ԶԻՆԵԱԼ ԲԱԽՈՒՄ ՍԱՅՏԱՅԻ ՄԷՋ

0
128

 Այսօր  կէսօրին,  Սայտա  քաղաքի  Ապրա  շրջանին  մէջ ապահովական  մագլցում մը տեղի  ունեցաւ   շէյխ Ահմէտ  Ասիրի  եւ  «Սարայա Մուղաուամէ» կազմակերպութեան  զինեալներուն միջեւ, երբ  ինքնաշարժի արկածի  մը հետեւանքով ծագած վէճ մը  զարգանալով, զինեալ բախումի  վերածուեցաւ եւ  տարածուեցաւ   Սայտա քաղաքի արուարձաններուն մէջ: Այս միջոցին,   շէյխ Ասիրի   հետեւորդներ   փորձեցին խուժել   Հըզպալլայի պատկանող  յարկաբաժիններ:  Բախումներու ընթացքին  օգտագործուեցան     սովորական եւ  միջին   ծանրութեան հրթիռներ:  Միւս  կողմէ,   «Սարայա Մուղաուամէ»ի  զինեալներ   գրաւեցին  Ֆատէլ Շաքէրի բնակարանը: Բախումներուն ընթացքին  սպաննուեցաւ  զինեալ մը: Չորս ուրիշներ փոխադրուեցան հիւանդանոց: Շէյխ Ահմէտ  Ասիր  յայտարարեց, թէ անծանօթներ երկու օր առաջ յարձակած են իր եղբօր  «վան»ին վրայ: Ան   ըսաւ, թէ պիտի չլռէ կատարուած  արարքին առջեւ:

Սայտայի  միւֆթի շէյխ  Սալիմ Սուսան անմիջապէս   այցելեց   Պիլալ  Պըն  Ռիահի  մզկիթը եւ  հանդիպում մը ունեցաւ շէյխ   Ահմէտ Ասիրին հետ: Սոյն հանդիպումին  լոյսին տակ,  շէյխ  Ասիր իր զինեալներուն հրահանգեց  հեռանալ  իրենց  դիրքերէն եւ յարգել  բանակին յայտարարած  զինադադարը:

Լիբանանեան բանակը եւ  ներքին ապահովութեան  ուժեր  տարածուեցան  Սայտայի արուարձաններուն մէջ  եւ   կատարեցին  ձերբակալութիւններ:  Բանակը   բոլոր  զինեալներուն հրահանգեց  հեռանալ  Սայտայի արուարձաններէն: Երեկոյեան  ժամը  եօթին  զինեալները  հեռացան  իրենց դիրքերէն   եւ  լիբանանեան  բանակը   խիտ  ներկայութեամբ իր հակակշիռին  տակ վերցուց    բախումի շրջանները:

LEAVE A REPLY

Please enter your comment!
Please enter your name here