  Սիմոն  Մոնիոլէն:  24-ամեայ  բերդապահին  ժամանումը կը  նշանակէ, թէ Փեփէ Ռէյնա  վերջ պիտի դնէ «Կարմիրներ»ուն  հետ   եօթ տարուան  ասպարէզին:

–  Ռոժէ Ֆետերէր  շահեցաւ  թենիսի միջազգային Հալէի մրցաշարքը:  Աւարտական մրցումին,  զուիցերիացի մարզիկը  6-7, 7-3, 6-4 արդիւնքով պարտութեան մատնեց  ռուս  Միխայիլ   Եուժնիին:  Նշենք, թէ Ֆետերէր  15 անգամ մրցած է Եուժնիի դէմ՝ բոլորն ալ աւարտած է յաղթանակով: 31-ամեայ  Ֆետերէր կը  շահէր իր ասպարէզի  77-րդ տիտղոսցը:  Ֆետերէր  մեծ  յոյսեր ունի շահելու այս տարուան Ուիմպլտընի մրցաշարքը, որ պիտի սկսի  24 Յունիսին:

– Հայաստանի Տաւուշ մարզի,  Դիլիջան քաղաքին մէջ  սկսաւ աղջկանց  ճատրակի «Կրան Փրի» վեց մրցաշարքներէն մէկը:  Մրցաշարքը  կ’աւարտի  29 Յունիսին: Բացման հանդիսութեան ներկայ գտնուեցաւ  Հայաստանի նախագահ եւ Ճատրակի Ֆետերասիոնի նախագահ Սերժ Սարգսեանը:

– Հոլանտայի  հաւաքականի եւ Մանչեսթըր Եունայթըտի այստղ Ռոպին Վան Փըրսիի մարզաշապիկները ամենաշատ վաճառուողն են Անգլիոյ  մէջ:  Այս ցուցանիշով  29-ամեայ   ֆութպոլիստը  գերազանցած է   Լիվըրփուլի խմբապետ   Սթիվըն Ճեռարտը եւ  իր խաղընկերոջ՝ Ուէյն Ռունիին:

-Ռէալ Մատրիտի եւ  Արժանթինի հաւաքականի յարձակող  Կոնզալօ Հիկուաին  կրնայ  միանալ Արսենալին:  Լոնտոնեան ակումբը պատրաստ է 30  միլիոն սթերլին գումար մը վճարելու  25-ամեայ յարձակողին  փոխանցումին համար:  Ռէալի տնօրէն  Ֆլորենթինօ Փերէզ  կը պնդէ, թէ  պիտի  չվաճառէ  Հիկուայինը: Սակայն ֆութպոլի մէջ դրամը կը  տնօրինէ  հարկը…:

-Պայերն  Միւնիխի  նախկին մարզիչ Եուփ Հէյնքէս յայտարարեց, թէ  մտադրած է  վերջակէտ դնել մարզչական ասպարէզին.« Կը ցանկանամ փայլուն  յիշատակներով   հեռանալ  ֆութպոլէն». ըսաւ Պայերնի նախկին մարզիչը, որուն հետ  պաւարիական խումբը  2012-13 տարեշրջանին  շահեցաւ Գերմանիոյ ախոյեանութեան տիտղոսը, բաժակը, «Սուփըր-բաժակը» եւ Եւրոպայի  «Չեմփիընզ Լիկ-ի  բաժակը:

-Պրազիլի հաւաքականը  «Գոնֆետերէյշոն  Գափ»ի բացման  մրցումին  3-0 արդիւնքով պարտութեան մատնեց  Ճափոնը:  Պրազիլի կոլերը նշանակեցին  Նէյմար, Փաուլինիօ եւ  Ճօ: Մրցումին լաւագոյն  մարզիկը  ճանչցուեցաւ  յարձակող Նէյմարը: Նէյմար, 74-րդ վայրկեանին վնասուածք մը ստանալու պատճառով  լքեց մրցումը: Յատկանշական է, որ պրազիլիացի մարզասէրները   պոյքոթի կ’ենթարկեն սոյն  մրցաշարքը: Անոնց կարծիքով,  մրցաշարի վրայ  ծախսուող  մեծ գումարները անհրաժեշտ  է տրամադրել երկրին   առողջապահական խնդիրներու:

