ԱՐԱՄ ԽԱՉԱՏՐԵԱՆԻ ՍՏԵՂԾԱԳՈՐԾՈՒԹԻՒՆՆԵՐԸ ԱՐՁԱՆԱԳՐՈՒԵՑԱՆ ԵՈՒՆԵՍՔՕ-Ի ԱՇԽԱՐՀԻ ՅԻՇՈՂՈՒԹԻՒՆ ԾՐԱԳԻՐԻՆ ՄԷՋ

0
124

 Հարաւային Քորէայի Հանրապետութեան մէջ կայացած ԵՈՒՆԵՍՔՕ-ի «Աշխարհի յիշողութիւն» ծրագիրի խորհուրդի  նիստին ընթացքին ԵՈՒՆԵՍՔՕ-ի Գլխաւոր տնօրէնի որոշմամբ եւ Միջազգային խորհրդատուական կոմիտէի եզրակացութեան հիման վրայ ծրագիրի Միջազգային տոմարին մէջ (Memory of the World International Register) արձնագրուած  է «Արամ Խաչատրեանի ձեռագիր նոտաները եւ կինոերաժշտութիւնը»:

         Հայկական յայտը համալրեց աշխարհի բոլոր մայրցամաքներէն ներկայացուած քարէն մինչեւ ձայնային հաղորդիչներու վրայ պահպանուող 299 փաստաթուղթ  պարունակող ցանկը: Այսուհետ, Արամ Խաչատրեանի անունը կը դասուի այս ցանկին մէջ արդէն իրենց տեղը գտած աշխարհահռչակ այնպիսի երաժշտագէտներու հետ, ինչպիսին են  Պեթհովէնը, Պրամսը եւ Շոփէնը:

         Այս տարի անուանացանկին մէջ ներառուած  է Վրաստանի եւ Մեծ Բրիտանիոյ կողմէ համատեղ ներկայացուած «Վագրենաւորը» պոէմի ձեռագիրը, Գերմանիոյ կողմէ ներկայացուած Քարլ Մարքսի ինքնագրով «Կապիտալ» աշխատութեան ձեռագիրը, 15-18 դարերուն Լեհաստանի թագաւորութեան եւ Օսմանեան Կայսրութեան միջեւ կնքուած խաղաղութեան պայմանագիրները,  Սպանիոյ կողմէ ներկայացուած «The Decreta of Leցn of 1188 » վերտառութեամբ Եւրոպական խորհրդարանական համակարգի վերաբերեալ ամենահին փաստաթուղթը, 1497-1499 թթ. Վասկօ տա Կամայի Հնդկաստան կատարած ճամբորդութեան վերաբերեալ ձեռագիրը:

         «Արամ Խաչատրեանի ձեռագիր նոտաները եւ կինոերաժշտութիւնը» յայտը պատրաստուած է  ՀՀ ԱԳՆ կողմէ` Արամ Խաչատրեանի տուն-թանգարանի եւ երաժշտագէտի որդիի Կարէն Խաչատրեանի օժանդակութեամբ: Յայտը  ԵՈՒՆԵՍՔՕ-ի կեդրոնակայան  ներկայացուած էր 2010թ. եւ մինչեւ 2012թ. համալրուած էր յաւելեալ նոտաներու ձեռագիրներով:

         Այսպիսով, «Աշխարհի յիշողութիւն» ծրագիրին մէջ իր տեղը գտաւ հայկական երրորդ փաստագրական ժառանգութիւնը. 1997 թուականէն Հայաստանը ներկայացուած էր Մեսրոպ Մաշտոցի անուան Մատենադարանով, իսկ 2011թ.-էն` «Բենիամին Մարգարեանի գալակտիկաներու մասին ուսումնասիրութեամբ»:

 

Տեղեկանք: ԵՈՒՆԵՍՔՕի «Աշխարհի յիշողութիւն» ծրագիրը մեկնարկած է 1992 թուականին` աշխարհի վրայ գոյութիւն ունեցող արխիւներու եւ գրադարաններու արժէքաւոր հաւաքածուներու անհետ կորուստը կանխելու նպատակով: Այս ծրագիրի ծիրէն ներս գոյութիւն ունի «Աշխարհի յիշողութեան» ԵՈՒՆԵՍՔՕի միջազգային արձանագրութիւն: Այդ Արձանագրութիւնը կը ներկայացնէ փաստագրական ժառանգութեան ցուցակ, որուն մէջ ընդգրկուած են այն փաստաթուղթերը, ձեռագիրները, տեսահնչիւնային նիւթերն ու գրադարանային հաւաքածուները եւ արխիւները, որոնք ճանչցուած են որպէս բացառիկ նշանակութիւն ունեցող արժէքներու մարմնաւորում եւ պէտք է վկայագրուին ու պահպանուին ամբողջ աշխարհի մարդկութեան համար:

 

 

LEAVE A REPLY

Please enter your comment!
Please enter your name here