ԳԵՐՄԱՆԻԱ –ԹՈՒՐՔԻԱ ԴԻՒԱՆԱԳԻՏԱԿԱՆ ՎԷՃ

0
150

Գերմանիոյ եւ Թուրքիոյ միջեւ արդէն իսկ վերապահ յարաբերութիւնները նոր հարուած մը ստացան, երբ Գերմանիոյ կառավարութիւնը խստօրէն քննադատեց մէկ օր առաջ Եւրոմիութեան հետ բանակցութեան հարցով Թուրքիոյ աւագ բանագնաց Էկեմեն Պաղըշի կատարած եւ Պերլինի ուղղուած անարգական մէկ յայտարարութիւնը՝ արտաքին գործոց նախարարութիւն կանչելով Գերմանիոյ մօտ Թուրքիոյ դեսպանը:


Գերմանիոյ արտաքին գործոց նախարարութիւնը «անընդունելի» որակեց Պաղըշի այն պնդումը, թէ Պերլին ներքին քաղաքական նպատակներու համար կը շահագործէ Եւրոմիութեան անդամակցելու Թուրքիոյ հետ բանակցութեանց հարցը: Պաղըշ այս յայտարարութիւնը կատարած էր, երբ լուրեր բացայայտուած էին այն մասին, թէ Գերմանիա որոշած է յետձագել անդամակցութեան բանակցութեան նոր թղթածրարի մը շուրջ յառաջիկայ Չորեքշաբթի օր Եւրոմիութիւն-Թուրքիա բանակցութիւնները:
Պաղըշ նաեւ ազդարարական ոճով աւելցուցած էր, թէ Գերմանիոյ վարչապետ Անկելա Մերքել պէտք է շատ լաւ գիտակցի, թէ «ան, որ Թուրքիոյ հետ կը խաղայ, բախտաւոր աւարտ մը պիտի չունենայ»:
Հակադարձելով Գերմանիոյ արտաքին գործոց նախարարութեան քայլին՝ Թուրքիոյ կառավարութիւնը եւս արտաքին գործոց նախարարութիւն կանչած է Գերմանիոյ դեսպանը, «վերջին իրադարձութեանց վերաբերեալ Անգարայի տեսակէտները փոխանցելու նպատակով»:
Յիշեցնենք, թէ Մերքել այս շաբաթասկիզբը եւս զայրացուցած էր Թուրքիոյ իշխանութիւնները՝ ցուցարարներու դէմ Թուրքիոյ ոստիկանութեան ի գործ դրած բռնարարքները չափազանցուած նկատելով: Անոր իշխող կուսակցութիւնը եւս այս շաբաթ հրապարակած էր Սեպտեմբեր 22ին կայանալիք Գերմանիոյ ընտրութեանց իր ծրագիրը, որուն մէջ շեշտուած է, թէ կուսակցութիւնը դէմ է Թուրքիոյ անդամակցութեան, որովհետեւ նման քայլ մը հսկայ բեռ պիտի դնէ Եւրոմիութեան վրայ:
Գերմանիոյ արտաքին գործոց նախարար Կուիտօ Վեսթերֆելէ եւս ցաւ յայտնած էր այն բանին համար, որ Թուրքիոյ կառավարութիւնը ցուցարարներուն հետ լուրջ երկխօսութիւն չի կատարեր եւ կը նախընտրէ «անոնց հետ արարքներով ու խօսքերով ճակատիլ»:
Գերմանիոյ դիւանագիտութեան պետը, Թուրքիոյ՝ Եւրոպական Միութեան անդամակցութեան վերաբերեալ իր երկիրին կեցուածքը բացատրելով՝ յայտնեց. «Այն, ինչ Թուրքիոյ մէջ տեղի կ՛ունենայ, մեզ կը մղէ անդամակցութեան բանակցութիւնները մօտ օրէն կատարելու՝ քննարկելու համար հարցեր, որոնց գլխաւորներն են քաղաքացիներու մարդկային իրաւունքները, օրէնքի պետութիւնը եւ խօսքի ազատութեան իրաւունքը»:
Եւրոպական Միութիւնը Թուրքիոյ անդամակցութեան բանակցութիւնները յետաձգեց.   26 Յունիսին:

 

LEAVE A REPLY

Please enter your comment!
Please enter your name here