ՊԱՆ ՔԻ ՄՈՒՆ ՆՈՅՆՊԷՍ Կ’ԱՃԱՊԱՐԷ ԿԱԶՄԱԿԵՐՊԵԼՈՒ ԺԸՆԵՒԵԱՆ ԲԱՆԱԿՑՈՒԹԻՒՆՆԵՐԸ

0
107

ՄԱԿ-ի ընդհանուր քարտուղար Պան Քի Մուն  պատրաստակամութիւն յայտնեց   հնարաւորին  չափ  շուտ կազմակերպել  Ռուսիոյ եւ Միացեալ Նահանգներու  գլխաւորութեամբ  Սուրիոյ հարցով   խորհրդաժողովը:  Քի Մուն   ողջունեց   Մեծ Ութեակի խորհրդաժողովին Սուրիոյ հարցով ձեռք բերուած  համաձայնութիւնը: Ռուսիոյ փոխարտաքին գործոց նախարար Սերկէյ Ռիպաքով յայտարարեց, թէ  «Ժընեւ -2» խորհրդաժողովին  կարելիութիւնները   օրըըստօրէ  սկսած են աւելնալ: Սակայն  ՄԱԿ-ի եւ Արաբական Լիկայի  բանագնաց Լախտար Իպրահիմի  յայտնեց, թէ  «Ժընեւ -2» խորհրդաժողովին ճանապարհը բաւական  երկար է եւ  մեծ  ճիգերու կը կարօտի տակաւին: Իպրահիմի  նշեց, թէ  յառաջիկայ Երեքշաբթի՝ Ժընեւի մէջ հանդիպում մը պիտի կայանայ  ՄԱԿ-ի, Ռուսիոյ եւ Միացեալ Նահանգներու  ներկայացուցիչներու միջեւ: Անոնք պիտի  քննարկեն միջազգային խորհրդաժողով   կազմակերպելու կարելիութիւնները:

Բրիտանիոյ  վարչապետ  Տէյվիտ Գամերոն պահանջեց, որ բոլոր  ծայրայեղական զօրքերը, որոնց մէջ՝ Հըզպալլան     հեռանան Սուրիայէն:  Ան  յայտնեց, թէ  բոլորը  խաղաղութիւն կը ցանկան Սուրիոյ, սակայն միջոցներու մէջ կը տարուբերին:  Գերմանիոյ  վարչապետ Անկէլա Մերքէլ ըսաւ, թէ Պերլին կը զօրակցի Սուրիոյ ժողովուրդին շահերը պաշտպանող ընդդիմութեան:

Ռուսիոյ  փոխարտաքին գործոց նախարար   Կենատի Կաթիլով  յայտարարեց, թէ  «Ժընեւ-2» խորհրդաժողովին կազմակերպման   պատասխանատուութիւնը կ’իյնայ « Ռուսիոյ  Արեւմտեան գործընկերներուն դաշտին մէջ»:

Ռազմական գետնի վրայ,  Լաթաքիոյ մէջ  պայթումի մը հետեւանքով սպաննուեցան   վեց անձեր: Ծայրայեղականներ հրկիզեցին  Տէր Զոր քաղաքի  ասորիներու եկեղեցին:  Սուրիական բանակը յաջողեցաւ  Դամասկոսի շրջակայ  կարգ մը   գիւղեր ազատագրել  ահաբեկիչներէն:

LEAVE A REPLY

Please enter your comment!
Please enter your name here