ԾԵՐԱԿՈՒՏԱԿԱՆՆԵՐ՝ ՍՈՒՐԻՈՅ ԸՆԴԴԻՄՈՒԹԵԱՆ ԶԷՆՔ ՉՄԱՏԱԿԱՐԱՐԵԼՈՒ ՕՐԻՆԱԳԻԾ ՄԸ ԿԸ ՆԵՐԿԱՅԱՑՆԵՆ ԳՈՆԿՐԷՍԻՆ

0
117

 Ռուսիոյ փոխարտաքին գործոց նախարար Միխայիլ Պոկտանով բացառեց  Սուրիոյ հակամարտութեան կողմերը մօտակայ  ժամանակներուն  երկխօսութեան սեղան  բերելու   կարելիութիւնները:  Ան   ըսաւ, թէ Սուրիոյ հակամարտութեան Հըզպալլայի միջամտութիւնը, որոշուած է  ընդդիմութեան  զօրքերուն  Դամասկոս  մուտք  գործելու լոյսին տակ:   Նախարարը   օրինական նկատեց   Ռուսիոյ կողմէ Սուրիոյ   իշխանութիւններուն  զէնքի  վաճառքը:

Խումբ մը  ծերակուտականներ  պահանջեցին արգիլել Սուրիոյ ընդդիմութեան  զէնքի մատակարարումը: Անոնք օրինագիծ մը  ներկայացուցին Գոնկրէսին, պահանջելով արգիլել  ռազմական  օգնութիւնը Սուրիոյ ընդդիմութեան:

Սուրիոյ  փոխարտաքին գործոց  նախարար  Ֆէյսալ Միքտատ  այն համոզումը յայտնեց, թէ  կառավարական   զօրքերը պիտի  յաջողին  վերագրաւել ապստամբներուն գրաւած տարածութիւնները:

Ռազմական  գետնի վրայ  բուռն բախումներ տեղի կ’ունենան Հալէպի կեդրոնը, հիւսիսային եւ արեւելեան շրջաններուն մէջ:  Բանակը նկատելիօրէն յառաջ  շարժած է  Պուստան Ալ Քասր եւ Սահուր շրջաններուն մէջ,  ուր  կեդրոնացած են  ծայրայեղականները:  Ռմբակոծումի ենթարկուած  է նաեւ   Հալէպի  հիւսիսը գտնուող Լիրամուն թաղամասը: Կատաղի բախումներ տեղի կ’ունենան  Պուսթան Ալ Փաշա թաղամասի  փողոցներուն մէջ: Բանակը  ռազմավարական դիրքեր գրաւած է  Հալէպի հարաւային եւ արեւմտեան  շրջաններուն մէջ: Ծայրայեղականները կը  փորձեն խուժել Նոր Գիւղ եւ  Սուլէյմանիյէ թաղամասերը: Հալէպի Նոր Գիւղ շրջանին մէջ, արձակազէններու  կրակոցներէն վիրաւորուեցան երեք հայեր:

Երէկ առաւօտեան ծայրայեղականները  հրթիռային   յարձակումի ենթարկեցին Դամասկոսի մէկ քանի շրջաններ, յատկապէս՝  Պապ Շարքը, վիրաւորելով  14  մարդ:

ՄԱԿ-ի տուեալներով, ծայրայեղականները կը կիրառեն քաղաքները շրջափակելու մարտավարութիւն՝  բնակիչները զրկելով   սնունդի եւ  բժշկական  օգնութեան  ծառայութիւններէն:   ՄԱԿ-ի կից մարդասիրական ծառայութիւններու  պատասխանատու   Վալերի Ամոս  նշեց, թէ որոշակի  յառաջընթաց կայ մարդասիրական  աշխատաններուն մէջ, սակայն ան չկրցաւ պատասխանել, թէ  ՄԱԿ ինչո՞ւ  չընդառաջեր  ծայրայեղականներու կողմէ  շրջափակուած քաղաքներուն մարդասիրական օգնութիւն ուղարկելու սուրիական իշխանութիւններու խնդրանքին:

 

LEAVE A REPLY

Please enter your comment!
Please enter your name here