ԵԱՀԿ-Ի ՆԱԽԱԳԱՀԸ ԿԸ ՋՆՋԷ ԿՈՎԿԱՍԵԱՆ ԱՅՑԵԼՈՒԹԻՒՆՆԵՐԸ

0
115

Ուքրանիոյ արտաքին գործոց նախարար Լէոնիտ Քոժարա ջնջեց  Հայաստան եւ Ատրպէյճան կատարելիք իր աշխատանքային այցելութիւնը», հաղորդեցին ուքրանական լրատուամիջոցները՝ վկայակոչելով Ուքրանիոյ արտաքին գործոց նախարարութեան տուեալները:
Յիշեցնենք, որ ներկայիս Եւրոպայի ապահովութեան եւ համագործակցութեան կազմակերպութեան (ԵԱՀԿ) նախագահի պաշտօնը ստանձնած Ուքրանիոյ արտաքին գործոց նախարարի յատուկ ներկայացուցիչ (հակամարտութիւններու հարցերով) Անտրէյ Տեշիցա Յունիս 12-ին յայտարարած էր, որ Քոժարա յաջորդ շաբթուան ընթացքին (այսինքն՝ այս շաբաթ) պիտի այցելէ հարաւային կովկասեան երկիրներ՝ Հայաստան, Ատրպէյճան եւ Վրաստան, տարածաշրջանի հակամարտութիւնները քննարկելու նպատակով:
Այցելութիւնը ջնջելու պատճառը չէ նշուած Ուքրանիոյ արտաքին գործոց նախարարութեան յայտարարութեան մէջ, սակայն ուքրանական թերթեր նշած են, թէ պատճառը Հայաստանի նախագահ Սերժ Սարգսեանի՝ արձակուրդի մեկնած ըլլալն է:
Հայաստանի նախագահի մամլոյ ծառայութեան տարածած հաղորդագրութեան համաձայն, Սարգսեան Յունիս 12-ին կարճատեւ արձակուրդի մեկնած է արտասահման:
Ուքրանիա ԵԱՀԿ-ի նախագահութիւնը ստանձնած էր այս տարուան Յունուարին՝ յայտարարելով, որ իր նախագահութեան առաջնահերթութիւններէն մէկը ԵԱՀԿ-ի տարածաշրջանի հակամարտութիւններու կարգաւորումն է:

 

 

LEAVE A REPLY

Please enter your comment!
Please enter your name here