ԸՍՏ ԼՈՍ ԱՆՃԵԼԸՍ ԹԱՅՄԶԻ՝ 700 ԱՄԵՐԻԿԵԱՆ ԲԱՆԱԿԱՅԻՆՆԵՐ ՏԵՂԱԿԱՅՈՒԱԾ ԵՆ ՅՈՐԴԱՆԱՆԻ ՄԷՋ

0
118

«Լոս Անճելըս Թայմզ»  օրաթերթը իր երէկուն համարով կը գրէ, թէ  Սի.Այ.Էյ-ի միաւորներ  Թուրքիոյ եւ Յորդանանի մէջ ամիսներէ ի վեր կը մարզեն սուրիացի  ապստամբներ:  Ըստ ամերիկեան  օրաթերթին,   ներկայիս      եօթ հարիւր կանոնաւոր   բանակայիններ  տեղակայուած  են    Սուրիոյ հետ Յորդանանի սահմանագիծին վրայ:  Բրիտանիոյ  արտաքին գործոց նախարար  Ուիլյըմ Հէյկ  յայտարարեց, թէ  գոյութիւն չունի  Սուրիոյ ընդդիմութիւնը զինելու որոշում:

Սուր իրավիճակ կը տիրէ Սուրիոյ հիւսիսային Աֆրին շրջանին մէջ, որ հիմնականօրէն բնակուած է քիւրտերով: Ծայրայեղականներու  եւ քիւրտ զինեալներու միջեւ տեղի ունեցած բախումներուն ընթացքին զոհուած  են տասնեակաւոր  անձեր: Քիւրտերը Սուրիոյ քաղաքացիական պատերազմի ընթացքին հիմնականօրէն չէզոք դիրքորոշում որդեգրած են՝ 2011 թուականի Մարտին միայն միանալով խաղաղ ցոյցերուն: Անոնց մէջ կան անձիք, որոնք ընդդիմադիր շարք մը կազմակերպութիւններու մէջ կը զբաղեցնեն պատասխանատու դիրքեր, սակայն չեն մտներ ընդդիմադիր եւ յեղափոխական ուժերու ազգային համաձայնական ղեկավարութեան կազմին մէջ:

Եթէ կառավարական զօրքերը յաջողութեան հասնին, ապա ծայրայեղականները  պիտի  կորսնցնեն Թուրքիայէն եկող մատակարարման ճանապարհները: Դիմադրելով բանակի ճնշումին` հակակառավարական խումբերը կը ներխուժեն քրտական տարածքներ  բայց ետ կը մղուին քիւրտերէն,  որոնց  շատերը ռազմական փորձ ձեռք բերած են Քիւրտիստանի Աշխատաւորական Կուսացկութեան շարքերէն:

 Բրիտանական  «Տի Ինտիփենտընթ» օրաթերթը ցաւ կը յայտնէ, որ ծայրայեղականները կը  քանդեն Սուրիոյ  պատմական  յուշարձանները:

LEAVE A REPLY

Please enter your comment!
Please enter your name here