ՍՊԱՆԻՈՅ ԵՐԻՏԱՍԱՐԴԱԿԱՆ ՀԱՒԱՔԱԿԱՆԸ ԵՒՐՈՊԱՅԻ ԱԽՈՅԵԱՆ

0
115

Սպանիոյ ֆութպոլի երիտասարդական հաւաքականը շահեցաւ  Եւրոպայի ախոյեանութեան տիտղոսը: Եզրափակիչ  մրցումին սպանացիները  4-2 արդիւնքով պարտութեան մատնեցին Իտալիան:  Թիակօ Ալքանթար՝ (երեք կոլ) եւ  Իսկօ նշանակեցին  Սպանիոյ կոլերը: Սպանիոյ հաւաքականի անդամ Ալվարօ  Մորաթա՝  չորս կոլով,  դարձաւ մրցաշարքին գլխաւոր  ռմբարկուն: Կ’արժէ նշել, որ Սպանիոյ հաւաքականը  յաջորդական երկրորդ անգամ ըլլալով   կը շահէր Եւրոպայի ախոյեանութեան տիտղոսը:

ՀԱՅԱՍՏԱՆ ՊԻՏԻ ՄԱՍՆԱԿՑԻ  ԹԵՔՈՒԱՆՏՈՒՅԻ ԱՇԽԱՐՀԻ ԱԽՈՅԵԱՆՈՒԹԵԱՆ ՄՐՑՈՒՄՆԵՐՈՒՆ

 Հայաստան   հինգ մարզիկներով պիտի մասնակցի 10-22 Յուլիսի միջեւ, Մեքսիքոյի մէջ  տեղի ունենալիք թեքուանտույի  աշխարհի ախոյեանութեան  մրցումներուն:  Սոյն յայտարարութիւնը կատարեց թեքուանտույի ֆետերասիոնի փոխնախագահ եւ գործադիր տնօրէն  Վարդան  Ղահրամանեանը: Հայաստանը   ներկայացնող  մարզիկները պիտի  ըլլան Վարագ Աղաճանեանը,  Հայկազ Սամուէլեանը,  Հայկ Խաչատրեանը,  Արման Երեմեանը եւ Կենատի Առուսամեանը:

ՄԱՐԶԱԿԱՆ ԿԱՐՃ ԼՈՒՐԵՐ

-Պարչելոնայի  խմբապետ  Գարլէս Փույոլ   ծունկի երկրորդ գործողութեան մը ենթարկուեցաւ երէկ:  Վիրահատութեան  պատճառով  Փույոլ առնուազն  չորս շաբաթ պիտի  բացակայի  դաշտերէն:

– Յառաջիկայ  մարզական տարեշրջանին, Ֆորմիւլա 1 ինքնաշարժներու աշխարհի առաջնութիւնը  Աւստրալիոյ Մելպուռն քաղաքի   փոխարէն պիտի  մեկնարկէ Պահրէյնէն:  2014-ին  նախատեսուած է  կայացնել  Ֆուրմիւլա -1-ի  ախոյեանութեան  21  մրցում:  Կազմակերպիչները  կը սերտեն  ջնջել  Հարաւային Քորէայի եւ Հնդկաստանի կրան փրիները:

– Մոսկուայի մէջ կայացող աշխարհի 8-րդ ախոյեան  Միխայիլ Տալի  յիշատակին  կազմակերպուած միջազգային  մրցաշարքի  5-րդ հանգրուանին,  Մակնուս Գարլսըն պարտութեան մատնեց աշխարհի ախոյեան  Վեսուանաթան Անանտը: Մրցաշարքը պիտի աւարտի  23 Յունիսին:  Տիղոսակիրը պիտի ստանայ 100 հազար եուրօ գումարի պարգեւատրութիւն մը:

-Գերմանական « 11 Freunde» ամսագիրին վարկածով,   Պայերն  Միւնիխի կիսապաշտպան  Ֆրանք Ռիպերի  ընտրուած է Գերմանիոյ  ախոյեանութեան   լաւագոյն  ֆութպոլիստը, իսկ Եուփ  Հէյնքէս՝  լաւագոյն մարզիչը:

-Ռէալ Մատրիտ ակումբը  բանակցութիւններ կը  վարէ իր կազմին մէջ ունենալու  Կարէթ Պէյլը(Թոթենհամ) եւ  Իսկօն(Մալակա):  Սպանական ակումբը յայտարարեց, թէ  պատրաստ է 100  միլիոն եուրօ գումար  մը  վճարելու Պէյլի փոխանցումին համար:

 

 

LEAVE A REPLY

Please enter your comment!
Please enter your name here