– Իտալացի  մասնագէտ Գառլօ Անճելոթի պաշտօնապէյս ստանձնեց  Ռէալ Մատրիտի  գլխաւոր մարզիչի պարտականութիւնը:  54-ամեայ   Անճելոթի  երեք տարուան պայմանագրութիւն մը կնքեց Արքայական ակումբին հետ:

-Արհեստավարժ բռնցքամարտի  միջին ծանրութեան կարգի մարզիկ Վանէս  Մարտիրոսեան արձանագրեց իր  հերթական  յաղթանակը, երբ  Տալասի  America Airlines Center  մրցաշարքին գծով  պարտութեան մատնեց Ռայըն Տէյվիսը:  Մրցավարները  երկրորդ  ռաունտին  կասեցուցին մրցումը:

– Թենիսի  Ուիմպըլտընի միջազգային մրցաշարքի նախապատրաստութիւններուն  ծիրին մէջ, բրիտանացի Էնտի  Մըրէյ  շահեցաւ Լոնտոնի մրցաշարքը: Եզրափակիչ  մրցումին,   Մըրէյ՝  5-7, 7-5, 6-3 արդիւնքով պարտութեան մտնեց  Խրուաթ Մարին  Չիլիչը:

-Այսօր՝ Երեքշաբթի,  18 Յունիս,  Իտալիոյ եւ Սպանիոյ միջեւ  տեղի պիտի ունենայ  մինչեւ 21 տարեկաններու Եւրոպայի ֆութպոլի  ախոյեանութեան աւարտական   մրցումը:  Կիսաեզրափաիչ հանգրուանի մրցումներուն,  Իտալիա 1-0 արդիւնքով  պարտութեան մատնեց  Հոլանտան: Հանդիպման միակ եւ յաղթանակի  կոլը նշանակեց  Ֆապիօ Պորինի:  Կիսաեզրափակիչի երկրորդ մրցումին, Սպանիա 3-0 արդիւնքով  պարտութեան մատնեց  Նորվեկիան:  Մորենօ, Իսկօ եւ Մորաթա  նշանակեցին սպանացիներուն կոլերը:

-Պրազիլի ազգային խումբի նախկին  խմբապետ Ուոլթըր Տունկա  յայտարարեց, թէ  Նէյմարի ներկայութիւնը զգալապէս բարելաւած է  ազգային խումբին   խաղաոճը: 49-ամեայ   Տունկա դիտել տուաւ, որ    Նէյմար  մինակը  չի կրնար լուծել հաւաքականին խնդիրները՝ անհրաժեշտ է լիարժէք մարզիկներ ոանենալ անոր կողքին: Իսկ  Նէյմարի  Պարչելոնա  փոխանցումին մասին խօսելով, Տունկա յայտնեց, թէ Մեսիի,  Զաւիի եւ  Ինիյէսթայի  կողքին, Նէյմար  պիտի խաղայ այնպէս  ինչպէս կը  խաղան լողաւազանին մէջ:

–  Մոսկուայի  մէջ սկսաւ  ճատրակի աշխարհի  8-րդ ախոյեան  Միխայիլ Տալի  յիշատակին միջազգային մրցաշարքը:  Համաշխարհային   Ճատրակի ընդհանուր դասաւորման պարագլուխ Մակնուս Գարլսըն  պարտութեամբ սկսաւ  մրցաշարքը:  Աշխարհի ախոյեան  Վեսուանաթան Անանտ   յաղթեց Ալեքսանտր Մորոզեւիչին:  Մրցաշարքը պիտի աւարտի  23 Յունիսին:  Լեւոն Արոնեան մերժեց մասնակցիլ սոյն մրցաշարքին:

–  Լոնտոնի Չելսիի եւ Նիճերիոյ   հաւաքականի  կիսապաշտպան   Ճոն Օպէ Միքէլ չորս տարուան պայմանագրութիւն մը կնքեց թրքական  Կալաթասարայ ակումբին հետ:  Լոնտոնեան ակումբը  մօտաւորապէս  23  միլիոն եուրօ գումար մը կը  գնահատէ 26-ամեայ  ֆոթպոլիստին  փոխանցման սակը:

–  Լեհաստանի հաւաքականի եւ Պայեր Լեվերքուզենի  յետսապահ  Միխայիլ  Քատլիչ միացաւ  Ֆեներպահչէին:  28-ամեայ ֆութպոլիստը  երեք տարուան պայմանագրութիւն մը կնքեց  թրքական ակումբին հետ: Քատլիչ  2008-ին միացած էր  Պայեր Լեվերքուզենին:

