ԼԱՒՐՈՎ՝ ՌՈՒՍԻԱ ՊԻՏԻ ԱՐԳԻԼԷ ԻՐԱՔԻ ԿՐԿՆՈՒԹԻՒՆԸ

0
116

Ռուսիոյ արտաքին գործոց նախարար Սերկէյ Լաւրով  յայտարարեց, թէ  Արեւմուտքին կողմէ Սուրիոյ մատակարարուելիք զէնքը պիտի անցնի  Ճեպհէթ Ալ Նուսրայի  ձեռքը: Լաւրով յայտնեց, թէ տակաւին անորոշ կը մնայ, թէ ո՞վ պիտի  համոզէ  ընդդիմութիւնը՝  մասնակցելու  «Ժընեւ -2» բանակցութիւններուն: Լաւրով դիտել տուաւ, որ արեւմուտքի հետ տարաձայնութիւնները հակամարտութեան լուծման եղանակին  շուրջ կը կայանան  եւ ոչ՝  անոր վերջնական նպատակներուն: Ան ըսաւ, թէ Ռուսիա պիտի արգիլէ Սուրիոյ մէջ  Լիպիոյ եւ Իրաքի սենարիօներուն  կրկնութիւնը

 Ֆրանսայի  պաշտպանութեան նախարար Ժան Իվ Լը Թրիան յայտարարեց, թէ իր երկիրը  զէնք պիտի չմատակարարէ Սուրիոյ ընդդիմութեան, յուսալով որ  քաղաքական  լուծումի հասնելու կարելիութիւն պիտի  ըլլայ  «Ժընեւ-2»  խորհրդաժողովին:  Ուաշինկթընի մէջ  նախագահ Պարաք  Օպամա հերքեց  Սուրիոյ  դէմ  պատերազմ յայտարարելու  նախապատրաստութիւններու մասին տարածուած յայտարարութիւնները:

Տէր Զորի մէջ, Ճեպհէթ Ալ  Նուսրա  ծայրայեղական  կազմակերպութեան  զինեալներ մահապատիժի ենթարկեցին  15-ամեայ   պատանի մը՝  սէուտցի վարձկան մը  սպաննելու  յանցանքով:  Մօտաւորապէս տասը օր առաջ, Հալէպի մէջ,  Ճեպհէթ Ալ Նուսրայի  զինեալներ, ծնողներուն առջեւ  սպաննեցին անչափահաս մը՝ «աստուածանարգութեան» պատճառով: Ականատեսներու վկայութեամբ,   15-ամեայ  պատանին  մերժած էր  անվճար սուրճ  մատուցել ծայրայեղականներուն…:

Սուրիոյ այսպէս կոչուած «բարեկամները» Շաբաթ օր, Տոհայի մէջ պիտի  քննարկեն  ապստամբներուն  ռազմական  օժանդակութիւն տրամադրելու կարելիութիւնները:  Խորհրդաժողովին պիտի   մասնակցին տասնմէկ  երկիրներու արտաքին գործոց նախարարութիւններու  ներկայացուցիչներ: Սուրիոյ  տեղեկատուութեան նախարար  Օմրան  Ալ Զուղպի  ըսաւ, թէ    Սուրիոյ  բանակը պիտի կատարէ իր պարտքը եւ հետապնդէ ահաբեկիչները, այնքան ժամանակ, որ  երկրի  տարածութեան  մէջ չէ հաստատուած  կայունութիւն:  Նախարարը յայտնեց, թէ միայն ահաբեկիչներուն մատակարարուող զէնքը  դադրեցնելու պարագային կարելի պիտի  ըլլայ խօսիլ  քաղաքական լուծումի մասին:  Զինուորական գետնի վրայ,   բանակը կը շարունակէ  Դամասկոսի  հարաային  շրջաններէն ահաբեկիչները չէզոքացնելու  գործողութիւնները:

Բրիտանական «Տը Թելեկրաֆ» օրաթերթը կը գրէ, թէ Սէուտական  Արաբիա Սուրիոյ ապստամբներուն  օժտած է  ռազմական  նոր սարքերով:  Օրաթերթը  կ’աւելցնէ, թէ  Սէուտական Արաբիա   հակաօդային հրթիռներ  յանձնած  է ապաստամբներուն:

ԵՈՒՆԵՍՔՕ Սուրիոյ մէջ գոյութիւն ունեցող վեց յուշարձաններ ընդգրկեց  սպառնալիքի տակ  գտնուող համաշխարհային ժառանգութիւններու  շարքին:

LEAVE A REPLY

Please enter your comment!
Please enter your name here