ԹՈՒՐՔԻԱ – ԵՒՐՈՊԱԿԱՆ ՄԻՈՒԹԻՒՆ ԲԱՆԱԿՑՈՒԹԻՒՆՆԵՐԸ ՊԻԻՏ ԿԱՅԱՆԱՆ 24 ՅՈՒՆԻՍԻՆ

0
122

Թուրքիա զայրոյթով հակադարձեց այն իրողութեան, որ Հոլանտայի եւ Գերմանիոյ ցուցաբերած վերապահութեան հետեւանքով, Եւրոմիութեան հետ իր բանակցութեանց նոր թղթածրարներուն շուրջ յառաջիկայ շաբաթ նախատեսուած բանակցութիւնները յետաձգուեցան  24  Յունիսին:
Թրքական «Տողան» լրատու գործակալութիւնը կը հաղորդէ, որ Գերմանիա եւ Հոլանտա Թաքսիմի հրապարակին եւ «Կեզի» զբօսայգիին մէջ ցուցարարներու դէմ թրքական ոստիկանութեան կողմէ անհամաչափ ուժի կիրարումին պատճառով, որոշած են Թուրքիոյ հետ Եւրոպական Միութեան բանակցութիւնները սառեցնել:
Յայտնենք, թէ Գերմանիոյ վարչապետ Անկելա Մերքէլի կուսակցութիւնը այս շաբաթ հրապարակած էր Սեպտեմբեր 22-ին կայանալիք ընտրութեանց իր ծրագիրը, որուն մէջ շեշտուած է, թէ կուսակցութիւնը դէմ է Թուրքիոյ անդամակցութեան, որովհետեւ նման քայլ մը հսկայ բեռ պիտի դնէ Եւրոմիութեան վրայ:
Միւս կողմէ, «Թաքսիմի զօրակցութեան խմբակ»ը, որ կազմուած է ցոյցերուն մասնակից իրաւապաշտպան խմբակներէ եւ քաղաքացիական հասարակութեան կազմակերպութիւններէ, հաղորդագրութիւն մը հրապարակելով յայտնեց, որ ցոյցերուն աւարտէն ետք ցուցարարներու ձերբակալման արշաւը կը նմանի «կախարդներու հալածանք»ի մը եւ ժողովրդավարութեան վնաս կը պատճառէ: Կազմակերպութիւնը պահանջեց անմիջապէս դադրեցնել ձերբակալման արշաւը եւ ազատ արձակել ձերբակալուած ցուցարարները՝ յայտնելով, որ ամբողջ երկրի տարածքին ընթացող ձերբակալումները Թուրքիոյ մէջ երկարամեայ պետական աւանդութեան մը ուրուականը կը վերակենդանացնեն: Խմբակը կառավարութեան կոչ ուղղեց քաղաքացիներուն ցոյց կատարելու իրաւունքը յարգելու:
Իր կարգին, ԵԱՀԿ-ի Խորհրդարանական վեհաժողովի նախագահ Ուոլֆկանկ Կրոսռուք յայտնեց, որ մեծ մտահոգութեամբ կը հետեւի Թուրքիոյ տարածքին տեղի ունեցող իրադարձութեանց, եւ որ վեհաժողովը այս հարցին նկատմամբ յատուկ հետաքրքրութիւն մը ունի, որովհետեւ յառաջիկայ շաբաթ իր տարեկան ժողովը Պոլսոյ մէջ պիտի գումարէ: «Անոնք, որոնք բռնարարքներու կը դիմեն կամ կը հրահրեն զանոնք, պէտք է ապահովական մարմիններէն համաչափ հակազդեցութեան արժանանան», ըսաւ ան՝ ողջունելով անցեալ շաբաթ ցոյցերու շարք մը ղեկավարներուն հետ կառավարութեան ծաւալած երկխօսութիւնը, սակայն ցաւ յայտնելով, որ այդ քննարկումներէն ետք իսկ բռնարարքները շարունակուած են:
«Ցոյցերը ցրուելու համար զանգուածային ձերբակալութիւններն ու ուժի կիրառումը ժողովրդավարութեան խորհրդանիշեր չեն. այդպիսի արարքներ, նաեւ, իբրեւ ԵԱՀԿ-ի անդամ պետութիւն Թուրքիոյ յանձնառութեանց համահունչ չեն», եզրակացուց Կրոսռուք:

LEAVE A REPLY

Please enter your comment!
Please enter your name here