– Սուանսի  խումբի մարզիչ  Մայքըլ Լաուտրուփ  հերքեց  Դանիոյ ազգային խումբին  գլխաւոր մարզիչի պաշտօնը  ընդառաջելու մասին տեղեկութիւնները: 49-ամեայ  Լաուտրուփ հերքեց նաեւ  Փարի Սէն Ժերմէնը ստանձնելու մասին   տեղեկութիւնները:  Սակայն ֆրանսական ակումբին տնօրէնութիւնը ամէն գնով կ’աշխատի համոզել  Լաուտրուփը:

– Գաթալոնական  Պարչելոնա խումբին ֆութպոլիստները  նոր մրցաշրջանի  նախապատրաստական  փորձերուն պիտի  սկսին  15  Յուլիսին:  Թիթօ Վիլանովայի խումբը  կարգ մը բարեկամական մրցումներ պիտի կատարէ եւրոպական  քաղաքներու մէջ:  Գաթալոնական ակումբը  լրջօրէն մտադրած  աւելի յուսալի դարձնել իր պաշտպանութեան  օղակը:  Յառաջիկայ    շաբաթներուն Պարչելոնա  պիտի  համալրուի նոր մարզիկներով:

-Չելսիի երկու   ֆութպոլիստներ՝  Խուան Մաթա եւ Ֆեռնանտօ Թորէզ կը խոստանան  իրենց լաւագոյնը՝  նորանշանակ  մարզիչ Ժոզէ Մուրինիոյին:  Բրիտանական   օրաթերթերուն կարծիքով, Մուրինիօ  մեծ մաքրագործում մը ծրագրած  է կատարել անգլիական խումբին մէջ:  Օրաթերթերը կը գրեն, թէ Մուրինիօ մեծ յոյսեր չի կապեր  Մաթայի եւ  Թորէզի հետ:

– Պարչելոնան մօտէն կը հետապնդէ  Արսենալի  յետսապահ Լորան Քոսելնին:  Գաթալոնական ակումբը պատրաստ է  15 միլիոն եուրօ գումար մը   վճարելու   ֆրանսացի   ֆութպոլիստին ստորագրութեան համար:  Բացի  Քոսելնիէն,  Պարչելոնա հետաքրքրուած է պաշտպաններ  Տաւիտ Լուիզի,  Տանիէլ Ակէրի եւ  Ժերեմի  Մատթէի ծառայութիւններով : Անցնող  մարզաշրջանին Քոսելնի  34 անգամ  դաշտ ներկայացած է Արսենալի շապիկով,  նշանակելով  4 կոլ:

– Մանչեսթըր Սիթի միացաւ Ֆիորենթինայի եւ  Մոնթենեկրոյի հաւաքականի  յարձակող Սթեֆան  Եովեթիչի  համար պայքարին:  Լոնտոնի Չելսին եւ Արսենալը նոյնպէս կը  փափաքին ունենալ  23-ամեայ յարձակողը:  Եովեթիչի փոխանցման արժէքը կը գնահատուի   30  միլիոն եուրօ:  Իր կարգին, Ֆիորենթինա կը  փափաքի Եովեթիչի փոխանցումէն ստացած գումարով գնել Պայերն Միւնիխի յարձակող  Մարիօ Կոմէզը:

– Ա.Սէ. Միլան  մտադրած է  վաճառել պրազիլիացի յարձակող  Ռուպինիօն: Իտալական ակումբը  29-ամեայ յարձակողին  փոխանցման  համար կը պահանջէ   8  միլիոն եուրօ գումար մը:  Պրազիլի հաւաքականի նախկին մարզիկը կը փափաքի վերադառնալ հայրենիք:   Շշուկներ կ’ըսեն, թէ  Սանթոս ակումբը  պիտի  իրականացնէ Ռուպինիոյի  երազները:

– «Պարչելոնան  իմ ընտանիքն է». Յայտարարեց գաթալոնական ակումբի եւ Սպանիոյ հաւաքականի  պաշտպան Ժեռար Փիքէ: 29-ամեայ  ֆութպոլիստը կը փափաքի  գաթալոնական ակումբին հետ աւարտել իր ասպարէզը:  Պարչելոնայի կազմին հետ Փիքէ  չորս անգամ շահած է Սպանիոյ ֆութպոլի ախոյեանութիւնը,  երկու անգամ «Չեմփիընզ Լիկ»ի բաժակը,  երկու անգամ Սպանիոյ բաժակը, երեք անգամ  Սպանիո յ «Սուփըր Գափ»ը եւ երկու անգամ՝ ԵՈՒԷՖԱ-ի մրցաշարքը:

