ԼԻԲԱՆԱՆ ԲՈՂՈՔԱԳԻՐ ՆԵՐԿԱՅԱՑՈՒՑ ԱՐԱԲԱԿԱՆ ԼԻԿԱՅԻՆ

0
116

Ապահովական զարգացումները շուքի տակ կը պահեն  քաղաքականը: Հանրապետութեան նախագահ  Միշէլ Սըլէյման  աչքի վիրաբուժական գործողութեան մը ենթարկուեցաւ երէկ:  Նախքան   գործողութիւնը, նախագահ Սըլէյման  աշխոյժ օր մը բոլորեց Պաապտայի պալատին մէջ:  Լրագրողներու հետ     զրոյցի մը  ընթացքին ան քննադատեց Հըզպալլայի մասնակցութիւնը Սուրիոյ հակամարտութեան մէջ , ընդգծելով  որ  միջամտութիւնը  իր հետեւանքները պիտի ունենայ  Լիբանանի մէջ: Նախագահը  յիշեցեցուց,թէ Հըզպալլա կը խորհրդանշէ  դիմադրութիւնը, որուն ազգային դերակատարութեան պատճառով  ստեղծուած է՝  բանակ, ժողովուրդ, դիմադրութիւն կարգախօսը: Նախագահը  հարցուց, թէ  Հըզպալլա այս հաւասարակշռութիւնը  լքելով, ինչպէ՞ս  կ’առանձնանայ  բանակէն եւ ժողովուրդէն: Սըլէյման  շեշտեց, թէ  միշտ ալ  զօրավիգ կեցած է Դիմադրութեան, պաշտպանելով անոր  դիրքորոշումները, սակայն Դիմադրութիւնը ինք եւս   նախանձախնդիր  պէտք է ըլլայ պաշտպանելու իր արարքները: Սըլէյման միաժամանակ  քննադատեց Լիբանանի  օդային տարածութիւններէն ներս  իսրայէլեան ոտնձգութիւնները:

 Լիբանան երէկ պաշտօնական բողոքագիր մը ներկայացուց Արաբական  Լիկային՝  լիբանանեան  հողերու վրայ Սուրիոյ  ոտնձգութիւններուն դէմ: Սըլէյման իր մօտ  հրաւիրեց Լիբանանի մօտ Արաբական Լիկայի դեսպան Ապտէլ Ռահման Սոլհը եւ անոր  յանձնեց  լիբանանեան հողերու վրայ սուրիական ոտնձգութիւններու առիթով Լիբանանի բողոքագիրը:  Սըլէյման նաեւ ընդունեց  Թունուզի արտաքին գործոց նախարար Օսման Ճարանտին, կրթութեան եւ բարձրագոյն ուսմանց հրաժարեալ նախարար  Հասան Տիապը, նախկին նախարար Զիատ Պարուտը  եւ այլ անձնաւորութիւններ: Նախագահ Սըլէյման  երկխօսութեան  սեղան վերադառնալու կոչ ուղղեց լիբանանցիներուն:

Այլ գետնի վրայ,  Ընկերվար Յառաջդիմական Կուսակցութեան պետ Ուալիտ Ճոմպլաթ  քուլիսներու ետին  հաղորդակցութիւններ կ’ունենայ  նախկին վարչապետ Սաատ Հարիրիի հետ:  Լիբանանեան կարգ մը լրատուական աղբիւրներ   չեն բացառարեր Ճոմպլաթի կողմէ այցելութիւն մը Ռիատ:

Փաղանգաւոր Կուսակցութեան  պետ Ամին Ճեմայէլ զարմանք յայտնեց   Սուրիոյ  դէմ  ներկայացուած   բողոքագիրին պատճառով, նախագահ Միշէլ Սըլէյմանի հասցէին  յղուած քննադատութիւններուն:  Ճեմայէլ պահանջեց   չուշացնել  կառավարութեան կազմութիւնը:

LEAVE A REPLY

Please enter your comment!
Please enter your name here