ՓՈՒԹԻՆ ԵՒ ՕՊԱՄԱ ԿԸ ՀԱՄԱՁԱՅՆԻՆ ԸՆԴԼԱՅՆԵԼ ԳՈՐԾԱԿՑՈՒԹԵԱՆ ՈԼՈՐՏԸ

0
138

Ռուսիոյ եւ  Միացեալ  Նահանգներու  նախագահներ,  Վլատիմիր Փութին եւ  Պարաք Օպամա «Մեծ Ութնեակ»ի   ծիրին մէջ ունեցան երկժամեայ հանդիպում մը եւ քննարկեցին  զանազան հարցեր, որոնց մէջ՝ Սուրիոյ իրավիճակը: Անոնք  շարք մը   համաձայնութիւններ գոյացուցին  երկկողմ յարաբերութիւնները զարգացնելու ուղղութեամբ,  յատկապէս՝ տնտեսական  ոլորտէն ներս:  Օպամա եւ Փութին   համաձայնեցան   3 եւ 4 Սեպտեմբերին  ռուս-ամերիկեան  խորհրդաժողով մը գումարել Մոսկուայի մէջ, քննարկելու   ընդհանուր   մտահոգութիւն   ներկայացնող հարցեր:  Անոնք   համաձայնեցան աւելի յաճախակի դարձնել զոյգ  երկիրներու պաշտպանութեան եւ արտաքին գործոց նախարարներուն միջեւ  հանդիպումները:  Հաստատելով հանդերձ    տեսակէտներու տարբերութիւնը, Փութին եւ Օպամա  համաձայնեցան  Սուրիոյ  հակամարտութեան կողմերուն խրախուսել, որպէսզի  ժընեւի մէջ  նստին բանակցային սեղանի շուրջ: « Որոշ կէտերու մէջ  մեր  կարծիքները   չեն համընկնիր, սակայն մեզի կը միաւորէ   բռնութիւնը   դադրեցնելու, Սուրիոյ զոհերուն թիւը կասեցնելու, հակամարտութիւնը խաղաղ միջոցներով լուծելու ձգտումը՝ ժընեւի մէջ կայանալիք  բանակցութիւններուն  միջոցաւ». յայտարարեց Փութին:  Երկու նախագահները  մաղթեցին, որ  Իրանի նոր նախագահին ընտրութիւնը կը   մեղմացնէ  իրանական  միջուկային հարցին վերաբերեալ  բանակցութիւններու գործընթացը:  Օպամա եւ Փութին  համաձայնեցան   զօրացնել Հիւսիսային Քորէայի  շուրջ  համագործակցութիւնը:

LEAVE A REPLY

Please enter your comment!
Please enter your name here