-Մանչեսթըր Եունայթըտի եւ  Փորթուգալի հաւաքականի կիսապաշտպան  Լուիս Նանի կրնայ մաս կազմել  Եուվենթուսի եւ Իտալիոյ հաւաքականի կիսապաշտպան  Գլաուտիօ  Մարքիզիոյի անգլիական ակումբին փոխանցուելու  գործառքին:  Մարքիզիօ աշխատավարձի  յաւելում կը պահանջէ իտալական ակումբէն, վերջինս կը մերժէ:  Մարքիզիոյի   փոխանցման սակը կը գնահատուի  30 միլիոն եուրօ:

–   Գերմանիոյ հաւաքականի կիսապաշտպան Անտրէ  Շուրլի դարձաւ մարզիչ Ժոզէ Մուրինիոյի  Չելսի  վերամիանալէ ետք, անգլիական ակումբին  միացող առաջին  ֆութպոլիստը:  24-ամեայ  կիսապաշտպանը    յայտարարեց, թէ  Մեսուտ Օզիլ,  Սամի  Խետիրա եւ  Միքայիլ Պալաք   բաւական  տեղեկութիւններ փոխանցած  են  իրեն՝ Մուրինիոյի մասին:

– Մանչեսթըր Եունայթըտի նախկին մարզիչ  Սըր  Ալեքս Ֆերկըսըն   կը  փորձէ համոզել Քրիսթիանօ Ռոնալտօն որպէսզի վերադառնայ անգիական ակումբին:  Ռոնալտօ ներկայիս    աշխատավարձը աւելցնելու    բանակցութիւններ կը վարէ  Ռէալի հետ:  Փորթուգալացի  ֆութպոլիստը  2009-ին միացաւ Արքայական ակումբին: Ռոնալտօ,  Ռէալի շապիկով  կատարած  199  մրցումներուն  ընթացքին նշանակած է  202 կոլ: Ռէալ Մատրիտ  երեք տարուան նոր պայմանագրութիւն մը կ’առաջարկէ  Ռոնալտոյին, խոստանալով  166  միլիոն եուրօ   գումար մը  վճարել նոր  պայմանագրութեան համար:

– Չելսի  պաշտօնական առաջարկ ներկայացուց Նափոլիի եւ Ուրուկույէի հաւաքականի յարձակող Էտինսոն Գաւանիի փոխանցումին համար:  Անգլիական ակումբը պատրաստ է   52  միլիոն եուրօ գումար մը վճարելու  26-ամեայ   յարձակողին ստորագրութեան համար, մինչ  իտալական ակումբը   կը պահանջէ 63 միլիոն:

– Բրիտանական   օրաթերթերու  կարծիքով,  Տոնեցքի  Շախտիորի եւ Հայաստանի ազգային խումբի կիսապաշտպան  Հերիխ Մխիթարեան յառաջիկայ քանի մը  ժամերուն ընթացքին պիտի միանայ   Լիվըրփուլի:   Մխիթարեանի փոխանցումը անգլական ակումբին պիտի արժէ   17  միլիոն սթերլին:

– Սպանական  Marca  օրաթերթը   հարցախոյզ մը կազմակերպած է ՝ պարզելու, թէ   Ռէալ Մատրիտի  համակիրները ո՞ր  ֆութպոլիստին կը փափաքին տեսնել իրենց խումբին շապիկով:  Համակիրներուն մեծամասնութիւնը  կը փափաքի Մալակա խումբի  կիսապաշտպան  Իսկօն տեսնել Արքայական ակումբի շապիկով:  Երկրորդ տեղը կու գայ   Պորուսիա Տորթմունտի եւ   Լեհաստանի  հաւաքականի յարձակող   Ռոպերթ Լեվանտովսքին

– 12 անգամ   թենիսի «Կրանտ սլէմ» մրցանակներու դափնեկիր   Ռաֆայէլ Նատալ ընտրուեցաւ  Սպանիոյ պատմութեան  լաւագոյն մարզիկը: 27-ամեայ Նատալ գերազանցեց  հեծանաւորդ  Միկէլ Ինտուրայինը եւ պասքետպոլիստ  Փոլ Կազոլը:

 

 

 

LEAVE A REPLY

Please enter your comment!
Please enter your name here